၉. ပုရောဟိတပုတ္တဇေန္တတ္ထေရဂါထာ
၄၂၃. ‘‘ဇာတိမဒေန မတ္တောဟံ၊ ဘောဂဣဿရိယေန စ၊
သဏ္ဌာနဝဏ္ဏရူပေန၊ မဒမတ္တော အစာရိဟံ.
၄၂၄. ‘‘နာတ္တနော သမကံ ကဉ္စိ၊ အတိရေကံ စ မညိသံ၊
အတိမာနဟတော ဗာလော၊ ပတ္ထဒ္ဓေါ ဥဿိတဒ္ဓဇော.
၄၂၅. ‘‘မာတရံ ပိတရဉ္စာပိ၊ အညေပိ ဂရုသမ္မတေ၊
န ကဉ္စိ အဘိဝါဒေသိံ၊ မာနတ္ထဒ္ဓေါ အနာဒရော.
၄၂၆. ‘‘ဒိသွာ ဝိနာယကံ အဂ္ဂံ၊ သာရထီနံ ဝရုတ္တမံ၊
တပန္တမိဝ အာဒိစ္စံ၊ ဘိက္ခုသံဃပုရက္ခတံ.
၄၂၇. ‘‘မာနံ မဒဉ္စ ဆဍ္ဍေတွာ၊ ဝိပ္ပသန္နေန စေတသာ၊
သိရသာ အဘိဝါဒေသိံ၊ သဗ္ဗသတ္တာနမုတ္တမံ.
၄၂၈. ‘‘အတိမာနော စ ဩမာနော၊ ပဟီနာ သုသမူဟတာ၊
အသ္မိမာနော သမုစ္ဆိန္နော၊ သဗ္ဗေ မာနဝိဓာ ဟတာ’’တိ.
။ ဇေန္တော ပုရောဟိတပုတ္တော ထေရော။.