၇.ကာတိယာနတ္ထေရဂါထာ

၄၁၁. ‘‘ဥဋ္ဌေဟိ နိသီဒ ကာတိယာန၊ မာ နိဒ္ဒါဗဟုလော အဟု ဇာဂရဿု၊

မာ တံ အလသံ ပမတ္တဗန္ဓု၊ ကူဋေနေဝ ဇိနာတု မစ္စုရာဇာ.

၄၁၂. ‘‘သေယျထာပိ [သယထာပိ (သီ. ပီ.)] မဟာသမုဒ္ဒဝေဂေါ၊ ဧဝံ ဇာတိဇရာတိဝတ္တတေ တံ၊

သော ကရောဟိ သုဒီပမတ္တနော တွံ၊ န ဟိ တာဏံ တဝ ဝိဇ္ဇတေဝ အညံ.

၄၁၃. ‘‘သတ္ထာ ဟိ ဝိဇေသိ မဂ္ဂမေတံ၊ သင်္ဂါ ဇာတိဇရာဘယာ အတီတံ၊

ပုဗ္ဗာပရရတ္တမပ္ပမတ္တော၊ အနုယုဉ္ဇဿု ဒဠှံ ကရောဟိ ယောဂံ.

၄၁၄. ‘‘ပုရိမာနိ ပမုဉ္စ ဗန္ဓနာနိ၊ သင်္ဃာဋိခုရမုဏ္ဍဘိက္ခဘောဇီ၊

မာ ခိဍ္ဍာရတိဉ္စ မာ နိဒ္ဒံ၊ အနုယုဉ္ဇိတ္ထ ဈာယ ကာတိယာန.

၄၁၅. ‘‘ဈာယာဟိ ဇိနာဟိ ကာတိယာန၊ ယောဂက္ခေမပထေသု ကောဝိဒေါသိ၊

ပပ္ပုယျ အနုတ္တရံ ဝိသုဒ္ဓိံ၊ ပရိနိဗ္ဗာဟိသိ ဝါရိနာဝ ဇောတိ.

၄၁၆. ‘‘ပဇ္ဇောတကရော ပရိတ္တရံသော၊ ဝါတေန ဝိနမျတေ လတာဝ၊

ဧဝမ္ပိ တုဝံ အနာဒိယာနော၊ မာရံ ဣန္ဒသဂေါတ္တ နိဒ္ဓုနာဟိ၊

သော ဝေဒယိတာသု ဝီတရာဂေါ၊ ကာလံ ကင်္ခ ဣဓေဝ သီတိဘူတော’’တိ.

။ ကာတိယာနော ထေရော။.