၅. မာလုကျပုတ္တတ္ထေရဂါထာ

၃၉၉. ‘‘မနုဇဿ ပမတ္တစာရိနော၊ တဏှာ ဝဍ္ဎတိ မာလုဝါ ဝိယ၊

သော ပ္လဝတီ [ပ္လဝတိ (သီ. ပီ. က.)၊ ပရိပ္လဝတိ (သျာ.)] ဟုရာ ဟုရံ၊ ဖလမိစ္ဆံဝ ဝနသ္မိ ဝါနရော.

၄၀၀. ‘‘ယံ ဧသာ သဟတေ [သဟတိ (ပီ. က.)] ဇမ္မီ၊ တဏှာ လောကေ ဝိသတ္တိကာ၊

သောကာ တဿ ပဝဍ္ဎန္တိ၊ အဘိဝဋ္ဌံဝ [အဘိဝုဋ္ဌံဝ (သျာ.)၊ အဘိဝဍ္ဎံဝ (က.)] ဗီရဏံ.

၄၀၁. ‘‘ယော စေတံ သဟတေ [သဟတိ (ပီ. က.)] ဇမ္မိံ၊ တဏှံ လောကေ ဒုရစ္စယံ၊

သောကာ တမှာ ပပတန္တိ၊ ဥဒဗိန္ဒူဝ ပေါက္ခရာ.

၄၀၂. ‘‘တံ ဝေါ ဝဒါမိ ဘဒ္ဒံ ဝေါ၊ ယာဝန္တေတ္ထ သမာဂတာ၊

တဏှာယ မူလံ ခဏထ၊ ဥသီရတ္ထောဝ ဗီရဏံ၊

မာ ဝေါ နဠံဝ သောတောဝ၊ မာရော ဘဉ္ဇိ ပုနပ္ပုနံ.

၄၀၃. ‘‘ကရောထ ဗုဒ္ဓဝစနံ၊ ခဏော ဝေါ မာ ဥပစ္စဂါ၊

ခဏာတီတာ ဟိ သောစန္တိ၊ နိရယမှိ သမပ္ပိတာ.

၄၀၄. ‘‘ပမာဒေါ ရဇော ပမာဒေါ [သဗ္ဗဒါ (သီ. က.)၊ သုတ္တနိပါတဋ္ဌကထာယံ ဥဋ္ဌာနသုတ္တဝဏ္ဏနာ ဩလောကေတဗ္ဗာ]၊ ပမာဒါနုပတိတော ရဇော၊

အပ္ပမာဒေန ဝိဇ္ဇာယ၊ အဗ္ဗဟေ သလ္လမတ္တနော’’တိ.

။ မာလုကျပုတ္တော [မာလုင်္ကျပုတ္တော (သီ. သျာ. ပီ.)] ထေရော။.