၁၃. သိရိမဏ္ဍတ္ထေရဂါထာ

၄၄၇. [ဥဒါ. ၄၅၊ စူဠဝ. ၃၈၅၊ ပရိ. ၃၃၉] ‘‘ဆန္နမတိဝဿတိ၊ ဝိဝဋံ နာတိဝဿတိ၊

တသ္မာ ဆန္နံ ဝိဝရေထ၊ ဧဝံ တံ နာတိဝဿတိ.

၄၄၈. [သံ. နိ. ၁.၆၆၊ နေတ္တိ. ၁၈] ‘‘မစ္စုနာဗ္ဘဟတော လောကော၊ ဇရာယ ပရိဝါရိတော၊

တဏှာသလ္လေန ဩတိဏ္ဏော၊ ဣစ္ဆာဓူပါယိတော သဒါ.

၄၄၉. ‘‘မစ္စုနာဗ္ဘဟတော လောကော၊ ပရိက္ခိတ္တော ဇရာယ စ၊

ဟညတိ နိစ္စမတ္တာဏော၊ ပတ္တဒဏ္ဍောဝ တက္ကရော.

၄၅၀. ‘‘အာဂစ္ဆန္တဂ္ဂိခန္ဓာဝ၊ မစ္စု ဗျာဓိ ဇရာ တယော၊

ပစ္စုဂ္ဂန္တုံ ဗလံ နတ္ထိ၊ ဇဝေါ နတ္ထိ ပလာယိတုံ.

၄၅၁. ‘‘အမောဃံ ဒိဝသံ ကယိရာ၊ အပ္ပေန ဗဟုကေန ဝါ၊

ယံ ယံ ဝိဇဟတေ [ဝိရဟတေ (သီ. ပီ.)၊ ဝိဝဟတေ (သျာ.)] ရတ္တိံ၊ တဒူနံ တဿ ဇီဝိတံ.

၄၅၂. ‘‘စရတော တိဋ္ဌတော ဝါပိ၊ အာသီနသယနဿ ဝါ၊

ဥပေတိ စရိမာ ရတ္တိ၊ န တေ ကာလော ပမဇ္ဇိတု’’န္တိ.

။ သိရိမဏ္ဍော [သိရိမန္ဒော (သီ.)] ထေရော။.