၆. နဒီကဿပတ္ထေရဂါထာ

၃၄၀. ‘‘အတ္ထာယ ဝတ မေ ဗုဒ္ဓေါ၊ နဒိံ နေရဉ္ဇရံ အဂါ၊

ယဿာဟံ ဓမ္မံ သုတွာန၊ မိစ္ဆာဒိဋ္ဌိံ ဝိဝဇ္ဇယိံ.

၃၄၁. ‘‘ယဇိံ ဥစ္စာဝစေ ယညေ၊ အဂ္ဂိဟုတ္တံ ဇုဟိံ အဟံ၊

‘ဧသာ သုဒ္ဓီ’တိ မညန္တော၊ အန္ဓဘူတော [အန္ဓီဘူတော (က.)] ပုထုဇ္ဇနော.

၃၄၂. ‘‘ဒိဋ္ဌိဂဟနပက္ခန္ဒော [ပက္ခန္တော (သီ.)၊ ပက္ခန္နော (သျာ. ပီ.)]၊ ပရာမာသေန မောဟိတော၊

အသုဒ္ဓိံ မညိသံ သုဒ္ဓိံ၊ အန္ဓဘူတော အဝိဒ္ဒသု.

၃၄၃. ‘‘မိစ္ဆာဒိဋ္ဌိ ပဟီနာ မေ၊ ဘဝါ သဗ္ဗေ ပဒါလိတာ [ဝိဒါလိတာ (က.)]၊

ဇုဟာမိ ဒက္ခိဏေယျဂ္ဂိံ၊ နမဿာမိ တထာဂတံ.

၃၄၄. ‘‘မောဟာ သဗ္ဗေ ပဟီနာ မေ၊ ဘဝတဏှာ ပဒါလိတာ၊

ဝိက္ခီဏော ဇာတိသံသာရော၊ နတ္ထိ ဒါနိ ပုနဗ္ဘဝေါ’’တိ.

။ နဒီကဿပေါ ထေရော။.