၁၁. သောဏကုဋိကဏ္ဏတ္ထေရဂါထာ

၃၆၅. ‘‘ဥပသမ္ပဒါ စ မေ လဒ္ဓါ၊ ဝိမုတ္တော စမှိ အနာသဝေါ၊

သော စ မေ ဘဂဝါ ဒိဋ္ဌော၊ ဝိဟာရေ စ သဟာဝသိံ.

၃၆၆. ‘‘ဗဟုဒေဝ ရတ္တိံ ဘဂဝါ၊ အဗ္ဘောကာသေတိနာမယိ၊

ဝိဟာရကုသလော သတ္ထာ၊ ဝိဟာရံ ပါဝိသီ တဒါ.

၃၆၇. ‘‘သန္ထရိတွာန သင်္ဃာဋိံ၊ သေယျံ ကပ္ပေသိ ဂေါတမော၊

သီဟော သေလဂုဟာယံဝ၊ ပဟီနဘယဘေရဝေါ.

၃၆၈. ‘‘တတော ကလျာဏဝါက္ကရဏော၊ သမ္မာသမ္ဗုဒ္ဓသာဝကော၊

သောဏော အဘာသိ သဒ္ဓမ္မံ၊ ဗုဒ္ဓသေဋ္ဌဿ သမ္မုခါ.

၃၆၉. ‘‘ပဉ္စက္ခန္ဓေ ပရိညာယ၊ ဘာဝယိတွာန အဉ္ဇသံ၊

ပပ္ပုယျ ပရမံ သန္တိံ၊ ပရိနိဗ္ဗိဿတျနာသဝေါ’’တိ.

။ သောဏော ကုဋိကဏ္ဏထေရော။.