၇. သမ္ဘူတတ္ထေရဂါထာ

၂၉၁. ‘‘ယော ဒန္ဓကာလေ တရတိ၊ တရဏီယေ စ ဒန္ဓယေ၊

အယောနိ [အယောနိသော (သျာ.)] သံဝိဓာနေန၊ ဗာလော ဒုက္ခံ နိဂစ္ဆတိ.

၂၉၂. ‘‘တဿတ္ထာ ပရိဟာယန္တိ၊ ကာဠပက္ခေဝ စန္ဒိမာ၊

အာယသကျဉ္စ [အာယသသျဉ္စ (သီ.)] ပပ္ပေါတိ၊ မိတ္တေဟိ စ ဝိရုဇ္ဈတိ.

၂၉၃. ‘‘ယော ဒန္ဓကာလေ ဒန္ဓေတိ၊ တရဏီယေ စ တာရယေ၊

ယောနိသော သံဝိဓာနေန၊ သုခံ ပပ္ပေါတိ ပဏ္ဍိတော.

၂၉၄. ‘‘တဿတ္ထာ ပရိပူရေန္တိ၊ သုက္ကပက္ခေဝ စန္ဒိမာ၊

ယသော ကိတ္တိဉ္စ ပပ္ပေါတိ၊ မိတ္တေဟိ န ဝိရုဇ္ဈတီ’’တိ.

။ သမ္ဘူတော ထေရော။.