၁၁. သပ္ပကတ္ထေရဂါထာ

၃၀၇. ‘‘ယဒါ ဗလာကာ သုစိပဏ္ဍရစ္ဆဒါ၊ ကာဠဿ မေဃဿ ဘယေန တဇ္ဇိတာ၊

ပလေဟိတိ အာလယမာလယေသိနီ၊ တဒါ နဒီ အဇကရဏီ ရမေတိ မံ.

၃၀၈. ‘‘ယဒါ ဗလာကာ သုဝိသုဒ္ဓပဏ္ဍရာ၊ ကာဠဿ မေဃဿ ဘယေန တဇ္ဇိတာ၊

ပရိယေသတိ လေဏမလေဏဒဿိနီ၊ တဒါ နဒီ အဇကရဏီ ရမေတိ မံ.

၃၀၉. ‘‘ကံ နု တတ္ထ န ရမေန္တိ၊ ဇမ္ဗုယော ဥဘတော တဟိံ၊

သောဘေန္တိ အာပဂါကူလံ၊ မမ လေဏဿ [မဟာလေဏဿ (သျာ. က.)] ပစ္ဆတော.

၃၁၀. ‘‘တာ မတမဒသံဃသုပ္ပဟီနာ၊

ဘေကာ မန္ဒဝတီ ပနာဒယန္တိ၊

‘နာဇ္ဇ ဂိရိနဒီဟိ ဝိပ္ပဝါသသမယော၊

ခေမာ အဇကရဏီ သိဝါ သုရမ္မာ’’’တိ.

။ သပ္ပကော ထေရော။.