၁. အင်္ဂဏိကဘာရဒွါဇတ္ထေရဂါထာ

၂၁၉. ‘‘အယောနိ သုဒ္ဓိမနွေသံ၊ အဂ္ဂိံ ပရိစရိံ ဝနေ၊

သုဒ္ဓိမဂ္ဂံ အဇာနန္တော၊ အကာသိံ အမရံ တပံ [အကာသိံ အပရံ တပံ (သျာ.)၊ အကာသိံ အမတံ တပံ (က.)].

၂၂၀. ‘‘တံ သုခေန သုခံ လဒ္ဓံ၊ ပဿ ဓမ္မသုဓမ္မတံ၊

တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသနံ.

၂၂၁. ‘‘ဗြဟ္မဗန္ဓု ပုရေ အာသိံ၊ ဣဒါနိ ခေါမှိ ဗြာဟ္မဏော၊

တေဝိဇ္ဇော နှာတကော [နဟာတကော (သီ. အဋ္ဌ.)] စမှိ၊ သောတ္တိယော စမှိ ဝေဒဂူ’’တိ.

။ အင်္ဂဏိကဘာရဒွါဇော ထေရော။.