၉. သန္ဓိတတ္ထေရဂါထာ

၂၁၇. ‘‘အဿတ္ထေ ဟရိတောဘာသေ၊ သံဝိရူဠှမှိ ပါဒပေ၊

ဧကံ ဗုဒ္ဓဂတံ သညံ၊ အလဘိတ္ထံ [အလဘိံ ဟံ (က.)] ပတိဿတော.

၂၁၈. ‘‘ဧကတိံသေ ဣတော ကပ္ပေ၊ ယံ သညမလဘိံ တဒါ၊

တဿာ သညာယ ဝါဟသာ၊ ပတ္တော မေ အာသဝက္ခယော’’တိ.

။ သန္ဓိတော ထေရော။.

ဝဂ္ဂေါ ပဉ္စမော နိဋ္ဌိတော.

တဿုဒ္ဒါနံ –

ကုမာရကဿပေါ ထေရော၊ ဓမ္မပါလော စ ဗြဟ္မာလိ၊

မောဃရာဇာ ဝိသာခေါ စ၊ စူဠကော စ အနူပမော၊

ဝဇ္ဇိတော သန္ဓိတော ထေရော၊ ကိလေသရဇဝါဟနောတိ.

ဒုကနိပါတော နိဋ္ဌိတော.