၃. တတိယဝဂ္ဂေါ

၁. ဥတ္တရတ္ထေရဂါထာ

၁၆၁. ‘‘ခန္ဓာ မယာ ပရိညာတာ၊ တဏှာ မေ သုသမူဟတာ၊

ဘာဝိတာ မမ ဗောဇ္ဈင်္ဂါ၊ ပတ္တော မေ အာသဝက္ခယော.

၁၆၂. ‘‘သောဟံ ခန္ဓေ ပရိညာယ၊ အဗ္ဗဟိတွာန [အဗ္ဗုဟိတွာန (က.)] ဇာလိနိံ၊

ဘာဝယိတွာန ဗောဇ္ဈင်္ဂေ၊ နိဗ္ဗာယိဿံ အနာသဝေါ’’တိ.

။ ဥတ္တရော ထေရော။.

၂. ဘဒ္ဒဇိတ္ထေရဂါထာ

၁၆၃. ‘‘ပနာဒေါ နာမ သော ရာဇာ၊ ယဿ ယူပေါ သုဝဏ္ဏယော၊

တိရိယံ သောဠသုဗ္ဗေဓော [သောဠသပဗ္ဗေဓော (သီ. အဋ္ဌ.)၊ သောဠသဗ္ဗာဏော (?)]၊ ဥဗ္ဘမာဟု [ဥဒ္ဓမာဟု (သီ.)၊ ဥစ္စမာဟု (သျာ.)] သဟဿဓာ.

၁၆၄. ‘‘သဟဿကဏ္ဍော သတဂေဏ္ဍု၊ ဓဇာလု ဟရိတာမယော၊

အနစ္စုံ တတ္ထ ဂန္ဓဗ္ဗာ၊ ဆသဟဿာနိ သတ္တဓာ’’တိ.

။ ဘဒ္ဒဇိတ္ထေရော။.

၃. သောဘိတတ္ထေရဂါထာ

၁၆၅. ‘‘သတိမာ ပညဝါ ဘိက္ခု၊ အာရဒ္ဓဗလဝီရိယော၊

ပဉ္စ ကပ္ပသတာနာဟံ၊ ဧကရတ္တိံ အနုဿရိံ.

၁၆၆. ‘‘စတ္တာရော သတိပဋ္ဌာနေ၊ သတ္တ အဋ္ဌ စ ဘာဝယံ၊

ပဉ္စ ကပ္ပသတာနာဟံ၊ ဧကရတ္တိံ အနုဿရိ’’န္တိ.

။ သောဘိတော ထေရော။.

၄. ဝလ္လိယတ္ထေရဂါထာ

၁၆၇. ‘‘ယံ ကိစ္စံ ဒဠှဝီရိယေန၊ ယံ ကိစ္စံ ဗောဒ္ဓုမိစ္ဆတာ၊

ကရိဿံ နာဝရဇ္ဈိဿံ [နာဝရုဇ္ဈိဿံ (က. သီ. က.)]၊ ပဿ ဝီရိယံ ပရက္ကမ.

၁၆၈. ‘‘တွဉ္စ မေ မဂ္ဂမက္ခာဟိ၊ အဉ္ဇသံ အမတောဂဓံ၊

အဟံ မောနေန မောနိဿံ၊ ဂင်္ဂါသောတောဝ သာဂရ’’န္တိ.

။ ဝလ္လိယော ထေရော။.

၅. ဝီတသောကတ္ထေရဂါထာ

၁၆၉. ‘‘ကေသေ မေ ဩလိခိဿန္တိ၊ ကပ္ပကော ဥပသင်္ကမိ၊

တတော အာဒါသမာဒါယ၊ သရီရံ ပစ္စဝေက္ခိသံ.

၁၇၀. ‘‘တုစ္ဆော ကာယော အဒိဿိတ္ထ၊ အန္ဓကာရော တမော ဗျဂါ၊

သဗ္ဗေ စောဠာ သမုစ္ဆိန္နာ၊ နတ္ထိ ဒါနိ ပုနဗ္ဘဝေါ’’တိ.

။ ဝီတသောကော ထေရော။.

၆. ပုဏ္ဏမာသတ္ထေရဂါထာ

၁၇၁. ‘‘ပဉ္စ နီဝရဏေ ဟိတွာ၊ ယောဂက္ခေမဿ ပတ္တိယာ၊

ဓမ္မာဒါသံ ဂဟေတွာန၊ ဉာဏဒဿနမတ္တနော.

၁၇၂. ‘‘ပစ္စဝေက္ခိံ ဣမံ ကာယံ၊ သဗ္ဗံ သန္တရဗာဟိရံ၊

အဇ္ဈတ္တဉ္စ ဗဟိဒ္ဓါ စ၊ တုစ္ဆော ကာယော အဒိဿထာ’’တိ.

။ ပုဏ္ဏမာသော ထေရော။.

၇. နန္ဒကတ္ထေရဂါထာ

၁၇၃. ‘‘ယထာပိ ဘဒ္ဒေါ အာဇညော၊ ခလိတွာ ပတိတိဋ္ဌတိ၊

ဘိယျော လဒ္ဒါန သံဝေဂံ၊ အဒီနော ဝဟတေ ဓုရံ.

၁၇၄. ‘‘ဧဝံ ဒဿနသမ္ပန္နံ၊ သမ္မာသမ္ဗုဒ္ဓသာဝကံ၊

အာဇာနီယံ မံ ဓာရေထ၊ ပုတ္တံ ဗုဒ္ဓဿ ဩရသ’’န္တိ.

။ နန္ဒကော ထေရော။.

၈. ဘရတတ္ထေရဂါထာ

၁၇၅. ‘‘ဧဟိ နန္ဒက ဂစ္ဆာမ၊ ဥပဇ္ဈာယဿ သန္တိကံ၊

သီဟနာဒံ နဒိဿာမ၊ ဗုဒ္ဓသေဋ္ဌဿ သမ္မုခါ.

၁၇၆. ‘‘ယာယ နော အနုကမ္ပာယ၊ အမှေ ပဗ္ဗာဇယီ မုနိ၊

သော နော အတ္ထော အနုပ္ပတ္တော၊ သဗ္ဗသံယောဇနက္ခယော’’တိ.

။ ဘရတော ထေရော။.

၉. ဘာရဒွါဇတ္ထေရဂါထာ

၁၇၇. ‘‘နဒန္တိ ဧဝံ သပ္ပညာ၊ သီဟာဝ ဂိရိဂဗ္ဘရေ၊

ဝီရာ ဝိဇိတသင်္ဂါမာ၊ ဇေတွာ မာရံ သဝါဟနိံ [သဝါဟနံ (ဗဟူသု)].

၁၇၈. ‘‘သတ္ထာ စ ပရိစိဏ္ဏော မေ၊ ဓမ္မော သံဃော စ ပူဇိတော၊

အဟဉ္စ ဝိတ္တော သုမနော၊ ပုတ္တံ ဒိသွာ အနာသဝ’’န္တိ.

။ ဘာရဒွါဇော ထေရော။.

၁၀. ကဏှဒိန္နတ္ထေရဂါထာ

၁၇၉. ‘‘ဥပါသိတာ သပ္ပုရိသာ၊ သုတာ ဓမ္မာ အဘိဏှသော၊

သုတွာန ပဋိပဇ္ဇိဿံ၊ အဉ္ဇသံ အမတောဂဓံ.

၁၈၀. ‘‘ဘဝရာဂဟတဿ မေ သတော၊ ဘဝရာဂေါ ပုန မေ န ဝိဇ္ဇတိ၊

န စာဟု န စ မေ ဘဝိဿတိ၊ န စ မေ ဧတရဟိ ဝိဇ္ဇတီ’’တိ.

။ ကဏှဒိန္နော ထေရော။.

ဝဂ္ဂေါ တတိယော နိဋ္ဌိတော.

တဿုဒ္ဒါနံ –

ဥတ္တရော ဘဒ္ဒဇိတ္ထေရော၊ သောဘိတော ဝလ္လိယော ဣသိ၊

ဝီတသောကော စ ယော ထေရော၊ ပုဏ္ဏမာသော စ နန္ဒကော၊

ဘရတော ဘာရဒွါဇော စ၊ ကဏှဒိန္နော မဟာမုနီတိ.