၁. သီလဝတ္ထေရဂါထာ

၆၀၈. ‘‘သီလမေဝိဓ သိက္ခေထ၊ အသ္မိံ လောကေ သုသိက္ခိတံ၊

သီလံ ဟိ သဗ္ဗသမ္ပတ္တိံ၊ ဥပနာမေတိ သေဝိတံ.

၆၀၉. ‘‘သီလံ ရက္ခေယျ မေဓာဝီ၊ ပတ္ထယာနော တယော သုခေ၊

ပသံသံ ဝိတ္တိလာဘဉ္စ၊ ပေစ္စ သဂ္ဂေ ပမောဒနံ [ပေစ္စ သဂ္ဂေ စ မောဒနံ (သီ. ပီ.)].

၆၁၀. ‘‘သီလဝါ ဟိ ဗဟူ မိတ္တေ၊ သညမေနာဓိဂစ္ဆတိ၊

ဒုဿီလော ပန မိတ္တေဟိ၊ ဓံသတေ ပါပမာစရံ.

၆၁၁. ‘‘အဝဏ္ဏဉ္စ အကိတ္တိဉ္စ၊ ဒုဿီလော လဘတေ နရော၊

ဝဏ္ဏံ ကိတ္တိံ ပသံသဉ္စ၊ သဒါ လဘတိ သီလဝါ.

၆၁၂. ‘‘အာဒိ သီလံ ပတိဋ္ဌာ စ၊ ကလျာဏာနဉ္စ မာတုကံ၊

ပမုခံ သဗ္ဗဓမ္မာနံ၊ တသ္မာ သီလံ ဝိသောဓယေ.

၆၁၃. ‘‘ဝေလာ စ သံဝရံ သီလံ [သံဝရော သီလံ (သီ.)၊ သံဝရသီလံ (သီ. အဋ္ဌ.)]၊ စိတ္တဿ အဘိဟာသနံ၊

တိတ္ထဉ္စ သဗ္ဗဗုဒ္ဓါနံ၊ တသ္မာ သီလံ ဝိသောဓယေ.

၆၁၄. ‘‘သီလံ ဗလံ အပ္ပဋိမံ၊ သီလံ အာဝုဓမုတ္တမံ၊

သီလမာဘရဏံ သေဋ္ဌံ၊ သီလံ ကဝစမဗ္ဘုတံ.

၆၁၅. ‘‘သီလံ သေတု မဟေသက္ခော၊ သီလံ ဂန္ဓော အနုတ္တရော၊

သီလံ ဝိလေပနံ သေဋ္ဌံ၊ ယေန ဝါတိ ဒိသောဒိသံ.

၆၁၆. ‘‘သီလံ သမ္ဗလမေဝဂ္ဂံ၊ သီလံ ပါထေယျမုတ္တမံ၊

သီလံ သေဋ္ဌော အတိဝါဟော၊ ယေန ယာတိ ဒိသောဒိသံ.

၆၁၇. ‘‘ဣဓေဝ နိန္ဒံ လဘတိ၊ ပေစ္စာပါယေ စ ဒုမ္မနော၊

သဗ္ဗတ္ထ ဒုမ္မနော ဗာလော၊ သီလေသု အသမာဟိတော.

၆၁၈. ‘‘ဣဓေဝ ကိတ္တိံ လဘတိ၊ ပေစ္စ သဂ္ဂေ စ သုမ္မနော၊

သဗ္ဗတ္ထ သုမနော ဓီရော၊ သီလေသု သုသမာဟိတော.

၆၁၉. ‘‘သီလမေဝ ဣဓ အဂ္ဂံ၊ ပညဝါ ပန ဥတ္တမော၊

မနုဿေသု စ ဒေဝေသု၊ သီလပညာဏတော ဇယ’’န္တိ.

။ သီလဝေါ ထေရော။.