၁၂. စူဠဗျူဟသုတ္တံ [စူဠဝိယူဟသုတ္တံ (သီ. သျာ. နိဒ္ဒေသ)]

၈၈၄. သကံသကံဒိဋ္ဌိပရိဗ္ဗသာနာ၊ ဝိဂ္ဂယှ နာနာ ကုသလာ ဝဒန္တိ၊

ယော ဧဝံ ဇာနာတိ သ ဝေဒိ ဓမ္မံ၊ ဣဒံ ပဋိက္ကောသမကေဝလီ သော.

၈၈၅. ဧဝမ္ပိ ဝိဂ္ဂယှ ဝိဝါဒယန္တိ၊ ဗာလော ပရော အက္ကုသလောတိ [အကုသလောတိ (သီ. သျာ. ပီ.)] စာဟု၊

သစ္စော နု ဝါဒေါ ကတမော ဣမေသံ၊ သဗ္ဗေဝ ဟီမေ ကုသလာ ဝဒါနာ.

၈၈၆. ပရဿ စေ ဓမ္မမနာနုဇာနံ၊ ဗာလောမကော [ဗာလော မဂေါ (သီ. သျာ. က.)] ဟောတိ နိဟီနပညော၊

သဗ္ဗေဝ ဗာလာ သုနိဟီနပညာ၊ သဗ္ဗေဝိမေ ဒိဋ္ဌိပရိဗ္ဗသာနာ.

၈၈၇. သန္ဒိဋ္ဌိယာ စေဝ န ဝီဝဒါတာ၊ သံသုဒ္ဓပညာ ကုသလာ မုတီမာ၊

န တေသံ ကောစိ ပရိဟီနပညော [ကောစိပိ နိဟီနပညော (သီ. သျာ. က.)]၊ ဒိဋ္ဌီ ဟိ တေသမ္ပိ တထာ သမတ္တာ.

၈၈၈. န ဝါဟမေတံ တထိယန္တိ [တထိဝန္တိ (သျာ. က.)] ဗြူမိ၊ ယမာဟု ဗာလာ မိထု အညမညံ၊

သကံသကံဒိဋ္ဌိမကံသု သစ္စံ၊ တသ္မာ ဟိ ဗာလောတိ ပရံ ဒဟန္တိ.

၈၈၉. ယမာဟု သစ္စံ တထိယန္တိ ဧကေ၊ တမာဟု အညေ [အညေပိ (သျာ.)၊ အညေ စ (?)] တုစ္ဆံ မုသာတိ၊

ဧဝမ္ပိ ဝိဂယှ ဝိဝါဒယန္တိ၊ ကသ္မာ န ဧကံ သမဏာ ဝဒန္တိ.

၈၉၀. ဧကဉှိ သစ္စံ န ဒုတီယမတ္ထိ၊ ယသ္မိံ ပဇာ နော ဝိဝဒေ ပဇာနံ၊

နာနာ တေ [နာနာတော (က.)] သစ္စာနိ သယံ ထုနန္တိ၊ တသ္မာ န ဧကံ သမဏာ ဝဒန္တိ.

၈၉၁. ကသ္မာ နု သစ္စာနိ ဝဒန္တိ နာနာ၊ ပဝါဒိယာသေ ကုသလာ ဝဒါနာ၊

သစ္စာနိ သုတာနိ ဗဟူနိ နာနာ၊ ဥဒါဟု တေ တက္ကမနုဿရန္တိ.

၈၉၂. န ဟေဝ သစ္စာနိ ဗဟူနိ နာနာ၊ အညတြ သညာယ နိစ္စာနိ လောကေ၊

တက္ကဉ္စ ဒိဋ္ဌီသု ပကပ္ပယိတွာ၊ သစ္စံ မုသာတိ ဒွယဓမ္မမာဟု.

၈၉၃. ဒိဋ္ဌေ သုတေ သီလဝတေ မုတေ ဝါ၊ ဧတေ စ နိဿာယ ဝိမာနဒဿီ၊

ဝိနိစ္ဆယေ ဌတွာ ပဟဿမာနော၊ ဗာလော ပရော အက္ကုသလောတိ စာဟ.

၈၉၄. ယေနေဝ ဗာလောတိ ပရံ ဒဟာတိ၊ တေနာတုမာနံ ကုသလောတိ စာဟ၊

သယမတ္တနာ သော ကုသလော ဝဒါနော၊ အညံ ဝိမာနေတိ တဒေဝ ပါဝ.

၈၉၅. အတိသာရဒိဋ္ဌိယာဝ သော သမတ္တော၊ မာနေန မတ္တော ပရိပုဏ္ဏမာနီ၊

သယမေဝ သာမံ မနသာဘိသိတ္တော၊ ဒိဋ္ဌီ ဟိ သာ တဿ တထာ သမတ္တာ.

၈၉၆. ပရဿ စေ ဟိ ဝစသာ နိဟီနော၊ တုမော သဟာ ဟောတိ နိဟီနပညော၊

အထ စေ သယံ ဝေဒဂူ ဟောတိ ဓီရော၊ န ကောစိ ဗာလော သမဏေသု အတ္ထိ.

၈၉၇. အညံ ဣတော ယာဘိဝဒန္တိ ဓမ္မံ၊ အပရဒ္ဓါ သုဒ္ဓိမကေဝလီ တေ [သုဒ္ဓိမကေဝလီနော (သီ.)]၊

ဧဝမ္ပိ တိတ္ထျာ ပုထုသော ဝဒန္တိ၊ သန္ဒိဋ္ဌိရာဂေန ဟိ တေဘိရတ္တာ [တျာဘိရတ္တာ (သျာ. က.)].

၈၉၈. ဣဓေဝ သုဒ္ဓိ ဣတိ ဝါဒယန္တိ၊ နာညေသု ဓမ္မေသု ဝိသုဒ္ဓိမာဟု၊

ဧဝမ္ပိ တိတ္ထျာ ပုထုသော နိဝိဋ္ဌာ၊ သကာယနေ တတ္ထ ဒဠှံ ဝဒါနာ.

၈၉၉. သကာယနေ ဝါပိ ဒဠှံ ဝဒါနော၊ ကမေတ္ထ ဗာလောတိ ပရံ ဒဟေယျ၊

သယမေဝ သော မေဓဂမာဝဟေယျ [မေဓကံ အာဝဟေယျ (သီ. ပီ.)]၊ ပရံ ဝဒံ ဗာလမသုဒ္ဓိဓမ္မံ.

၉၀၀. ဝိနိစ္ဆယေ ဌတွာ သယံ ပမာယ၊ ဥဒ္ဓံ သ [ဥဒ္ဒံ သော (သီ. သျာ. ပီ.)] လောကသ္မိံ ဝိဝါဒမေတိ၊

ဟိတွာန သဗ္ဗာနိ ဝိနိစ္ဆယာနိ၊ န မေဓဂံ ကုဗ္ဗတိ ဇန္တု လောကေတိ.

စူဠဗျူဟသုတ္တံ ဒွါဒသမံ နိဋ္ဌိတံ.