၁. ကာမသုတ္တံ

၇၇၂. ကာမံ ကာမယမာနဿ၊ တဿ စေ တံ သမိဇ္ဈတိ၊

အဒ္ဓါ ပီတိမနော ဟောတိ၊ လဒ္ဓါ မစ္စော ယဒိစ္ဆတိ.

၇၇၃. တဿ စေ ကာမယာနဿ [ကာမယမာနဿ (က.)]၊ ဆန္ဒဇာတဿ ဇန္တုနော၊

တေ ကာမာ ပရိဟာယန္တိ၊ သလ္လဝိဒ္ဓေါဝ ရုပ္ပတိ.

၇၇၄. ယော ကာမေ ပရိဝဇ္ဇေတိ၊ သပ္ပဿေဝ ပဒါ သိရော၊

သောမံ [သော ဣမံ (သီ. ပီ.)] ဝိသတ္တိကံ လောကေ၊ သတော သမတိဝတ္တတိ.

၇၇၅. ခေတ္တံ ဝတ္ထုံ ဟိရညံ ဝါ၊ ဂဝဿံ [ဂဝါဿံ (သီ. သျာ. ပီ.)] ဒါသပေါရိသံ၊

ထိယော ဗန္ဓူ ပုထု ကာမေ၊ ယော နရော အနုဂိဇ္ဈတိ.

၇၇၆. အဗလာ နံ ဗလီယန္တိ၊ မဒ္ဒန္တေနံ ပရိဿယာ၊

တတော နံ ဒုက္ခမနွေတိ၊ နာဝံ ဘိန္နမိဝေါဒကံ.

၇၇၇. တသ္မာ ဇန္တု သဒါ သတော၊ ကာမာနိ ပရိဝဇ္ဇယေ၊

တေ ပဟာယ တရေ ဩဃံ၊ နာဝံ သိတွာဝ [သိဉ္စိတွာ (သီ.)] ပါရဂူတိ.

ကာမသုတ္တံ ပဌမံ နိဋ္ဌိတံ.