၈. သလ္လသုတ္တံ

၅၇၉. အနိမိတ္တမနညာတံ၊ မစ္စာနံ ဣဓ ဇီဝိတံ၊

ကသိရဉ္စ ပရိတ္တဉ္စ၊ တဉ္စ ဒုက္ခေန သံယုတံ.

၅၈၀. န ဟိ သော ဥပက္ကမော အတ္ထိ၊ ယေန ဇာတာ န မိယျရေ၊

ဇရမ္ပိ ပတွာ မရဏံ၊ ဧဝံဓမ္မာ ဟိ ပါဏိနော.

၅၈၁. ဖလာနမိဝ ပက္ကာနံ၊ ပါတော ပတနတော [ပပတတော (သီ. ပီ. အဋ္ဌ.)] ဘယံ၊

ဧဝံ ဇာတာန မစ္စာနံ၊ နိစ္စံ မရဏတော ဘယံ.

၅၈၂. ယထာပိ ကုမ္ဘကာရဿ၊ ကတာ မတ္တိကဘာဇနာ၊

သဗ္ဗေ ဘေဒနပရိယန္တာ [ဘေဒပရိယန္တာ (သျာ.)]၊ ဧဝံ မစ္စာန ဇီဝိတံ.

၅၈၃. ဒဟရာ စ မဟန္တာ စ၊ ယေ ဗာလာ ယေ စ ပဏ္ဍိတာ၊

သဗ္ဗေ မစ္စုဝသံ ယန္တိ၊ သဗ္ဗေ မစ္စုပရာယဏာ.

၅၈၄. တေသံ မစ္စုပရေတာနံ၊ ဂစ္ဆတံ ပရလောကတော၊

န ပိတာ တာယတေ ပုတ္တံ၊ ဉာတီ ဝါ ပန ဉာတကေ.

၅၈၅. ပေက္ခတံ ယေဝ ဉာတီနံ၊ ပဿ လာလပတံ ပုထု၊

ဧကမေကောဝ မစ္စာနံ၊ ဂေါဝဇ္ဈော ဝိယ နီယတိ [နိယျတိ (ဗဟူသု)].

၅၈၆. ဧဝမဗ္ဘာဟတော လောကော၊ မစ္စုနာ စ ဇရာယ စ၊

တသ္မာ ဓီရာ န သောစန္တိ၊ ဝိဒိတွာ လောကပရိယာယံ.

၅၈၇. ယဿ မဂ္ဂံ န ဇာနာသိ၊ အာဂတဿ ဂတဿ ဝါ၊

ဥဘော အန္တေ အသမ္ပဿံ၊ နိရတ္ထံ ပရိဒေဝသိ.

၅၈၈. ပရိဒေဝယမာနော စေ၊ ကိဉ္စိဒတ္ထံ ဥဒဗ္ဗဟေ၊

သမ္မူဠှော ဟိံသမတ္တာနံ၊ ကယိရာ စေ နံ ဝိစက္ခဏော.

၅၈၉. န ဟိ ရုဏ္ဏေန သောကေန၊ သန္တိံ ပပ္ပေါတိ စေတသော၊

ဘိယျဿုပ္ပဇ္ဇတေ ဒုက္ခံ၊ သရီရံ စုပဟညတိ.

၅၉၀. ကိသော ဝိဝဏ္ဏော ဘဝတိ၊ ဟိံသမတ္တာနမတ္တနာ၊

န တေန ပေတာ ပါလေန္တိ၊ နိရတ္ထာ ပရိဒေဝနာ.

၅၉၁. သောကမပ္ပဇဟံ ဇန္တု၊ ဘိယျော ဒုက္ခံ နိဂစ္ဆတိ၊

အနုတ္ထုနန္တော ကာလင်္ကတံ [ကာလကတံ (သီ. သျာ.)]၊ သောကဿ ဝသမနွဂူ.

၅၉၂. အညေပိ ပဿ ဂမိနေ၊ ယထာကမ္မူပဂေ နရေ၊

မစ္စုနော ဝသမာဂမ္မ၊ ဖန္ဒန္တေဝိဓ ပါဏိနော.

၅၉၃. ယေန ယေန ဟိ မညန္တိ၊ တတော တံ ဟောတိ အညထာ၊

ဧတာဒိသော ဝိနာဘာဝေါ၊ ပဿ လောကဿ ပရိယာယံ.

၅၉၄. အပိ ဝဿသတံ ဇီဝေ၊ ဘိယျော ဝါ ပန မာဏဝေါ၊

ဉာတိသံဃာ ဝိနာ ဟောတိ၊ ဇဟာတိ ဣဓ ဇီဝိတံ.

၅၉၅. တသ္မာ အရဟတော သုတွာ၊ ဝိနေယျ ပရိဒေဝိတံ၊

ပေတံ ကာလင်္ကတံ ဒိသွာ၊ နေသော လဗ္ဘာ မယာ ဣတိ.

၅၉၆. ယထာ သရဏမာဒိတ္တံ၊ ဝါရိနာ ပရိနိဗ္ဗယေ [ပရိနိဗ္ဗုတော (သီ. က.)]၊

ဧဝမ္ပိ ဓီရော သပညော၊ ပဏ္ဍိတော ကုသလော နရော၊

ခိပ္ပမုပ္ပတိတံ သောကံ၊ ဝါတော တူလံဝ ဓံသယေ.

၅၉၇. ပရိဒေဝံ ပဇပ္ပဉ္စ၊ ဒေါမနဿဉ္စ အတ္တနော၊

အတ္တနော သုခမေသာနော၊ အဗ္ဗဟေ သလ္လမတ္တနော.

၅၉၈. အဗ္ဗုဠှသလ္လော အသိတော၊ သန္တိံ ပပ္ပုယျ စေတသော၊

သဗ္ဗသောကံ အတိက္ကန္တော၊ အသောကော ဟောတိ နိဗ္ဗုတောတိ.

သလ္လသုတ္တံ အဋ္ဌမံ နိဋ္ဌိတံ.