၆. သဘိယသုတ္တံ

ဧဝံ မေ သုတံ – ဧကံ သမယံ ဘဂဝါ ရာဇဂဟေ ဝိဟရတိ ဝေဠုဝနေ ကလန္ဒကနိဝါပေ. တေန ခေါ ပန သမယေန သဘိယဿ ပရိဗ္ဗာဇကဿ ပုရာဏသာလောဟိတာယ ဒေဝတာယ ပဉှာ ဥဒ္ဒိဋ္ဌာ ဟောန္တိ – ‘‘ယော တေ၊ သဘိယ၊ သမဏော ဝါ ဗြာဟ္မဏော ဝါ ဣမေ ပဉှေ ပုဋ္ဌော ဗျာကရောတိ တဿ သန္တိကေ ဗြဟ္မစရိယံ စရေယျာသီ’’တိ.

အထ ခေါ သဘိယော ပရိဗ္ဗာဇကော တဿာ ဒေဝတာယ သန္တိကေ တေ ပဉှေ ဥဂ္ဂဟေတွာ ယေ တေ သမဏဗြာဟ္မဏာ သံဃိနော ဂဏိနော ဂဏာစရိယာ ဉာတာ ယသဿိနော တိတ္ထကရာ သာဓုသမ္မတာ ဗဟုဇနဿ၊ သေယျထိဒံ – ပူရဏော ကဿပေါ မက္ခလိဂေါသာလော အဇိတော ကေသကမ္ဗလော ပကုဓော [ကကုဓော (သီ.) ပကုဒ္ဓေါ (သျာ. ကံ.)] ကစ္စာနော သဉ္စယော [သဉ္ဇယော (သီ. သျာ. ကံ. ပီ.)] ဗေလဋ္ဌပုတ္တော [ဗေလ္လဋ္ဌိပုတ္တော (သီ. ပီ.)၊ ဝေဠဋ္ဌပုတ္တော (သျာ.)] နိဂဏ္ဌော နာဋပုတ္တော [နာတပုတ္တော (သီ. ပီ.)]၊ တေ ဥပသင်္ကမိတွာ တေ ပဉှေ ပုစ္ဆတိ. တေ သဘိယေန ပရိဗ္ဗာဇကေန ပဉှေ ပုဋ္ဌာ န သမ္ပာယန္တိ၊ အသမ္ပာယန္တာ ကောပဉ္စ ဒေါသဉ္စ အပ္ပစ္စယဉ္စ ပါတုကရောန္တိ. အပိ စ သဘိယံ ယေဝ ပရိဗ္ဗာဇကံ ပဋိပုစ္ဆန္တိ.

အထ ခေါ သဘိယဿ ပရိဗ္ဗာဇကဿ ဧတဒဟောသိ – ‘‘ယေ ခေါ တေ ဘောန္တော သမဏဗြာဟ္မဏာ သံဃိနော ဂဏိနော ဂဏာစရိယာ ဉာတာ ယသဿိနော တိတ္ထကရာ သာဓုသမ္မတာ ဗဟုဇနဿ၊ သေယျထိဒံ – ပူရဏော ကဿပေါ။ပေ။ နိဂဏ္ဌော နာဋပုတ္တော၊ တေ မယာ ပဉှေ ပုဋ္ဌာ န သမ္ပာယန္တိ၊ အသမ္ပာယန္တာ ကောပဉ္စ ဒေါသဉ္စ အပ္ပစ္စယဉ္စ ပါတုကရောန္တိ၊ အပိ စ မညေဝေတ္ထ ပဋိပုစ္ဆန္တိ. ယန္နူန္နာဟံ ဟီနာယာဝတ္တိတွာ ကာမေ ပရိဘုဉ္ဇေယျ’’န္တိ.

အထ ခေါ သဘိယဿ ပရိဗ္ဗာဇကဿ ဧတဒဟောသိ – ‘‘အယမ္ပိ ခေါ သမဏော ဂေါတမော သံဃီ စေဝ ဂဏီ စ ဂဏာစရိယော စ ဉာတော ယသဿီ တိတ္ထကရော သာဓုသမ္မတော ဗဟုဇနဿ၊ ယံနူနာဟံ သမဏံ ဂေါတမံ ဥပသင်္ကမိတွာ ဣမေ ပဉှေ ပုစ္ဆေယျ’’န္တိ.

အထ ခေါ သဘိယဿ ပရိဗ္ဗာဇကဿ ဧတဒဟောသိ – ‘‘ယေပိ ခေါ တေ [ယေ ခေါ တေ (သျာ.)၊ ယံ ခေါ တေ (က.)] ဘောန္တော သမဏဗြာဟ္မဏာ ဇိဏ္ဏာ ဝုဍ္ဎာ မဟလ္လကာ အဒ္ဓဂတာ ဝယောအနုပ္ပတ္တာ ထေရာ ရတ္တညူ စိရပဗ္ဗဇိတာ သံဃိနော ဂဏိနော ဂဏာစရိယာ ဉာတာ ယသဿိနော တိတ္ထကရာ သာဓုသမ္မတာ ဗဟုဇနဿ၊ သေယျထိဒံ – ပူရဏော ကဿပေါ။ပေ. ။ နိဂဏ္ဌော နာဋပုတ္တော၊ တေပိ မယာ ပဉှေ ပုဋ္ဌာ န သမ္ပာယန္တိ၊ အသမ္ပာယန္တာ ကောပဉ္စ ဒေါသဉ္စ အပ္ပစ္စယဉ္စ ပါတုကရောန္တိ၊ အပိ စ မညေဝေတ္ထ ပဋိပုစ္ဆန္တိ၊ ကိံ ပန မေ သမဏော ဂေါတမော ဣမေ ပဉှေ ပုဋ္ဌော ဗျာကရိဿတိ! သမဏော ဟိ ဂေါတမော ဒဟရော စေဝ ဇာတိယာ၊ နဝေါ စ ပဗ္ဗဇ္ဇာယာ’’တိ.

အထ ခေါ သဘိယဿ ပရိဗ္ဗာဇကဿ ဧတဒဟောသိ – ‘‘သမဏော ခေါ [သမဏော ခေါ ဂေါတမော (သျာ. က.)] ဒဟရောတိ န ဥညာတဗ္ဗော န ပရိဘောတဗ္ဗော. ဒဟရောပိ စေသ သမဏော ဂေါတမော မဟိဒ္ဓိကော ဟောတိ မဟာနုဘာဝေါ၊ ယံနူနာဟံ သမဏံ ဂေါတမံ ဥပသင်္ကမိတွာ ဣမေ ပဉှေ ပုစ္ဆေယျ’’န္တိ.

အထ ခေါ သဘိယော ပရိဗ္ဗာဇကော ယေန ရာဇဂဟံ တေန စာရိကံ ပက္ကာမိ. အနုပုဗ္ဗေန စာရိကံ စရမာနော ယေန ရာဇဂဟံ ဝေဠုဝနံ ကလန္ဒကနိဝါပေါ၊ ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝတာ သဒ္ဓိံ သမ္မောဒိ. သမ္မောဒနီယံ ကထံ သာရဏီယံ ဝီတိသာရေတွာ ဧကမန္တံ နိသီဒိ. ဧကမန္တံ နိသိန္နော ခေါ သဘိယော ပရိဗ္ဗာဇကော ဘဂဝန္တံ ဂါထာယ အဇ္ဈဘာသိ –

၅၁၅. ‘‘ကင်္ခီ ဝေစိကိစ္ဆီ အာဂမံ၊ (ဣတိ သဘိယော)

ပဉှေ ပုစ္ဆိတုံ အဘိကင်္ခမာနော၊

တေသန္တကရော ဘဝါဟိ [ဘဝါဟိ မေ (ပီ. က.)] ပဉှေ မေ ပုဋ္ဌော၊

အနုပုဗ္ဗံ အနုဓမ္မံ ဗျာကရောဟိ မေ’’.

၅၁၆. ‘‘ဒူရတော အာဂတောသိ သဘိယ၊ (ဣတိ ဘဂဝါ)

ပဉှေ ပုစ္ဆိတုံ အဘိကင်္ခမာနော၊

တေသန္တကရော ဘဝါမိ [တေသမန္တကရောမိ တေ (က.)] ပဉှေ တေ ပုဋ္ဌော၊

အနုပုဗ္ဗံ အနုဓမ္မံ ဗျာကရောမိ တေ.

၅၁၇. ‘‘ပုစ္ဆ မံ သဘိယ ပဉှံ၊ ယံ ကိဉ္စိ မနသိစ္ဆသိ၊

တဿ တဿေဝ ပဉှဿ၊ အဟံ အန္တံ ကရောမိ တေ’’တိ.

အထ ခေါ သဘိယဿ ပရိဗ္ဗာဇကဿ ဧတဒဟောသိ – ‘‘အစ္ဆရိယံ ဝတ၊ ဘော၊ အဗ္ဘုတံ ဝတ၊ ဘော! ယံ ဝတာဟံ အညေသု သမဏဗြာဟ္မဏေသု ဩကာသကမ္မမတ္တမ္ပိ [ဩကာသမတ္တမ္ပိ (သီ. ပီ.)] နာလတ္ထံ တံ မေ ဣဒံ သမဏေန ဂေါတမေန ဩကာသကမ္မံ ကတ’’န္တိ. အတ္တမနော ပမုဒိတော ဥဒဂ္ဂေါ ပီတိသောမနဿဇာတော ဘဂဝန္တံ ပဉှံ အပုစ္ဆိ –

၅၁၈. ‘‘ကိံ ပတ္တိနမာဟု ဘိက္ခုနံ၊ (ဣတိ သဘိယော)

သောရတံ ကေန ကထဉ္စ ဒန္တမာဟု၊

ဗုဒ္ဓေါတိ ကထံ ပဝုစ္စတိ၊

ပုဋ္ဌော မေ ဘဂဝါ ဗျာကရောဟိ’’.

၅၁၉. ‘‘ပဇ္ဇေန ကတေန အတ္တနာ၊ (သဘိယာတိ ဘဂဝါ)

ပရိနိဗ္ဗာနဂတော ဝိတိဏ္ဏကင်္ခေါ၊

ဝိဘဝဉ္စ ဘဝဉ္စ ဝိပ္ပဟာယ၊

ဝုသိတဝါ ခီဏပုနဗ္ဘဝေါ သ ဘိက္ခု.

၅၂၀. ‘‘သဗ္ဗတ္ထ ဥပေက္ခကော သတိမာ၊ န သော ဟိံသတိ ကဉ္စိ သဗ္ဗလောကေ၊

တိဏ္ဏော သမဏော အနာဝိလော၊ ဥဿဒါ ယဿ န သန္တိ သောရတော သော.

၅၂၁. ‘‘ယဿိန္ဒြိယာနိ ဘာဝိတာနိ၊ အဇ္ဈတ္တံ ဗဟိဒ္ဓါ စ သဗ္ဗလောကေ၊

နိဗ္ဗိဇ္ဈ ဣမံ ပရဉ္စ လောကံ၊ ကာလံ ကင်္ခတိ ဘာဝိတော သ ဒန္တော.

၅၂၂. ‘‘ကပ္ပါနိ ဝိစေယျ ကေဝလာနိ၊ သံသာရံ ဒုဘယံ စုတူပပါတံ၊

ဝိဂတရဇမနင်္ဂဏံ ဝိသုဒ္ဓံ၊ ပတ္တံ ဇာတိခယံ တမာဟု ဗုဒ္ဓ’’န္တိ.

အထ ခေါ သဘိယော ပရိဗ္ဗာဇကော ဘဂဝတော ဘာသိတံ အဘိနန္ဒိတွာ အနုမောဒိတွာ အတ္တမနော ပမုဒိတော ဥဒဂ္ဂေါ ပီတိသောမနဿဇာတော ဘဂဝန္တံ ဥတ္တရိံ [ဥတ္တရိ (က.)] ပဉှံ အပုစ္ဆိ –

၅၂၃. ‘‘ကိံ ပတ္တိနမာဟု ဗြာဟ္မဏံ၊ (ဣတိ သဘိယော)

သမဏံ ကေန ကထဉ္စ နှာတကောတိ၊

နာဂေါတိ ကထံ ပဝုစ္စတိ၊

ပုဋ္ဌော မေ ဘဂဝါ ဗျာကရောဟိ’’.

၅၂၄. ‘‘ဗာဟိတွာ သဗ္ဗပါပကာနိ၊ (သဘိယာတိ ဘဂဝါ)

ဝိမလော သာဓုသမာဟိတော ဌိတတ္တော၊

သံသာရမတိစ္စ ကေဝလီ သော၊

အသိတော တာဒိ ပဝုစ္စတေ သ ဗြဟ္မာ.

၅၂၅. ‘‘သမိတာဝိ ပဟာယ ပုညပါပံ၊ ဝိရဇော ဉတွာ ဣမံ ပရဉ္စ လောကံ၊

ဇာတိမရဏံ ဥပါတိဝတ္တော၊ သမဏော တာဒိ ပဝုစ္စတေ တထတ္တာ.

၅၂၆. ‘‘နိနှာယ [နိနဟာယ (သျာ.)] သဗ္ဗပါပကာနိ၊ အဇ္ဈတ္တံ ဗဟိဒ္ဓါ စ သဗ္ဗလောကေ၊

ဒေဝမနုဿေသု ကပ္ပိယေသု၊ ကပ္ပံ နေတိ တမာဟု နှာတကော’’တိ.

၅၂၇. ‘‘အာဂုံ န ကရောတိ ကိဉ္စိ လောကေ၊ သဗ္ဗသံယောဂေ [သဗ္ဗယောဂေ (က.)] ဝိသဇ္ဇ ဗန္ဓနာနိ၊

သဗ္ဗတ္ထ န သဇ္ဇတီ ဝိမုတ္တော၊ နာဂေါ တာဒိ ပဝုစ္စတေ တထတ္တာ’’တိ.

အထ ခေါ သဘိယော ပရိဗ္ဗာဇကော။ပေ။ ဘဂဝန္တံ ဥတ္တရိံ ပဉှံ အပုစ္ဆိ –

၅၂၈. ‘‘ကံ ခေတ္တဇိနံ ဝဒန္တိ ဗုဒ္ဓါ၊ (ဣတိ သဘိယော)

ကုသလံ ကေန ကထဉ္စ ပဏ္ဍိတောတိ၊

မုနိ နာမ ကထံ ပဝုစ္စတိ၊

ပုဋ္ဌော မေ ဘဂဝါ ဗျာကရောဟိ’’.

၅၂၉. ‘‘ခေတ္တာနိ ဝိစေယျ ကေဝလာနိ၊ (သဘိယာတိ ဘဂဝါ)

ဒိဗ္ဗံ မာနုသကဉ္စ ဗြဟ္မခေတ္တံ၊

သဗ္ဗခေတ္တမူလဗန္ဓနာ ပမုတ္တော၊

ခေတ္တဇိနော တာဒိ ပဝုစ္စတေ တထတ္တာ.

၅၃၀. ‘‘ကောသာနိ ဝိစေယျ ကေဝလာနိ၊ ဒိဗ္ဗံ မာနုသကဉ္စ ဗြဟ္မကောသံ၊

သဗ္ဗကောသမူလဗန္ဓနာ ပမုတ္တော၊ ကုသလော တာဒိ ပဝုစ္စတေ တထတ္တာ.

၅၃၁. ‘‘ဒုဘယာနိ ဝိစေယျ ပဏ္ဍရာနိ၊ အဇ္ဈတ္တံ ဗဟိဒ္ဓါ စ သုဒ္ဓိပညော၊

ကဏှံ သုက္ကံ ဥပါတိဝတ္တော၊ ပဏ္ဍိတော တာဒိ ပဝုစ္စတေ တထတ္တာ.

၅၃၂. ‘‘အသတဉ္စ သတဉ္စ ဉတွာ ဓမ္မံ၊ အဇ္ဈတ္တံ ဗဟိဒ္ဓါ စ သဗ္ဗလောကေ၊

ဒေဝမနုဿေဟိ ပူဇနီယော၊ သင်္ဂံ ဇာလမတိစ္စ သော မုနီ’’တိ.

အထ ခေါ သဘိယော ပရိဗ္ဗာဇကော။ပေ။ ဘဂဝန္တံ ဥတ္တရိံ ပဉှံ အပုစ္ဆိ –

၅၃၃. ‘‘ကိံ ပတ္တိနမာဟု ဝေဒဂုံ၊ (ဣတိ သဘိယော)

အနုဝိဒိတံ ကေန ကထဉ္စ ဝီရိယဝါတိ၊

အာဇာနိယော ကိန္တိ နာမ ဟောတိ၊

ပုဋ္ဌော မေ ဘဂဝါ ဗျာကရောဟိ’’.

၅၃၄. ‘‘ဝေဒါနိ ဝိစေယျ ကေဝလာနိ၊ (သဘိယာတိ ဘဂဝါ)

သမဏာနံ ယာနိဓတ္ထိ [ယာနိပတ္ထိ (သီ. သျာ. ပီ.)] ဗြာဟ္မဏာနံ၊

သဗ္ဗဝေဒနာသု ဝီတရာဂေါ၊

သဗ္ဗံ ဝေဒမတိစ္စ ဝေဒဂူ သော.

၅၃၅. ‘‘အနုဝိစ္စ ပပဉ္စနာမရူပံ၊ အဇ္ဈတ္တံ ဗဟိဒ္ဓါ စ ရောဂမူလံ၊

သဗ္ဗရောဂမူလဗန္ဓနာ ပမုတ္တော၊ အနုဝိဒိတော တာဒိ ပဝုစ္စတေ တထတ္တာ.

၅၃၆. ‘‘ဝိရတော ဣဓ သဗ္ဗပါပကေဟိ၊ နိရယဒုက္ခံ အတိစ္စ ဝီရိယဝါ သော၊

သော ဝီရိယဝါ ပဓာနဝါ၊ ဓီရော တာဒိ ပဝုစ္စတေ တထတ္တာ.

၅၃၇. ‘‘ယဿဿု လုနာနိ ဗန္ဓနာနိ၊ အဇ္ဈတ္တံ ဗဟိဒ္ဓါ စ သင်္ဂမူလံ၊

သဗ္ဗသင်္ဂမူလဗန္ဓနာ ပမုတ္တော၊ အာဇာနိယော တာဒိ ပဝုစ္စတေ တထတ္တာ’’တိ.

အထ ခေါ သဘိယော ပရိဗ္ဗာဇကော။ပေ။ ဘဂဝန္တံ ဥတ္တရိံ ပဉှံ အပုစ္ဆိ –

၅၃၈. ‘‘ကိံ ပတ္တိနမာဟု သောတ္တိယံ၊ (ဣတိ သဘိယော)

အရိယံ ကေန ကထဉ္စ စရဏဝါတိ၊

ပရိဗ္ဗာဇကော ကိန္တိ နာမ ဟောတိ၊

ပုဋ္ဌော မေ ဘဂဝါ ဗျာကရောဟိ’’.

၅၃၉. ‘‘သုတွာ သဗ္ဗဓမ္မံ အဘိညာယ လောကေ၊ (သဘိယာတိ ဘဂဝါ)

သာဝဇ္ဇာနဝဇ္ဇံ ယဒတ္ထိ ကိဉ္စိ၊

အဘိဘုံ အကထံကထိံ ဝိမုတ္တံ၊

အနိဃံ သဗ္ဗဓိမာဟု သောတ္တိယောတိ.

၅၄၀. ‘‘ဆေတွာ အာသဝါနိ အာလယာနိ၊ ဝိဒွါ သော န ဥပေတိ ဂဗ္ဘသေယျံ၊

သညံ တိဝိဓံ ပနုဇ္ဇ ပင်္ကံ၊ ကပ္ပံ နေတိ တမာဟု အရိယောတိ.

၅၄၁. ‘‘ယော ဣဓ စရဏေသု ပတ္တိပတ္တော၊ ကုသလော သဗ္ဗဒါ အာဇာနာတိ [အာဇာနိ (သျာ.)] ဓမ္မံ၊

သဗ္ဗတ္ထ န သဇ္ဇတိ ဝိမုတ္တစိတ္တော [ဝိမုတ္တော (သီ.)]၊ ပဋိဃာ ယဿ န သန္တိ စရဏဝါ သော.

၅၄၂. ‘‘ဒုက္ခဝေပက္ကံ ယဒတ္ထိ ကမ္မံ၊ ဥဒ္ဓမဓော တိရိယံ ဝါပိ [တိရိယဉ္စာပိ (သျာ.)] မဇ္ဈေ၊

ပရိဗ္ဗာဇယိတွာ ပရိညစာရီ၊ မာယံ မာနမထောပိ လောဘကောဓံ၊

ပရိယန္တမကာသိ နာမရူပံ၊ တံ ပရိဗ္ဗာဇကမာဟု ပတ္တိပတ္တ’’န္တိ.

အထ ခေါ သဘိယော ပရိဗ္ဗာဇကော ဘဂဝတော ဘာသိတံ အဘိနန္ဒိတွာ အနုမောဒိတွာ အတ္တမနော ပမုဒိတော ဥဒဂ္ဂေါ ပီတိသောမနဿဇာတော ဥဋ္ဌာယာသနာ ဧကံသံ ဥတ္တရာသင်္ဂံ ကရိတွာ ယေန ဘဂဝါ တေနဉ္ဇလိံ ပဏာမေတွာ ဘဂဝန္တံ သမ္မုခါ သာရုပ္ပါဟိ ဂါထာဟိ အဘိတ္ထဝိ –

၅၄၃. ‘‘ယာနိ စ တီဏိ ယာနိ စ သဋ္ဌိ၊ သမဏပ္ပဝါဒသိတာနိ [သမဏပ္ပဝါဒနိဿိတာနိ (သျာ. က.)] ဘူရိပည၊

သညက္ခရသညနိဿိတာနိ၊ ဩသရဏာနိ ဝိနေယျ ဩဃတမဂါ.

၅၄၄. ‘‘အန္တဂူသိ ပါရဂူ [ပါရဂူသိ (သျာ. ပီ. က.)] ဒုက္ခဿ၊ အရဟာသိ သမ္မာသမ္ဗုဒ္ဓေါ ခီဏာသဝံ တံ မညေ၊

ဇုတိမာ မုတိမာ ပဟူတပညော၊ ဒုက္ခဿန္တကရံ အတာရေသိ မံ.

၅၄၅. ‘‘ယံ မေ ကင်္ခိတမညာသိ၊ ဝိစိကိစ္ဆာ မံ တာရယိ နမော တေ၊

မုနိ မောနပထေသု ပတ္တိပတ္တ၊ အခိလ အာဒိစ္စဗန္ဓု သောရတောသိ.

၅၄၆. ‘‘ယာ မေ ကင်္ခါ ပုရေ အာသိ၊ တံ မေ ဗျာကာသိ စက္ခုမာ၊

အဒ္ဓါ မုနီသိ သမ္ဗုဒ္ဓေါ၊ နတ္ထိ နီဝရဏာ တဝ.

၅၄၇. ‘‘ဥပါယာသာ စ တေ သဗ္ဗေ၊ ဝိဒ္ဓသ္တာ ဝိနဠီကတာ၊

သီတိဘူတော ဒမပ္ပတ္တော၊ ဓိတိမာ သစ္စနိက္ကမော.

၅၄၈. ‘‘တဿ တေ နာဂနာဂဿ၊ မဟာဝီရဿ ဘာသတော၊

သဗ္ဗေ ဒေဝါနုမောဒန္တိ၊ ဥဘော နာရဒပဗ္ဗတာ.

၅၄၉. ‘‘နမော တေ ပုရိသာဇည၊ နမော တေ ပုရိသုတ္တမ၊

သဒေဝကသ္မိံ လောကသ္မိံ၊ နတ္ထိ တေ ပဋိပုဂ္ဂလော.

၅၅၀. ‘‘တုဝံ ဗုဒ္ဓေါ တုဝံ သတ္ထာ၊ တုဝံ မာရာဘိဘူ မုနိ၊

တုဝံ အနုသယေ ဆေတွာ၊ တိဏ္ဏော တာရေသိ မံ ပဇံ.

၅၅၁. ‘‘ဥပဓီ တေ သမတိက္ကန္တာ၊ အာသဝါ တေ ပဒါလိတာ၊

သီဟောသိ အနုပါဒါနော၊ ပဟီနဘယဘေရဝေါ.

၅၅၂. ‘‘ပုဏ္ဍရီကံ ယထာ ဝဂ္ဂု၊ တောယေ န ဥပလိမ္ပတိ [တောယေန န ဥပလိပ္ပတိ (သီ.)၊ တောယေ န ဥပလိပ္ပတိ (ပီ.)၊ တောယေန န ဥပလိမ္ပတိ (က.)]၊

ဧဝံ ပုညေ စ ပါပေ စ၊ ဥဘယေ တွံ န လိမ္ပသိ၊

ပါဒေ ဝီရ ပသာရေဟိ၊ သဘိယော ဝန္ဒတိ သတ္ထုနော’’တိ.

အထ ခေါ သဘိယော ပရိဗ္ဗာဇကော ဘဂဝတော ပါဒေသု သိရသာ နိပတိတွာ ဘဂဝန္တံ ဧတဒဝေါစ – ‘‘အဘိက္ကန္တံ၊ ဘန္တေ။ပေ။ ဧသာဟံ ဘဂဝန္တံ သရဏံ ဂစ္ဆာမိ ဓမ္မဉ္စ ဘိက္ခုသံဃဉ္စ၊ လဘေယျာဟံ၊ ဘန္တေ၊ ဘဂဝတော သန္တိကေ ပဗ္ဗဇ္ဇံ၊ လဘေယျံ ဥပသမ္ပဒ’’န္တိ.

‘‘ယော ခေါ၊ သဘိယ၊ အညတိတ္ထိယပုဗ္ဗော ဣမသ္မိံ ဓမ္မဝိနယေ အာကင်္ခတိ ပဗ္ဗဇ္ဇံ၊ အာကင်္ခတိ ဥပသမ္ပဒံ၊ သော စတ္တာရော မာသေ ပရိဝသတိ၊ စတုန္နံ မာသာနံ အစ္စယေန အာရဒ္ဓစိတ္တာ ဘိက္ခူ ပဗ္ဗာဇေန္တိ၊ ဥပသမ္ပာဒေန္တိ ဘိက္ခုဘာဝါယ. အပိ စ မေတ္ထ ပုဂ္ဂလဝေမတ္တတာ ဝိဒိတာ’’တိ.

‘‘သစေ၊ ဘန္တေ၊ အညတိတ္ထိယပုဗ္ဗာ ဣမသ္မိံ ဓမ္မဝိနယေ အာကင်္ခန္တာ ပဗ္ဗဇ္ဇံ၊ အာကင်္ခန္တာ ဥပသမ္ပဒံ စတ္တာရော မာသေ ပရိဝသန္တိ၊ စတုန္နံ မာသာနံ အစ္စယေန အာရဒ္ဓစိတ္တာ ဘိက္ခူ ပဗ္ဗာဇေန္တိ၊ ဥပသမ္ပာဒေန္တိ ဘိက္ခုဘာဝါယ၊ အဟံ စတ္တာရိ ဝဿာနိ ပရိဝသိဿာမိ၊ စတုန္နံ ဝဿာနံ အစ္စယေန အာရဒ္ဓစိတ္တာ ဘိက္ခူ ပဗ္ဗာဇေန္တု ဥပသမ္ပာဒေန္တု ဘိက္ခုဘာဝါယာ’’တိ. အလတ္ထ ခေါ သဘိယော ပရိဗ္ဗာဇကော ဘဂဝတော သန္တိကေ ပဗ္ဗဇ္ဇံ အလတ္ထ ဥပသမ္ပဒံ။ပေ။ အညတရော ခေါ ပနာယသ္မာ သဘိယော အရဟတံ အဟောသီတိ.

သဘိယသုတ္တံ ဆဋ္ဌံ နိဋ္ဌိတံ.