၇. ဗြာဟ္မဏဓမ္မိကသုတ္တံ
ဧဝံ မေ သုတံ – ဧကံ သမယံ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. အထ ခေါ သမ္ဗဟုလာ ကောသလကာ ဗြာဟ္မဏမဟာသာလာ ဇိဏ္ဏာ ဝုဍ္ဎာ မဟလ္လကာ အဒ္ဓဂတာ ဝယောအနုပ္ပတ္တာ ယေန ဘဂဝါ တေနုပသင်္ကမိံသု၊ ဥပသင်္ကမိတွာ ဘဂဝတာ သဒ္ဓိံ သမ္မောဒိံသု. သမ္မောဒနီယံ ကထံ သာရဏီယံ ဝီတိသာရေတွာ ဧကမန္တံ နိသီဒိံသု. ဧကမန္တံ နိသိန္နာ ခေါ တေ ဗြာဟ္မဏမဟာသာလာ ဘဂဝန္တံ ဧတဒဝေါစုံ – ‘‘သန္ဒိဿန္တိ နု ခေါ၊ ဘော ဂေါတမ၊ ဧတရဟိ ဗြာဟ္မဏာ ပေါရာဏာနံ ဗြာဟ္မဏာနံ ဗြာဟ္မဏဓမ္မေ’’တိ? ‘‘န ခေါ၊ ဗြာဟ္မဏာ၊ သန္ဒိဿန္တိ ဧတရဟိ ဗြာဟ္မဏာ ပေါရာဏာနံ ဗြာဟ္မဏာနံ ဗြာဟ္မဏဓမ္မေ’’တိ. ‘‘သာဓု နော ဘဝံ ဂေါတမော ပေါရာဏာနံ ဗြာဟ္မဏာနံ ဗြာဟ္မဏဓမ္မံ ဘာသတု၊ သစေ ဘောတော ဂေါတမဿ အဂရူ’’တိ. ‘‘တေန ဟိ၊ ဗြာဟ္မဏာ၊ သုဏာထ၊ သာဓုကံ မနသိ ကရောထ၊ ဘာသိဿာမီ’’တိ. ‘‘ဧဝံ၊ ဘော’’တိ ခေါ တေ ဗြာဟ္မဏမဟာသာလာ ဘဂဝတော ပစ္စဿောသုံ. ဘဂဝါ ဧတဒဝေါစ –
၂၈၆. ‘‘ဣသယော ပုဗ္ဗကာ အာသုံ၊ သညတတ္တာ တပဿိနော၊
ပဉ္စ ကာမဂုဏေ ဟိတွာ၊ အတ္တဒတ္ထမစာရိသုံ.
၂၈၇. ‘‘န ပသူ ဗြာဟ္မဏာနာသုံ၊ န ဟိရညံ န ဓာနိယံ၊
သဇ္ဈာယဓနဓညာသုံ၊ ဗြဟ္မံ နိဓိမပါလယုံ.
၂၈၈. ‘‘ယံ နေသံ ပကတံ အာသိ၊ ဒွါရဘတ္တံ ဥပဋ္ဌိတံ၊
သဒ္ဓါပကတမေသာနံ၊ ဒါတဝေ တဒမညိသုံ.
၂၈၉. ‘‘နာနာရတ္တေဟိ ဝတ္ထေဟိ၊ သယနေဟာဝသထေဟိ စ၊
ဖီတာ ဇနပဒါ ရဋ္ဌာ၊ တေ နမဿိံသု ဗြာဟ္မဏေ.
၂၉၀. ‘‘အဝဇ္ဈာ ဗြာဟ္မဏာ အာသုံ၊ အဇေယျာ ဓမ္မရက္ခိတာ၊
န နေ ကောစိ နိဝါရေသိ၊ ကုလဒွါရေသု သဗ္ဗသော.
၂၉၁. ‘‘အဋ္ဌစတ္တာလီသံ ဝဿာနိ၊ (ကောမာရ) ဗြဟ္မစရိယံ စရိံသု တေ၊
ဝိဇ္ဇာစရဏပရိယေဋ္ဌိံ၊ အစရုံ ဗြာဟ္မဏာ ပုရေ.
၂၉၂. ‘‘န ဗြာဟ္မဏာ အညမဂမုံ၊ နပိ ဘရိယံ ကိဏိံသု တေ၊
သမ္ပိယေနေဝ သံဝါသံ၊ သင်္ဂန္တွာ သမရောစယုံ.
၂၉၃. ‘‘အညတြ တမှာ သမယာ၊ ဥတုဝေရမဏိံ ပတိ၊
အန္တရာ မေထုနံ ဓမ္မံ၊ နာဿု ဂစ္ဆန္တိ ဗြာဟ္မဏာ.
၂၉၄. ‘‘ဗြဟ္မစရိယဉ္စ သီလဉ္စ၊ အဇ္ဇဝံ မဒ္ဒဝံ တပံ၊
သောရစ္စံ အဝိဟိံသဉ္စ၊ ခန္တိဉ္စာပိ အဝဏ္ဏယုံ.
၂၉၅. ‘‘ယော နေသံ ပရမော အာသိ၊ ဗြဟ္မာ ဒဠှပရက္ကမော၊
သ ဝါပိ မေထုနံ ဓမ္မံ၊ သုပိနန္တေပိ နာဂမာ.
၂၉၆. ‘‘တဿ ဝတ္တမနုသိက္ခန္တာ၊ ဣဓေကေ ဝိညုဇာတိကာ၊
ဗြဟ္မစရိယဉ္စ သီလဉ္စ၊ ခန္တိဉ္စာပိ အဝဏ္ဏယုံ.
၂၉၇. ‘‘တဏ္ဍုလံ သယနံ ဝတ္ထံ၊ သပ္ပိတေလဉ္စ ယာစိယ၊
ဓမ္မေန သမောဓာနေတွာ၊ တတော ယညမကပ္ပယုံ.
၂၉၈. ‘‘ဥပဋ္ဌိတသ္မိံ ယညသ္မိံ၊ နာဿု ဂါဝေါ ဟနိံသု တေ၊
ယထာ မာတာ ပိတာ ဘာတာ၊ အညေ ဝါပိ စ ဉာတကာ၊
ဂါဝေါ နော ပရမာ မိတ္တာ၊ ယာသု ဇာယန္တိ ဩသဓာ.
၂၉၉. ‘‘အန္နဒါ ဗလဒါ စေတာ၊ ဝဏ္ဏဒါ သုခဒါ တထာ [သုခဒါ စ တာ (က.)]၊
ဧတမတ္ထဝသံ ဉတွာ၊ နာဿု ဂါဝေါ ဟနိံသု တေ.
၃၀၀. ‘‘သုခုမာလာ မဟာကာယာ၊ ဝဏ္ဏဝန္တော ယသဿိနော၊
ဗြာဟ္မဏာ သေဟိ ဓမ္မေဟိ၊ ကိစ္စာကိစ္စေသု ဥဿုကာ၊
ယာဝ လောကေ အဝတ္တိံသု၊ သုခမေဓိတ္ထယံ ပဇာ.
၃၀၁. ‘‘တေသံ အာသိ ဝိပလ္လာသော၊ ဒိသွာန အဏုတော အဏုံ၊
ရာဇိနော စ ဝိယာကာရံ၊ နာရိယော သမလင်္ကတာ.
၃၀၂. ‘‘ရထေ စာဇညသံယုတ္တေ၊ သုကတေ စိတ္တသိဗ္ဗနေ၊
နိဝေသနေ နိဝေသေ စ၊ ဝိဘတ္တေ ဘာဂသော မိတေ.
၃၀၃. ‘‘ဂေါမဏ္ဍလပရိဗျူဠှံ၊ နာရီဝရဂဏာယုတံ၊
ဥဠာရံ မာနုသံ ဘောဂံ၊ အဘိဇ္ဈာယိံသု ဗြာဟ္မဏာ.
၃၀၄. ‘‘တေ တတ္ထ မန္တေ ဂန္ထေတွာ၊ ဩက္ကာကံ တဒုပါဂမုံ၊
ပဟူတဓနဓညောသိ၊ ယဇဿု ဗဟု တေ ဝိတ္တံ၊
ယဇဿု ဗဟု တေ ဓနံ.
၃၀၅. ‘‘တတော စ ရာဇာ သညတ္တော၊ ဗြာဟ္မဏေဟိ ရထေသဘော၊
အဿမေဓံ ပုရိသမေဓံ၊ သမ္မာပါသံ ဝါဇပေယျံ နိရဂ္ဂဠံ၊
ဧတေ ယာဂေ ယဇိတွာန၊ ဗြာဟ္မဏာနမဒါ ဓနံ.
၃၀၆. ‘‘ဂါဝေါ သယနဉ္စ ဝတ္ထဉ္စ၊ နာရိယော သမလင်္ကတာ၊
ရထေ စာဇညသံယုတ္တေ၊ သုကတေ စိတ္တသိဗ္ဗနေ.
၃၀၇. ‘‘နိဝေသနာနိ ရမ္မာနိ၊ သုဝိဘတ္တာနိ ဘာဂသော၊
နာနာဓညဿ ပူရေတွာ၊ ဗြာဟ္မဏာနမဒါ ဓနံ.
၃၀၈. ‘‘တေ စ တတ္ထ ဓနံ လဒ္ဓါ၊ သန္နိဓိံ သမရောစယုံ၊
တေသံ ဣစ္ဆာဝတိဏ္ဏာနံ၊ ဘိယျော တဏှာ ပဝဍ္ဎထ၊
တေ တတ္ထ မန္တေ ဂန္ထေတွာ၊ ဩက္ကာကံ ပုနမုပါဂမုံ.
၃၀၉. ‘‘ယထာ အာပေါ စ ပထဝီ စ၊ ဟိရညံ ဓနဓာနိယံ၊
ဧဝံ ဂါဝေါ မနုဿာနံ၊ ပရိက္ခာရော သော ဟိ ပါဏိနံ၊
ယဇဿု ဗဟု တေ ဝိတ္တံ၊ ယဇဿု ဗဟု တေ ဓနံ.
၃၁၀. ‘‘တတော စ ရာဇာ သညတ္တော၊ ဗြာဟ္မဏေဟိ ရထေသဘော၊
နေကာ သတသဟဿိယော၊ ဂါဝေါ ယညေ အဃာတယိ.
၃၁၁. ‘‘န ပါဒါ န ဝိသာဏေန၊ နာဿု ဟိံသန္တိ ကေနစိ၊
ဂါဝေါ ဧဠကသမာနာ၊ သောရတာ ကုမ္ဘဒူဟနာ၊
တာ ဝိသာဏေ ဂဟေတွာန၊ ရာဇာ သတ္ထေန ဃာတယိ.
၃၁၂. ‘‘တတော ဒေဝါ ပိတရော စ [တတော စ ဒေဝါ ပိတရော (သီ. သျာ.)]၊ ဣန္ဒော အသုရရက္ခသာ၊
အဓမ္မော ဣတိ ပက္ကန္ဒုံ၊ ယံ သတ္ထံ နိပတီ ဂဝေ.
၃၁၃. ‘‘တယော ရောဂါ ပုရေ အာသုံ၊ ဣစ္ဆာ အနသနံ ဇရာ၊
ပသူနဉ္စ သမာရမ္ဘာ၊ အဋ္ဌာနဝုတိမာဂမုံ.
၃၁၄. ‘‘ဧသော အဓမ္မော ဒဏ္ဍာနံ၊ ဩက္ကန္တော ပုရာဏော အဟု၊
အဒူသိကာယော ဟညန္တိ၊ ဓမ္မာ ဓံသန္တိ [ဓံသေန္တိ (သီ. ပီ.)] ယာဇကာ.
၃၁၅. ‘‘ဧဝမေသော အဏုဓမ္မော၊ ပေါရာဏော ဝိညုဂရဟိတော၊
ယတ္ထ ဧဒိသကံ ပဿတိ၊ ယာဇကံ ဂရဟတီ [ဂရဟီ (က.)] ဇနော.
၃၁၆. ‘‘ဧဝံ ဓမ္မေ ဝိယာပန္နေ၊ ဝိဘိန္နာ သုဒ္ဒဝေဿိကာ၊
ပုထူ ဝိဘိန္နာ ခတ္တိယာ၊ ပတိံ ဘရိယာဝမညထ.
၃၁၇. ‘‘ခတ္တိယာ ဗြဟ္မဗန္ဓူ စ၊ ယေ စညေ ဂေါတ္တရက္ခိတာ၊
ဇာတိဝါဒံ နိရံကတွာ [နိရာကတွာ (?) ယထာ အနိရာကတဇ္ဈာနောတိ]၊ ကာမာနံ ဝသမနွဂု’’န္တိ.
ဧဝံ ဝုတ္တေ၊ တေ ဗြာဟ္မဏမဟာသာလာ ဘဂဝန္တံ ဧတဒဝေါစုံ – ‘‘အဘိက္ကန္တံ၊ ဘော ဂေါတမ။ပေ. ။ ဥပါသကေ နော ဘဝံ ဂေါတမော ဓာရေတု အဇ္ဇတဂ္ဂေ ပါဏုပေတေ သရဏံ ဂတေ’’တိ.
ဗြာဟ္မဏဓမ္မိကသုတ္တံ သတ္တမံ နိဋ္ဌိတံ.