၃. ဟိရိသုတ္တံ

၂၅၆. ဟိရိံ တရန္တံ ဝိဇိဂုစ္ဆမာနံ၊ တဝါဟမသ္မိ [သခါဟမသ္မိ (သီ. သျာ. ကံ. ပီ.)] ဣတိ ဘာသမာနံ၊

သယှာနိ ကမ္မာနိ အနာဒိယန္တံ၊ နေသော မမန္တိ ဣတိ နံ ဝိဇညာ.

၂၅၇. အနနွယံ [အတ္ထနွယံ (က.)] ပိယံ ဝါစံ၊ ယော မိတ္တေသု ပကုဗ္ဗတိ၊

အကရောန္တံ ဘာသမာနံ၊ ပရိဇာနန္တိ ပဏ္ဍိတာ.

၂၅၈. န သော မိတ္တော ယော သဒါ အပ္ပမတ္တော၊ ဘေဒါသင်္ကီ ရန္ဓမေဝါနုပဿီ၊

ယသ္မိဉ္စ သေတိ ဥရသီဝ ပုတ္တော၊ သ ဝေ မိတ္တော ယော ပရေဟိ အဘေဇ္ဇော.

၂၅၉. ပါမုဇ္ဇကရဏံ ဌာနံ၊ ပသံသာဝဟနံ သုခံ၊

ဖလာနိသံသော ဘာဝေတိ၊ ဝဟန္တော ပေါရိသံ ဓုရံ.

၂၆၀. ပဝိဝေကရသံ ပိတွာ၊ ရသံ ဥပသမဿ စ၊

နိဒ္ဒရော ဟောတိ နိပ္ပါပေါ၊ ဓမ္မပီတိရသံ ပိဝန္တိ.

ဟိရိသုတ္တံ တတိယံ နိဋ္ဌိတံ.