၁၀. ဥဋ္ဌာနသုတ္တံ

၃၃၃. ဥဋ္ဌဟထ နိသီဒထ၊ ကော အတ္ထော သုပိတေန ဝေါ၊

အာတုရာနဉှိ ကာ နိဒ္ဒါ၊ သလ္လဝိဒ္ဓါန ရုပ္ပတံ.

၃၃၄. ဥဋ္ဌဟထ နိသီဒထ၊ ဒဠှံ သိက္ခထ သန္တိယာ၊

မာ ဝေါ ပမတ္တေ ဝိညာယ၊ မစ္စုရာဇာ အမောဟယိတ္ထ ဝသာနုဂေ.

၃၃၅. ယာယ ဒေဝါ မနုဿာ စ၊ သိတာ တိဋ္ဌန္တိ အတ္ထိကာ၊

တရထေတံ ဝိသတ္တိကံ၊ ခဏော ဝေါ [ခဏော ဝေ (ပီ. က.)] မာ ဥပစ္စဂါ၊

ခဏာတီတာ ဟိ သောစန္တိ၊ နိရယမှိ သမပ္ပိတာ.

၃၃၆. ပမာဒေါ ရဇော ပမာဒေါ၊ ပမာဒါနုပတိတော ရဇော၊

အပ္ပမာဒေန ဝိဇ္ဇာယ၊ အဗ္ဗဟေ [အဗ္ဗူဠှေ (သျာ. ပီ.)၊ အဗ္ဗုဟေ (က. အဋ္ဌ.)] သလ္လမတ္တနောတိ.

ဥဋ္ဌာနသုတ္တံ ဒသမံ နိဋ္ဌိတံ.