၆. ပရာဘဝသုတ္တံ

ဧဝံ မေ သုတံ – ဧကံ သမယံ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. အထ ခေါ အညတရာ ဒေဝတာ အဘိက္ကန္တာယ ရတ္တိယာ အဘိက္ကန္တဝဏ္ဏာ ကေဝလကပ္ပံ ဇေတဝနံ ဩဘာသေတွာ ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ အဋ္ဌာသိ. ဧကမန္တံ ဌိတာ ခေါ သာ ဒေဝတာ ဘဂဝန္တံ ဂါထာယ အဇ္ဈဘာသိ –

၉၁. ‘‘ပရာဘဝန္တံ ပုရိသံ၊ မယံ ပုစ္ဆာမ ဂေါတမ [ဂေါတမံ (သီ. သျာ.)]၊

ဘဂဝန္တံ [ဘဝန္တံ (သျာ. က.)] ပုဋ္ဌုမာဂမ္မ၊ ကိံ ပရာဘဝတော မုခံ’’.

၉၂. ‘‘သုဝိဇာနော ဘဝံ ဟောတိ၊ သုဝိဇာနော [ဒုဝိဇာနော (သျာ. က.)] ပရာဘဝေါ၊

ဓမ္မကာမော ဘဝံ ဟောတိ၊ ဓမ္မဒေဿီ ပရာဘဝေါ’’.

၉၃. ‘‘ဣတိ ဟေတံ ဝိဇာနာမ၊ ပဌမော သော ပရာဘဝေါ၊

ဒုတိယံ ဘဂဝါ ဗြူဟိ၊ ကိံ ပရာဘဝတော မုခံ’’.

၉၄. ‘‘အသန္တဿ ပိယာ ဟောန္တိ၊ သန္တေ န ကုရုတေ ပိယံ၊

အသတံ ဓမ္မံ ရောစေတိ၊ တံ ပရာဘဝတော မုခံ’’.

၉၅. ‘‘ဣတိ ဟေတံ ဝိဇာနာမ၊ ဒုတိယော သော ပရာဘဝေါ၊

တတိယံ ဘဂဝါ ဗြူဟိ၊ ကိံ ပရာဘဝတော မုခံ’’.

၉၆. ‘‘နိဒ္ဒါသီလီ သဘာသီလီ၊ အနုဋ္ဌာတာ စ ယော နရော၊

အလသော ကောဓပညာဏော၊ တံ ပရာဘဝတော မုခံ’’.

၉၇. ‘‘ဣတိ ဟေတံ ဝိဇာနာမ၊ တတိယော သော ပရာဘဝေါ၊

စတုတ္ထံ ဘဂဝါ ဗြူဟိ၊ ကိံ ပရာဘဝတော မုခံ’’.

၉၈. ‘‘ယော မာတရံ [ယော မာတရံ ဝါ (သီ. သျာ. ကံ. ပီ.)] ပိတရံ ဝါ၊ ဇိဏ္ဏကံ ဂတယောဗ္ဗနံ၊

ပဟု သန္တော န ဘရတိ၊ တံ ပရာဘဝတော မုခံ’’.

၉၉. ‘‘ဣတိ ဟေတံ ဝိဇာနာမ၊ စတုတ္ထော သော ပရာဘဝေါ၊

ပဉ္စမံ ဘဂဝါ ဗြူဟိ၊ ကိံ ပရာဘဝတော မုခံ’’.

၁၀၀. ‘‘ယော ဗြာဟ္မဏံ [ယော ဗြာဟ္မဏံ ဝါ (သီ. သျာ. ကံ. ပီ.)] သမဏံ ဝါ၊ အညံ ဝါပိ ဝနိဗ္ဗကံ၊

မုသာဝါဒေန ဝဉ္စေတိ၊ တံ ပရာဘဝတော မုခံ’’.

၁၀၁. ‘‘ဣတိ ဟေတံ ဝိဇာနာမ၊ ပဉ္စမော သော ပရာဘဝေါ၊

ဆဋ္ဌမံ ဘဂဝါ ဗြူဟိ၊ ကိံ ပရာဘဝတော မုခံ’’.

၁၀၂. ‘‘ပဟူတဝိတ္တော ပုရိသော၊ သဟိရညော သဘောဇနော၊

ဧကော ဘုဉ္ဇတိ သာဒူနိ၊ တံ ပရာဘဝတော မုခံ’’.

၁၀၃. ‘‘ဣတိ ဟေတံ ဝိဇာနာမ၊ ဆဋ္ဌမော သော ပရာဘဝေါ၊

သတ္တမံ ဘဂဝါ ဗြူဟိ၊ ကိံ ပရာဘဝတော မုခံ’’.

၁၀၄. ‘‘ဇာတိတ္ထဒ္ဓေါ ဓနတ္ထဒ္ဓေါ၊ ဂေါတ္တတ္ထဒ္ဓေါ စ ယော နရော၊

သညာတိံ အတိမညေတိ၊ တံ ပရာဘဝတော မုခံ’’.

၁၀၅. ‘‘ဣတိ ဟေတံ ဝိဇာနာမ၊ သတ္တမော သော ပရာဘဝေါ၊

အဋ္ဌမံ ဘဂဝါ ဗြူဟိ၊ ကိံ ပရာဘဝတော မုခံ’’.

၁၀၆. ‘‘ဣတ္ထိဓုတ္တော သုရာဓုတ္တော၊ အက္ခဓုတ္တော စ ယော နရော၊

လဒ္ဓံ လဒ္ဓံ ဝိနာသေတိ၊ တံ ပရာဘဝတော မုခံ’’.

၁၀၇. ‘‘ဣတိ ဟေတံ ဝိဇာနာမ၊ အဋ္ဌမော သော ပရာဘဝေါ၊

နဝမံ ဘဂဝါ ဗြူဟိ၊ ကိံ ပရာဘဝတော မုခံ’’.

၁၀၈. ‘‘သေဟိ ဒါရေဟိ အသန္တုဋ္ဌော [ဒါရေဟျသန္တုဋ္ဌော (က.)]၊ ဝေသိယာသု ပဒုဿတိ [ပဒိဿတိ (သီ.)]၊

ဒုဿတိ [ဒိဿတိ (သီ. ပီ.)] ပရဒါရေသု၊ တံ ပရာဘဝတော မုခံ’’.

၁၀၉. ‘‘ဣတိ ဟေတံ ဝိဇာနာမ၊ နဝမော သော ပရာဘဝေါ၊

ဒသမံ ဘဂဝါ ဗြူဟိ၊ ကိံ ပရာဘဝတော မုခံ’’.

၁၁၀. ‘‘အတီတယောဗ္ဗနော ပေါသော၊ အာနေတိ တိမ္ဗရုတ္ထနိံ၊

တဿာ ဣဿာ န သုပတိ၊ တံ ပရာဘဝတော မုခံ’’.

၁၁၁. ‘‘ဣတိ ဟေတံ ဝိဇာနာမ၊ ဒသမော သော ပရာဘဝေါ၊

ဧကာဒသမံ ဘဂဝါ ဗြူဟိ၊ ကိံ ပရာဘဝတော မုခံ’’.

၁၁၂. ‘‘ဣတ္ထိံ သောဏ္ဍိံ ဝိကိရဏိံ၊ ပုရိသံ ဝါပိ တာဒိသံ၊

ဣဿရိယသ္မိံ ဌပေတိ [ဌာပေတိ (သီ. ပီ.)၊ ထပေတိ (က.)]၊ တံ ပရာဘဝတော မုခံ’’.

၁၁၃. ‘‘ဣတိ ဟေတံ ဝိဇာနာမ၊ ဧကာဒသမော သော ပရာဘဝေါ၊

ဒွါဒသမံ ဘဂဝါ ဗြူဟိ၊ ကိံ ပရာဘဝတော မုခံ’’.

၁၁၄. ‘‘အပ္ပဘောဂေါ မဟာတဏှော၊ ခတ္တိယေ ဇာယတေ ကုလေ၊

သော စ ရဇ္ဇံ ပတ္ထယတိ၊ တံ ပရာဘဝတော မုခံ’’.

၁၁၅. ‘‘ဧတေ ပရာဘဝေ လောကေ၊ ပဏ္ဍိတော သမဝေက္ခိယ၊

အရိယော ဒဿနသမ္ပန္နော၊ သ လောကံ ဘဇတေ သိဝ’’န္တိ.

ပရာဘဝသုတ္တံ ဆဋ္ဌံ နိဋ္ဌိတံ.