၇. ရာဇပုတ္တပေတဝတ္ထု

၇၅၃. ပုဗ္ဗေ ကတာနံ ကမ္မာနံ၊ ဝိပါကော မထယေ မနံ၊

ရူပေ သဒ္ဒေ ရသေ ဂန္ဓေ၊ ဖောဋ္ဌဗ္ဗေ စ မနောရမေ.

၇၅၄. နစ္စံ ဂီတံ ရတိံ ခိဍ္ဍံ၊ အနုဘုတွာ အနပ္ပကံ၊

ဥယျာနေ ပရိစရိတွာ၊ ပဝိသန္တော ဂိရိဗ္ဗဇံ.

၇၅၅. ဣသိံ သုနေတ္တ [သုနိတ (က.)] မဒ္ဒက္ခိ၊ အတ္တဒန္တံ သမာဟိတံ၊

အပ္ပိစ္ဆံ ဟိရိသမ္ပန္နံ၊ ဥဉ္ဆေ ပတ္တဂတေ ရတံ.

၇၅၆. ဟတ္ထိက္ခန္ဓတော ဩရုယှ၊ လဒ္ဓါ ဘန္တေတိ စာဗြဝိ၊

တဿ ပတ္တံ ဂဟေတွာန၊ ဥစ္စံ ပဂ္ဂယှ ခတ္တိယော.

၇၅၇. ထဏ္ဍိလေ ပတ္တံ ဘိန္ဒိတွာ၊ ဟသမာနော အပက္ကမိ၊

‘‘ရညော ကိတဝဿာဟံ ပုတ္တော၊ ကိံ မံ ဘိက္ခု ကရိဿသိ’’.

၇၅၈. တဿ ကမ္မဿ ဖရုသဿ၊ ဝိပါကော ကဋုကော အဟု၊

ယံ ရာဇပုတ္တော ဝေဒေသိ၊ နိရယမှိ သမပ္ပိတော.

၇၅၉. ဆဠေဝ စတုရာသီတိ၊ ဝဿာနိ နဝုတာနိ စ၊

ဘုသံ ဒုက္ခံ နိဂစ္ဆိတ္ထော၊ နိရယေ ကတကိဗ္ဗိသော.

၇၆၀. ဥတ္တာနောပိ စ ပစ္စိတ္ထ၊ နိကုဇ္ဇော ဝါမဒက္ခိဏော၊

ဥဒ္ဓံပါဒေါ ဌိတော စေဝ၊ စိရံ ဗာလော အပစ္စထ.

၇၆၁. ဗဟူနိ ဝဿသဟဿာနိ၊ ပူဂါနိ နဟုတာနိ စ၊

ဘုသံ ဒုက္ခံ နိဂစ္ဆိတ္ထော၊ နိရယေ ကတကိဗ္ဗိသော.

၇၆၂. ဧတာဒိသံ ခေါ ကဋုကံ၊ အပ္ပဒုဋ္ဌပ္ပဒေါသိနံ၊

ပစ္စန္တိ ပါပကမ္မန္တာ၊ ဣသိမာသဇ္ဇ သုဗ္ဗတံ.

၇၆၃. သော တတ္ထ ဗဟုဝဿာနိ၊ ဝေဒယိတွာ ဗဟုံ ဒုခံ၊

ခုပ္ပိပါသဟတော နာမ [ခုပ္ပိပါသာဟတော နာမ (သီ. ပီ)]၊ ပေတော အာသိ တတော စုတော.

၇၆၄. ဧတမာဒီနဝံ ဉတွာ [ဒိသွာ (သီ.)]၊ ဣဿရမဒသမ္ဘဝံ၊

ပဟာယ ဣဿရမဒံ၊ နိဝါတမနုဝတ္တယေ.

၇၆၅. ဒိဋ္ဌေဝ ဓမ္မေ ပါသံသော၊ ယော ဗုဒ္ဓေသု သဂါရဝေါ၊

ကာယဿ ဘေဒါ သပ္ပညော၊ သဂ္ဂံ သော ဥပပဇ္ဇတီတိ.

ရာဇပုတ္တပေတဝတ္ထု သတ္တမံ.