၁၂. အမ္ဗဝနပေတဝတ္ထု

၇၉၆. ‘‘အယဉ္စ တေ ပေါက္ခရဏီ သုရမ္မာ၊ သမာ သုတိတ္ထာ စ မဟောဒကာ စ၊

သုပုပ္ဖိတာ ဘမရဂဏာနုကိဏ္ဏာ၊ ကထံ တယာ လဒ္ဓါ အယံ မနုညာ.

၇၉၇. ‘‘ဣဒဉ္စ တေ အမ္ဗဝနံ သုရမ္မံ၊ သဗ္ဗောတုကံ ဓာရယတေ [ဓာရယတိ (သျာ. က.)] ဖလာနိ၊

သုပုပ္ဖိတံ ဘမရဂဏာနုကိဏ္ဏံ၊ ကထံ တယာ လဒ္ဓမိဒံ ဝိမာနံ’’.

၇၉၈. ‘‘အမ္ဗပက္ကံ ဒကံ [အမ္ဗပက္ကောဒကံ (သီ. သျာ. ပီ.)၊ အမ္ဗပက္ကူဒကံ (က.)] ယာဂု၊ သီတစ္ဆာယာ မနောရမာ၊

ဓီတာယ ဒိန္နဒါနေန၊ တေန မေ ဣဓ လဗ္ဘတိ’’.

၇၉၉. ‘‘သန္ဒိဋ္ဌိကံ ကမ္မံ ဧဝံ [သန္ဒိဋ္ဌိကံ ဧဝ (သျာ.)] ပဿထ၊ ဒါနဿ ဒမဿ သံယမဿ ဝိပါကံ၊

ဒါသီ အဟံ အယျကုလေသု ဟုတွာ၊ သုဏိသာ ဟောမိ အဂါရဿ ဣဿရာ’’တိ.

အမ္ဗဝနပေတဝတ္ထု ဒွါဒသမံ.