၃. ပူတိမုခပေတဝတ္ထု
၇. ‘‘ဒိဗ္ဗံ သုဘံ ဓာရေသိ ဝဏ္ဏဓာတုံ၊ ဝေဟာယသံ တိဋ္ဌသိ အန္တလိက္ခေ၊
မုခဉ္စ တေ ကိမယော ပူတိဂန္ဓံ၊ ခါဒန္တိ ကိံ ကမ္မမကာသိ ပုဗ္ဗေ’’.
၈. ‘‘သမဏော အဟံ ပါပေါတိဒုဋ္ဌဝါစော [ပါပေါ ဒုဋ္ဌဝါစော (သီ.)၊ ပါပေါ ဒုက္ခဝါစော (သျာ. ပီ.)]၊ တပဿိရူပေါ မုခသာ အသညတော၊
လဒ္ဓါ စ မေ တပသာ ဝဏ္ဏဓာတု၊ မုခဉ္စ မေ ပေသုဏိယေန ပူတိ.
၉. ‘‘တယိဒံ တယာ နာရဒ သာမံ ဒိဋ္ဌံ၊
အနုကမ္ပကာ ယေ ကုသလာ ဝဒေယျုံ၊
‘မာ ပေသုဏံ မာ စ မုသာ အဘာဏိ၊
ယက္ခော တုဝံ ဟောဟိသိ ကာမကာမီ’’’တိ.
ပူတိမုခပေတဝတ္ထု တတိယံ.