၈. ဝိပလ္လာသကထာ

၂၃၆. ပုရိမနိဒါနံ. ‘‘စတ္တာရောမေ၊ ဘိက္ခဝေ [အ. နိ. ၄.၄၉ ပဿိတဗ္ဗာ]၊ သညာဝိပလ္လာသာ စိတ္တဝိပလ္လာသာ ဒိဋ္ဌိဝိပလ္လာသာ. ကတမေ စတ္တာရော? အနိစ္စေ၊ ဘိက္ခဝေ၊ နိစ္စန္တိ သညာဝိပလ္လာသော စိတ္တဝိပလ္လာသော ဒိဋ္ဌိဝိပလ္လာသော. ဒုက္ခေ၊ ဘိက္ခဝေ၊ သုခန္တိ သညာဝိပလ္လာသော စိတ္တဝိပလ္လာသော ဒိဋ္ဌိဝိပလ္လာသော. အနတ္တနိ၊ ဘိက္ခဝေ၊ အတ္တာတိ သညာဝိပလ္လာသော စိတ္တဝိပလ္လာသော ဒိဋ္ဌိဝိပလ္လာသော. အသုဘေ၊ ဘိက္ခဝေ၊ သုဘန္တိ သညာဝိပလ္လာသော စိတ္တဝိပလ္လာသော ဒိဋ္ဌိဝိပလ္လာသော. ဣမေ ခေါ၊ ဘိက္ခဝေ၊ စတ္တာရော သညာဝိပလ္လာသာ စိတ္တဝိပလ္လာသာ ဒိဋ္ဌိဝိပလ္လာသာ.

‘‘စတ္တာရောမေ၊ ဘိက္ခဝေ၊ နသညာဝိပလ္လာသာ နစိတ္တဝိပလ္လာသာ နဒိဋ္ဌိဝိပလ္လာသာ. ကတမေ စတ္တာရော? အနိစ္စေ၊ ဘိက္ခဝေ၊ အနိစ္စန္တိ နသညာဝိပလ္လာသော နစိတ္တဝိပလ္လာသော နဒိဋ္ဌိဝိပလ္လာသော. ဒုက္ခေ၊ ဘိက္ခဝေ၊ ဒုက္ခန္တိ နသညာဝိပလ္လာသော နစိတ္တဝိပလ္လာသော နဒိဋ္ဌိဝိပလ္လာသော. အနတ္တနိ၊ ဘိက္ခဝေ၊ အနတ္တာတိ နသညာဝိပလ္လာသော နစိတ္တဝိပလ္လာသော နဒိဋ္ဌိဝိပလ္လာသော. အသုဘေ၊ ဘိက္ခဝေ၊ အသုဘန္တိ နသညာဝိပလ္လာသော နစိတ္တဝိပလ္လာသော နဒိဋ္ဌိဝိပလ္လာသော. ဣမေ ခေါ၊ ဘိက္ခဝေ၊ စတ္တာရော နသညာဝိပလ္လာသာ နစိတ္တဝိပလ္လာသာ နဒိဋ္ဌိဝိပလ္လာသာ’’တိ.

‘‘အနိစ္စေ နိစ္စသညိနော၊ ဒုက္ခေ စ သုခသညိနော၊

အနတ္တနိ စ အတ္တာတိ [အတ္တသညိနော (သျာ.) အ. နိ. ၄.၄၉ ပဿိတဗ္ဗာ]၊ အသုဘေ သုဘသညိနော၊

မိစ္ဆာဒိဋ္ဌိဟတာ သတ္တာ၊ ခိတ္တစိတ္တာ ဝိသညိနော.

‘‘တေ ယောဂယုတ္တာ မာရဿ၊ အယောဂက္ခေမိနော ဇနာ၊

သတ္တာ ဂစ္ဆန္တိ သံသာရံ၊ ဇာတိမရဏဂါမိနော.

‘‘ယဒါ စ ဗုဒ္ဓါ လောကသ္မိံ၊ ဥပ္ပဇ္ဇန္တိ ပဘင်္ကရာ၊

တေ ဣမံ ဓမ္မံ ပကာသေန္တိ၊ ဒုက္ခူပသမဂါမိနံ.

‘‘တေသံ သုတွာန သပ္ပညာ၊ သစိတ္တံ ပစ္စလဒ္ဓု [ပစ္စလဒ္ဓုံ (သျာ.)၊ ပစ္စလဒ္ဓါ အ. နိ. ၄.၄၉] တေ၊

အနိစ္စံ အနိစ္စတော ဒက္ခုံ၊ ဒုက္ခမဒ္ဒက္ခု ဒုက္ခတော.

‘‘အနတ္တနိ အနတ္တာတိ၊ အသုဘံ အသုဘတဒ္ဒသုံ၊

သမ္မာဒိဋ္ဌိသမာဒါနာ၊ သဗ္ဗံ ဒုက္ခံ ဥပစ္စဂု’’န္တိ.

ဣမေ စတ္တာရော ဝိပလ္လာသာ ဒိဋ္ဌိသမ္ပန္နဿ ပုဂ္ဂလဿ ပဟီနာ၊ အပ္ပဟီနာတိ. ကေစိ ပဟီနာ၊ ကေစိ အပ္ပဟီနာ? အနိစ္စေ နိစ္စန္တိ သညာဝိပလ္လာသော စိတ္တဝိပလ္လာသော ဒိဋ္ဌိဝိပလ္လာသော ပဟီနော. ဒုက္ခေ သုခန္တိ သညာ ဥပ္ပဇ္ဇတိ၊ စိတ္တံ ဥပ္ပဇ္ဇတိ၊ ဒိဋ္ဌိဝိပလ္လာသော ပဟီနော. အနတ္တနိ အတ္တာတိ သညာဝိပလ္လာသော စိတ္တဝိပလ္လာသော ဒိဋ္ဌိဝိပလ္လာသော ပဟီနော. အသုဘေ သုဘန္တိ သညာ ဥပ္ပဇ္ဇတိ၊ စိတ္တံ ဥပ္ပဇ္ဇတိ၊ ဒိဋ္ဌိဝိပလ္လာသော ပဟီနော. ဒွီသု ဝတ္ထူသု ဆ ဝိပလ္လာသာ ပဟီနာ. ဒွီသု ဝတ္ထူသု ဒွေ ဝိပလ္လာသာ ပဟီနာ၊ စတ္တာရော ဝိပလ္လာသာ အပ္ပဟီနာ. စတူသု ဝတ္ထူသု အဋ္ဌ ဝိပလ္လာသာ ပဟီနာ၊ စတ္တာရော ဝိပလ္လာသာ အပ္ပဟီနာတိ.

ဝိပလ္လာသကထာ နိဋ္ဌိတာ.