၁. ဥဒ္ဒေသော

၂၀၉. ပုရိမနိဒါနံ. ‘‘တယောမေ၊ ဘိက္ခဝေ၊ ဝိမောက္ခာ. ကတမေ တယော? သုညတော ဝိမောက္ခော၊ အနိမိတ္တော ဝိမောက္ခော၊ အပ္ပဏိဟိတော ဝိမောက္ခော – ဣမေ ခေါ၊ ဘိက္ခဝေ၊ တယော ဝိမောက္ခာ.

‘‘အပိ စ၊ အဋ္ဌသဋ္ဌိ ဝိမောက္ခာ – သုညတော ဝိမောက္ခော၊ အနိမိတ္တော ဝိမောက္ခော၊ အပ္ပဏိဟိတော ဝိမောက္ခော၊ အဇ္ဈတ္တဝုဋ္ဌာနော ဝိမောက္ခော၊ ဗဟိဒ္ဓါဝုဋ္ဌာနော ဝိမောက္ခော၊ ဒုဘတော ဝုဋ္ဌာနော ဝိမောက္ခော၊ အဇ္ဈတ္တဝုဋ္ဌာနာ စတ္တာရော ဝိမောက္ခာ၊ ဗဟိဒ္ဓါဝုဋ္ဌာနာ စတ္တာရော ဝိမောက္ခာ၊ ဒုဘတော ဝုဋ္ဌာနာ စတ္တာရော ဝိမောက္ခာ၊ အဇ္ဈတ္တဝုဋ္ဌာနာနံ အနုလောမာ စတ္တာရော ဝိမောက္ခာ၊ ဗဟိဒ္ဓါဝုဋ္ဌာနာနံ အနုလောမာ စတ္တာရော ဝိမောက္ခာ၊ ဒုဘတော ဝုဋ္ဌာနာနံ အနုလောမာ စတ္တာရော ဝိမောက္ခာ၊ အဇ္ဈတ္တဝုဋ္ဌာနပဋိပ္ပဿဒ္ဓီ [အဇ္ဈတ္တဝုဋ္ဌာနာ ပဋိပ္ပဿဒ္ဓီ (သျာ.)] စတ္တာရော ဝိမောက္ခာ၊ ဗဟိဒ္ဓါဝုဋ္ဌာနပဋိပ္ပဿဒ္ဓီ စတ္တာရော ဝိမောက္ခာ၊ ဒုဘတော ဝုဋ္ဌာနပဋိပ္ပဿဒ္ဓီ စတ္တာရော ဝိမောက္ခာ၊ ရူပီ ရူပါနိ ပဿတီတိ ဝိမောက္ခော၊ အဇ္ဈတ္တံ အရူပသညီ ဗဟိဒ္ဓါ ရူပါနိ ပဿတီတိ ဝိမောက္ခော၊ သုဘံ တေဝ အဓိမုတ္တော ဟောတီတိ ဝိမောက္ခော၊ အာကာသာနဉ္စာယတနသမာပတ္တိ ဝိမောက္ခော၊ ဝိညာဏဉ္စာယတနသမာပတ္တိ ဝိမောက္ခော၊ အာကိဉ္စညာယတနသမာပတ္တိ ဝိမောက္ခော၊ နေဝသညာနာသညာယတနသမာပတ္တိ ဝိမောက္ခော၊ သညာဝေဒယိတနိရောဓသမာပတ္တိ ဝိမောက္ခော၊ သမယဝိမောက္ခော၊ အသမယဝိမောက္ခော၊ သာမယိကော ဝိမောက္ခော၊ အသာမယိကော ဝိမောက္ခော၊ ကုပ္ပေါ ဝိမောက္ခော၊ အကုပ္ပေါ ဝိမောက္ခော၊ လောကိယော ဝိမောက္ခော၊ လောကုတ္တရော ဝိမောက္ခော၊ သာသဝေါ ဝိမောက္ခော၊ အနာသဝေါ ဝိမောက္ခော၊ သာမိသော ဝိမောက္ခော၊ နိရာမိသော ဝိမောက္ခော၊ နိရာမိသာနိရာမိသတရော ဝိမောက္ခော၊ ပဏိဟိတော ဝိမောက္ခော၊ အပ္ပဏိဟိတော ဝိမောက္ခော၊ ပဏိဟိတပ္ပဋိပ္ပဿဒ္ဓိ ဝိမောက္ခော၊ သညုတ္တော ဝိမောက္ခော၊ ဝိသညုတ္တော ဝိမောက္ခော၊ ဧကတ္တဝိမောက္ခော၊ နာနတ္တဝိမောက္ခော၊ သညာဝိမောက္ခော၊ ဉာဏဝိမောက္ခော၊ သီတိသိယာဝိမောက္ခော [သီတီသိယာဝိမောက္ခော (သီ. အဋ္ဌ.)]၊ ဈာနဝိမောက္ခော၊ အနုပါဒါစိတ္တဿ ဝိမောက္ခော’’.