၇. အန္တဂ္ဂါဟိကာဒိဋ္ဌိနိဒ္ဒေသော

၁၄၀. အန္တဂ္ဂါဟိကာယ ဒိဋ္ဌိယာ ကတမေဟိ ပညာသာယ အာကာရေဟိ အဘိနိဝေသော ဟောတိ? ‘‘သဿတော လောကော’’တိ – အန္တဂ္ဂါဟိကာယ ဒိဋ္ဌိယာ ကတိဟာကာရေဟိ အဘိနိဝေသော ဟောတိ? ‘‘အသဿတော လောကော’’တိ – အန္တဂ္ဂါဟိကာယ ဒိဋ္ဌိယာ ကတိဟာကာရေဟိ အဘိနိဝေသော ဟောတိ? ‘‘အန္တဝါ လောကော’’တိ – အန္တဂ္ဂါဟိကာယ ဒိဋ္ဌိယာ။ ‘‘အနန္တဝါ လောကော’’တိ – အန္တဂ္ဂါဟိကာယ ဒိဋ္ဌိယာ။ ‘‘တံ ဇီဝံ တံ သရီရ’’န္တိ – အန္တဂ္ဂါဟိကာယ ဒိဋ္ဌိယာ။ ‘‘အညံ ဇီဝံ အညံ သရီရ’’န္တိ – အန္တဂ္ဂါဟိကာယ ဒိဋ္ဌိယာ။ ‘‘ဟောတိ တထာဂတော ပရံ မရဏာ’’တိ။ပေ။ န ဟောတိ တထာဂတော ပရံ မရဏာ’’တိ။ ‘‘ဟောတိ စ န စ ဟောတိ တထာဂတော ပရံ မရဏာ’’တိ။ ‘‘နေဝ ဟောတိ န န ဟောတိ တထာဂတော ပရံ မရဏာ’’တိ – အန္တဂ္ဂါဟိကာယ ဒိဋ္ဌိယာ ကတိဟာကာရေဟိ အဘိနိဝေသော ဟောတိ?

‘‘သဿတော လောကော’’တိ – အန္တဂ္ဂါဟိကာယ ဒိဋ္ဌိယာ ပဉ္စဟာကာရေဟိ အဘိနိဝေသော ဟောတိ။ပေ။ ‘‘နေဝ ဟောတိ န န ဟောတိ တထာဂတော ပရံ မရဏာ’’တိ – အန္တဂ္ဂါဟိကာယ ဒိဋ္ဌိယာ ပဉ္စဟာကာရေဟိ အဘိနိဝေသော ဟောတိ.

[က] ‘‘သဿတော လောကော’’တိ – အန္တဂ္ဂါဟိကာယ ဒိဋ္ဌိယာ ကတမေဟိ ပဉ္စဟာကာရေဟိ အဘိနိဝေသော ဟောတိ? ရူပံ လောကော စေဝ သဿတံ စာတိ – အဘိနိဝေသပရာမာသော ဒိဋ္ဌိ. တာယ ဒိဋ္ဌိယာ သော အန္တော ဂဟိတောတိ – အန္တဂ္ဂါဟိကာ ဒိဋ္ဌိ. ဒိဋ္ဌိ န ဝတ္ထု၊ ဝတ္ထု န ဒိဋ္ဌိ. အညာ ဒိဋ္ဌိ၊ အညံ ဝတ္ထု. ယာ စ ဒိဋ္ဌိ ယဉ္စ ဝတ္ထု – အယံ ပဌမာ ‘‘သဿတော လောကော’’တိ – အန္တဂ္ဂါဟိကာ ဒိဋ္ဌိ. အန္တဂ္ဂါဟိကာ ဒိဋ္ဌိ မိစ္ဆာဒိဋ္ဌိ ။ပေ။ ဣမာနိ သညောဇနာနိ၊ န စ ဒိဋ္ဌိယော.

ဝေဒနာ လောကော စေဝ သဿတာ စာတိ။ပေ။ သညာ လောကော စေဝ သဿတာ စာတိ။ပေ။ သင်္ခါရာ လောကော စေဝ သဿတာ စာတိ။ပေ။ ဝိညာဏံ လောကော စေဝ သဿတဉ္စာတိ – အဘိနိဝေသပရာမာသော ဒိဋ္ဌိ. တာယ ဒိဋ္ဌိယာ သော အန္တော ဂဟိတောတိ – အန္တဂ္ဂါဟိကာ ဒိဋ္ဌိ. ဒိဋ္ဌိ န ဝတ္ထု၊ ဝတ္ထု န ဒိဋ္ဌိ. အညာ ဒိဋ္ဌိ၊ အညံ ဝတ္ထု. ယာ စ ဒိဋ္ဌိ ယဉ္စ ဝတ္ထု – အယံ ပဉ္စမီ သဿတော လောကောတိ – အန္တဂ္ဂါဟိကာ ဒိဋ္ဌိ. အန္တဂ္ဂါဟိကာ ဒိဋ္ဌိ မိစ္ဆာဒိဋ္ဌိ။ပေ။ ဣမာနိ သညောဇနာနိ၊ န စ ဒိဋ္ဌိယော. ‘‘သဿတော လောကော’’တိ – အန္တဂ္ဂါဟိကာယ ဒိဋ္ဌိယာ ဣမေဟိ ပဉ္စဟာကာရေဟိ အဘိနိဝေသော ဟောတိ.

[ခ] ‘‘အသဿတော လောကော’’တိ – အန္တဂ္ဂါဟိကာယ ဒိဋ္ဌိယာ ကတမေဟိ ပဉ္စဟာကာရေဟိ အဘိနိဝေသော ဟောတိ? ရူပံ လောကော စေဝ အသဿတဉ္စာတိ – အဘိနိဝေသပရာမာသော ဒိဋ္ဌိ. တာယ ဒိဋ္ဌိယာ သော အန္တော ဂဟိတောတိ – အန္တဂ္ဂါဟိကာ ဒိဋ္ဌိ။ပေ။ အယံ ပဌမာ ‘‘အသဿတော လောကော’’တိ – အန္တဂ္ဂါဟိကာ ဒိဋ္ဌိ. အန္တဂ္ဂါဟိကာ ဒိဋ္ဌိ မိစ္ဆာဒိဋ္ဌိ ဒိဋ္ဌိဝိပတ္တိ။ပေ။ ဣမာနိ သညောဇနာနိ၊ န စ ဒိဋ္ဌိယော.

ဝေဒနာ လောကော စေဝ အသဿတာ စာတိ။ပေ။ သညာ လောကော စေဝ အသဿတာ စာတိ။ပေ။ သင်္ခါရာ လောကော စေဝ အသဿတာ စာတိ။ပေ။ ဝိညာဏံ လောကော စေဝ အသဿတဉ္စာတိ – အဘိနိဝေသပရာမာသော ဒိဋ္ဌိ. တာယ ဒိဋ္ဌိယာ သော အန္တော ဂဟိတောတိ – အန္တဂ္ဂါဟိကာ ဒိဋ္ဌိ. အန္တဂ္ဂါဟိကာ ဒိဋ္ဌိ မိစ္ဆာဒိဋ္ဌိ။ပေ။ ဣမာနိ သညောဇနာနိ၊ န စ ဒိဋ္ဌိယော. ‘‘အသဿတော လောကော’’တိ – အန္တဂ္ဂါဟိကာယ ဒိဋ္ဌိယာ ဣမေဟိ ပဉ္စဟာကာရေဟိ အဘိနိဝေသော ဟောတိ.

[ဂ] ‘‘အန္တဝါ လောကော’’တိ – အန္တဂ္ဂါဟိကာယ ဒိဋ္ဌိယာ ကတမေဟိ ပဉ္စဟာကာရေဟိ အဘိနိဝေသော ဟောတိ? ဣဓေကစ္စော ပရိတ္တံ ဩကာသံ နီလကတော ဖရတိ. တဿ ဧဝံ ဟောတိ – ‘‘အန္တဝါ အယံ လောကော ပရိဝဋုမော’’တိ. အန္တသညီ ဟောတိ. ယံ ဖရတိ၊ တံ ဝတ္ထု စေဝ လောကော စ. ယေန ဖရတိ၊ သော အတ္တာ စေဝ လောကော စာတိ – အဘိနိဝေသပရာမာသော ဒိဋ္ဌိ. တာယ ဒိဋ္ဌိယာ သော အန္တော ဂဟိတောတိ – အန္တဂ္ဂါဟိကာ ဒိဋ္ဌိ. ဒိဋ္ဌိ န ဝတ္ထု၊ ဝတ္ထု န ဒိဋ္ဌိ. အညာ ဒိဋ္ဌိ၊ အညံ ဝတ္ထု. ယာ စ ဒိဋ္ဌိ ယဉ္စ ဝတ္ထု – အယံ ပဌမာ ‘‘အန္တဝါ လောကော’’တိ အန္တဂ္ဂါဟိကာ ဒိဋ္ဌိ. အန္တဂ္ဂါဟိကာ ဒိဋ္ဌိ မိစ္ဆာဒိဋ္ဌိ။ပေ။ ဣမာနိ သညောဇနာနိ၊ န စ ဒိဋ္ဌိယော.

ဣဓေကစ္စော ပရိတ္တံ ဩကာသံ ပီတကတော ဖရတိ။ လောဟိတကတော ဖရတိ။ ဩဒါတကတော ဖရတိ။ ဩဘာသကတော ဖရတိ. တဿ ဧဝံ ဟောတိ – ‘‘အန္တဝါ အယံ လောကော ပရိဝဋုမော’’တိ. အန္တသညီ ဟောတိ. ယံ ဖရတိ တံ ဝတ္ထု စေဝ လောကော စ. ယေန ဖရတိ သော အတ္တာ စေဝ လောကော စာတိ – အဘိနိဝေသပရာမာသော ဒိဋ္ဌိ. တာယ ဒိဋ္ဌိယာ သော အန္တော ဂဟိတောတိ – အန္တဂ္ဂါဟိကာ ဒိဋ္ဌိ။ပေ။ အန္တဝါ လောကောတိ – အန္တဂ္ဂါဟိကာယ ဒိဋ္ဌိယာ ဣမေဟိ ပဉ္စဟာကာရေဟိ အဘိနိဝေသော ဟောတိ.

[ဃ] ‘‘အနန္တဝါ လောကော’’တိ – အန္တဂ္ဂါဟိကာယ ဒိဋ္ဌိယာ ကတမေဟိ ပဉ္စဟာကာရေဟိ အဘိနိဝေသော ဟောတိ? ဣဓေကစ္စော ဝိပုလံ ဩကာသံ နီလကတော ဖရတိ. တဿ ဧဝံ ဟောတိ – ‘‘အနန္တဝါ အယံ လောကော အပရိယန္တော’’တိ. အနန္တသညီ ဟောတိ. ယံ ဖရတိ တံ ဝတ္ထု စေဝ လောကော စ၊ ယေန ဖရတိ သော အတ္တာ စေဝ လောကော စာတိ – အဘိနိဝေသပရာမာသော ဒိဋ္ဌိ. တာယ ဒိဋ္ဌိယာ သော အန္တော ဂဟိတောတိ – အန္တဂ္ဂါဟိကာ ဒိဋ္ဌိ. ဒိဋ္ဌိ န ဝတ္ထု၊ ဝတ္ထု န ဒိဋ္ဌိ. အညာ ဒိဋ္ဌိ၊ အညံ ဝတ္ထု. ယာ စ ဒိဋ္ဌိ ယဉ္စ ဝတ္ထု – အယံ ပဌမာ ‘‘အနန္တဝါ လောကော’’တိ – အန္တဂ္ဂါဟိကာ ဒိဋ္ဌိ. အန္တဂ္ဂါဟိကာ ဒိဋ္ဌိ မိစ္ဆာဒိဋ္ဌိ။ပေ။ ဣမာနိ သညောဇနာနိ၊ န စ ဒိဋ္ဌိယော.

ဣဓေကစ္စော ဝိပုလံ ဩကာသံ ပီတကတော ဖရတိ။ လောဟိတကတော ဖရတိ။ ဩဒါတကတော ဖရတိ။ ဩဘာသကတော ဖရတိ. တဿ ဧဝံ ဟောတိ – ‘‘အနန္တဝါ အယံ လောကော အပရိယန္တော’’တိ. အနန္တသညီ ဟောတိ. ယံ ဖရတိ တံ ဝတ္ထု စေဝ လောကော စ၊ ယေန ဖရတိ သော အတ္တာ စေဝ လောကော စာတိ – အဘိနိဝေသပရာမာသော ဒိဋ္ဌိ. တာယ ဒိဋ္ဌိယာ သော အန္တော ဂဟိတောတိ – အန္တဂ္ဂါဟိကာ ဒိဋ္ဌိ။ပေ။ အနန္တဝါ လောကောတိ – အန္တဂ္ဂါဟိကာယ ဒိဋ္ဌိယာ ဣမေဟိ ပဉ္စဟာကာရေဟိ အဘိနိဝေသော ဟောတိ.

[င] ‘‘တံ ဇီဝံ တံ သရီရ’’န္တိ – အန္တဂ္ဂါဟိကာယ ဒိဋ္ဌိယာ ကတမေဟိ ပဉ္စဟာကာရေဟိ အဘိနိဝေသော ဟောတိ? ရူပံ ဇီဝဉ္စေဝ သရီရဉ္စ၊ ယံ ဇီဝံ တံ သရီရံ၊ ယံ သရီရံ တံ ဇီဝန္တိ – အဘိနိဝေသပရာမာသော ဒိဋ္ဌိ. တာယ ဒိဋ္ဌိယာ သော အန္တော ဂဟိတောတိ – အန္တဂ္ဂါဟိကာ ဒိဋ္ဌိ. ဒိဋ္ဌိ န ဝတ္ထု၊ ဝတ္ထု န ဒိဋ္ဌိ. အညာ ဒိဋ္ဌိ၊ အညံ ဝတ္ထု. ယာ စ ဒိဋ္ဌိ ယဉ္စ ဝတ္ထု – အယံ ပဌမာ ‘‘တံ ဇီဝံ တံ သရီရ’’န္တိ – အန္တဂ္ဂါဟိကာ ဒိဋ္ဌိ. အန္တဂ္ဂါဟိကာ ဒိဋ္ဌိ မိစ္ဆာဒိဋ္ဌိ။ပေ။ ဣမာနိ သညောဇနာနိ၊ န စ ဒိဋ္ဌိယော.

ဝေဒနာ ဇီဝါ စေဝ သရီရံ စ။ သညာ ဇီဝါ စေဝ သရီရံ စ။ သင်္ခါရာ ဇီဝါ စေဝ သရီရံ စ။ ဝိညာဏံ ဇီဝဉ္စေဝ သရီရဉ္စ၊ ယံ ဇီဝံ တံ သရီရံ၊ ယံ သရီရံ တံ ဇီဝန္တိ – အဘိနိဝေသပရာမာသော ဒိဋ္ဌိ. တာယ ဒိဋ္ဌိယာ သော အန္တော ဂဟိတောတိ – အန္တဂ္ဂါဟိကာ ဒိဋ္ဌိ။ပေ။ ‘‘တံ ဇီဝံ တံ သရီရ’’န္တိ – အန္တဂ္ဂါဟိကာယ ဒိဋ္ဌိယာ ဣမေဟိ ပဉ္စဟာကာရေဟိ အဘိနိဝေသော ဟောတိ.

[စ] ‘‘အညံ ဇီဝံ အညံ သရီရ’’န္တိ – အန္တဂ္ဂါဟိကာယ ဒိဋ္ဌိယာ ကတမေဟိ ပဉ္စဟာကာရေဟိ အဘိနိဝေသော ဟောတိ? ရူပံ သရီရံ၊ န ဇီဝံ၊ ဇီဝံ န သရီရံ. အညံ ဇီဝံ အညံ သရီရန္တိ – အဘိနိဝေသပရာမာသော ဒိဋ္ဌိ. တာယ ဒိဋ္ဌိယာ သော အန္တော ဂဟိတောတိ – အန္တဂ္ဂါဟိကာ ဒိဋ္ဌိ. ဒိဋ္ဌိ န ဝတ္ထု၊ ဝတ္ထု န ဒိဋ္ဌိ. အညာ ဒိဋ္ဌိ၊ အညံ ဝတ္ထု. ယာ စ ဒိဋ္ဌိ ယဉ္စ ဝတ္ထု – အယံ ပဌမာ ‘‘အညံ ဇီဝံ အညံ သရီရ’’န္တိ – အန္တဂ္ဂါဟိကာ ဒိဋ္ဌိ. အန္တဂ္ဂါဟိကာ ဒိဋ္ဌိ မိစ္ဆာဒိဋ္ဌိ။ပေ။ ဣမာနိ သညောဇနာနိ၊ န စ ဒိဋ္ဌိယော.

ဝေဒနာ သရီရံ၊ န ဇီဝံ။ သညာ သရီရံ၊ န ဇီဝံ။ သင်္ခါရာ သရီရံ၊ န ဇီဝံ။ ဝိညာဏံ သရီရံ၊ န ဇီဝံ၊ ဇီဝံ န သရီရံ. အညံ ဇီဝံ၊ အညံ သရီရန္တိ – အဘိနိဝေသပရာမာသော ဒိဋ္ဌိ. တာယ ဒိဋ္ဌိယာ သော အန္တော ဂဟိတောတိ – အန္တဂ္ဂါဟိကာ ဒိဋ္ဌိ။ပေ။ အညံ ဇီဝံ၊ အညံ သရီရန္တိ – အန္တဂ္ဂါဟိကာယ ဒိဋ္ဌိယာ ဣမေဟိ ပဉ္စဟာကာရေဟိ အဘိနိဝေသော ဟောတိ.

[ဆ] ‘‘ဟောတိ တထာဂတော ပရံ မရဏာ’’တိ – အန္တဂ္ဂါဟိကာယ ဒိဋ္ဌိယာ ကတမေဟိ ပဉ္စဟာကာရေဟိ အဘိနိဝေသော ဟောတိ? ရူပံ ဣဓေဝ မရဏဓမ္မံ. တထာဂတော ကာယဿ ဘေဒါ ဟောတိပိ တိဋ္ဌတိပိ ဥပ္ပဇ္ဇတိပိ နိဗ္ဗတ္တတိပီတိ – အဘိနိဝေသပရာမာသော ဒိဋ္ဌိ. တာယ ဒိဋ္ဌိယာ သော အန္တော ဂဟိတောတိ – အန္တဂ္ဂါဟိကာ ဒိဋ္ဌိ. ဒိဋ္ဌိ န ဝတ္ထု၊ ဝတ္ထု န ဒိဋ္ဌိ. အညာ ဒိဋ္ဌိ၊ အညံ ဝတ္ထု. ယာ စ ဒိဋ္ဌိ ယဉ္စ ဝတ္ထု – အယံ ပဌမာ ‘‘ဟောတိ တထာဂတော ပရံ မရဏာ’’တိ – အန္တဂ္ဂါဟိကာ ဒိဋ္ဌိ. အန္တဂ္ဂါဟိကာ ဒိဋ္ဌိ မိစ္ဆာဒိဋ္ဌိ။ပေ။ ဣမာနိ သညောဇနာနိ၊ န စ ဒိဋ္ဌိယော.

ဝေဒနာ ဣဓေဝ မရဏဓမ္မာ။ပေ။ သညာ ဣဓေဝ မရဏဓမ္မာ။ သင်္ခါရာ ဣဓေဝ မရဏဓမ္မာ။ ဝိညာဏံ ဣဓေဝ မရဏဓမ္မံ. တထာဂတော ကာယဿ ဘေဒါ ဟောတိပိ တိဋ္ဌတိပိ ဥပ္ပဇ္ဇတိပိ နိဗ္ဗတ္တတိပီတိ – အဘိနိဝေသပရာမာသော ဒိဋ္ဌိ. တာယ ဒိဋ္ဌိယာ သော အန္တော ဂဟိတောတိ – အန္တဂ္ဂါဟိကာ ဒိဋ္ဌိ။ပေ။ ‘‘ဟောတိ တထာဂတော ပရံ မရဏာ’’တိ – အန္တဂ္ဂါဟိကာယ ဒိဋ္ဌိယာ ဣမေဟိ ပဉ္စဟာကာရေဟိ အဘိနိဝေသော ဟောတိ.

[ဇ] ‘‘န ဟောတိ တထာဂတော ပရံ မရဏာ’’တိ – အန္တဂ္ဂါဟိကာယ ဒိဋ္ဌိယာ ကတမေဟိ ပဉ္စဟာကာရေဟိ အဘိနိဝေသော ဟောတိ? ရူပံ ဣဓေဝ မရဏဓမ္မံ. တထာဂတောပိ ကာယဿ ဘေဒါ ဥစ္ဆိဇ္ဇတိ ဝိနဿတိ၊ န ဟောတိ တထာဂတော ပရံ မရဏာတိ – အဘိနိဝေသပရာမာသော ဒိဋ္ဌိ. တာယ ဒိဋ္ဌိယာ သော အန္တော ဂဟိတောတိ – အန္တဂ္ဂါဟိကာ ဒိဋ္ဌိ. ဒိဋ္ဌိ န ဝတ္ထု၊ ဝတ္ထု န ဒိဋ္ဌိ. အညာ ဒိဋ္ဌိ၊ အညံ ဝတ္ထု. ယာ စ ဒိဋ္ဌိ ယဉ္စ ဝတ္ထု – အယံ ပဌမာ ‘‘န ဟောတိ တထာဂတော ပရံ မရဏာ’’တိ – အန္တဂ္ဂါဟိကာ ဒိဋ္ဌိ. အန္တဂ္ဂါဟိကာ ဒိဋ္ဌိ မိစ္ဆာဒိဋ္ဌိ။ပေ။ ဣမာနိ သညောဇနာနိ၊ န စ ဒိဋ္ဌိယော.

ဝေဒနာ ဣဓေဝ မရဏဓမ္မာ။ပေ။ သညာ ဣဓေဝ မရဏဓမ္မာ။ သင်္ခါရာ ဣဓေဝ မရဏဓမ္မာ။ ဝိညာဏံ ဣဓေဝ မရဏဓမ္မံ. တထာဂတောပိ ကာယဿ ဘေဒါ ဥစ္ဆိဇ္ဇတိ ဝိနဿတိ. ‘‘န ဟောတိ တထာဂတော ပရံ မရဏာ’’တိ – အဘိနိဝေသပရာမာသော ဒိဋ္ဌိ. တာယ ဒိဋ္ဌိယာ သော အန္တော ဂဟိတောတိ – အန္တဂ္ဂါဟိကာ ဒိဋ္ဌိ။ပေ။ ‘‘န ဟောတိ တထာဂတော ပရံ မရဏာ’’တိ – အန္တဂ္ဂါဟိကာယ ဒိဋ္ဌိယာ ဣမေဟိ ပဉ္စဟာကာရေဟိ အဘိနိဝေသော ဟောတိ.

[ဈ] ‘‘ဟောတိ စ န စ ဟောတိ တထာဂတော ပရံ မရဏာ’’တိ – အန္တဂ္ဂါဟိကာယ ဒိဋ္ဌိယာ ကတမေဟိ ပဉ္စဟာကာရေဟိ အဘိနိဝေသော ဟောတိ? ရူပံ ဣဓေဝ မရဏဓမ္မံ. တထာဂတော ကာယဿ ဘေဒါ ဟောတိ စ န စ ဟောတီတိ – အဘိနိဝေသပရာမာသော ဒိဋ္ဌိ. တာယ ဒိဋ္ဌိယာ သော အန္တော ဂဟိတောတိ – အန္တဂ္ဂါဟိကာ ဒိဋ္ဌိ. ဒိဋ္ဌိ န ဝတ္ထု၊ ဝတ္ထု န ဒိဋ္ဌိ. အညာ ဒိဋ္ဌိ၊ အညံ ဝတ္ထု. ယာ စ ဒိဋ္ဌိ ယဉ္စ ဝတ္ထု – အယံ ပဌမာ ‘‘ဟောတိ စ န စ ဟောတိ တထာဂတော ပရံ မရဏာ’’တိ – အန္တဂ္ဂါဟိကာ ဒိဋ္ဌိ. အန္တဂ္ဂါဟိကာ ဒိဋ္ဌိ မိစ္ဆာဒိဋ္ဌိ။ပေ။ ဣမာနိ သညောဇနာနိ န စ ဒိဋ္ဌိယော.

ဝေဒနာ ဣဓေဝ မရဏဓမ္မာ။ပေ။ သညာ ဣဓေဝ မရဏဓမ္မာ။ သင်္ခါရာ ဣဓေဝ မရဏဓမ္မာ။ ဝိညာဏံ ဣဓေဝ မရဏဓမ္မံ. တထာဂတော ကာယဿ ဘေဒါ ဟောတိ စ န စ ဟောတီတိ – အဘိနိဝေသပရာမာသော ဒိဋ္ဌိ. တာယ ဒိဋ္ဌိယာ သော အန္တော ဂဟိတောတိ – အန္တဂ္ဂါဟိကာ ဒိဋ္ဌိ။ပေ။ ‘‘ဟောတိ စ န စ ဟောတိ တထာဂတော ပရံ မရဏာ’’တိ – အန္တဂ္ဂါဟိကာယ ဒိဋ္ဌိယာ ဣမေဟိ ပဉ္စဟာကာရေဟိ အဘိနိဝေသော ဟောတိ.

[ဉ] ‘‘နေဝ ဟောတိ န န ဟောတိ တထာဂတော ပရံ မရဏာ’’တိ – အန္တဂ္ဂါဟိကာယ ဒိဋ္ဌိယာ ကတမေဟိ ပဉ္စဟာကာရေဟိ အဘိနိဝေသော ဟောတိ? ရူပံ ဣဓေဝ မရဏဓမ္မံ. တထာဂတော ကာယဿ ဘေဒါ ပရံ မရဏာ နေဝ ဟောတိ န န ဟောတီတိ – အဘိနိဝေသပရာမာသော ဒိဋ္ဌိ. တာယ ဒိဋ္ဌိယာ သော အန္တော ဂဟိတောတိ – အန္တဂ္ဂါဟိကာ ဒိဋ္ဌိ. ဒိဋ္ဌိ န ဝတ္ထု၊ ဝတ္ထု န ဒိဋ္ဌိ၊ အညာ ဒိဋ္ဌိ၊ အညံ ဝတ္ထု. ယာ စ ဒိဋ္ဌိ ယဉ္စ ဝတ္ထု – အယံ ပဌမာ ‘‘နေဝ ဟောတိ န န ဟောတိ တထာဂတော ပရံ မရဏာ’’တိ – အန္တဂ္ဂါဟိကာ ဒိဋ္ဌိ. အန္တဂ္ဂါဟိကာ ဒိဋ္ဌိ မိစ္ဆာဒိဋ္ဌိ။ပေ။ ဣမာနိ သညောဇနာနိ၊ န စ ဒိဋ္ဌိယော.

ဝေဒနာ ဣဓေဝ မရဏဓမ္မာ။ပေ။ သညာ ဣဓေဝ မရဏဓမ္မာ။ သင်္ခါရာ ဣဓေဝ မရဏဓမ္မာ။ ဝိညာဏံ ဣဓေဝ မရဏဓမ္မံ. တထာဂတော ကာယဿ ဘေဒါ ပရံ မရဏာ နေဝ ဟောတိ န န ဟောတီတိ – အဘိနိဝေသပရာမာသော ဒိဋ္ဌိ. တာယ ဒိဋ္ဌိယာ သော အန္တော ဂဟိတောတိ – အန္တဂ္ဂါဟိကာ ဒိဋ္ဌိ. ဒိဋ္ဌိ န ဝတ္ထု၊ ဝတ္ထု န ဒိဋ္ဌိ. အညာ ဒိဋ္ဌိ၊ အညံ ဝတ္ထု. ယာ စ ဒိဋ္ဌိ ယဉ္စ ဝတ္ထု – အယံ ပဉ္စမီ ‘‘နေဝ ဟောတိ န န ဟောတိ တထာဂတော ပရံ မရဏာ’’တိ – အန္တဂ္ဂါဟိကာ ဒိဋ္ဌိ. အန္တဂ္ဂါဟိကာ ဒိဋ္ဌိ မိစ္ဆာဒိဋ္ဌိ။ပေ။ ဣမာနိ သညောဇနာနိ၊ န စ ဒိဋ္ဌိယော. ‘‘နေဝ ဟောတိ န န ဟောတိ တထာဂတော ပရံ မရဏာ’’တိ – အန္တဂ္ဂါဟိကာယ ဒိဋ္ဌိယာ ဣမေဟိ ပဉ္စဟာကာရေဟိ အဘိနိဝေသော ဟောတိ. အန္တဂ္ဂါဟိကာယ ဒိဋ္ဌိယာ ဣမေဟိ ပညာသာယ အာကာရေဟိ အဘိနိဝေသော ဟောတိ.

အန္တဂ္ဂါဟိကာဒိဋ္ဌိနိဒ္ဒေသော သတ္တမော.