၁. အဿာဒဒိဋ္ဌိနိဒ္ဒေသော

၁၂၈. အဿာဒဒိဋ္ဌိယာ ကတမေဟိ ပဉ္စတိံသာယ အာကာရေဟိ အဘိနိဝေသော ဟောတိ? ယံ ရူပံ ပဋိစ္စ ဥပ္ပဇ္ဇတိ သုခံ သောမနဿံ၊ အယံ ရူပဿ အဿာဒေါတိ – အဘိနိဝေသပရာမာသော ဒိဋ္ဌိ. ဒိဋ္ဌိ န အဿာဒေါ၊ အဿာဒေါ န ဒိဋ္ဌိ. အညာ ဒိဋ္ဌိ၊ အညော အဿာဒေါ. ယာ စ ဒိဋ္ဌိ ယော စ အဿာဒေါ – အယံ ဝုစ္စတိ အဿာဒဒိဋ္ဌိ.

အဿာဒဒိဋ္ဌိ မိစ္ဆာဒိဋ္ဌိ ဒိဋ္ဌိဝိပတ္တိ. တာယ ဒိဋ္ဌိဝိပတ္တိယာ သမန္နာဂတော ပုဂ္ဂလော ဒိဋ္ဌိဝိပန္နော. ဒိဋ္ဌိဝိပန္နော ပုဂ္ဂလော န သေဝိတဗ္ဗော န ဘဇိတဗ္ဗော န ပယိရုပါသိတဗ္ဗော. တံ ကိဿ ဟေတု? ဒိဋ္ဌိ ဟိဿ ပါပိကာ. ယော ဒိဋ္ဌိယာ ရာဂေါ [ယာ ဒိဋ္ဌိ ယော ရာဂေါ (သျာ.)]၊ သော န ဒိဋ္ဌိ. ဒိဋ္ဌိ န ရာဂေါ. အညာ ဒိဋ္ဌိ၊ အညော ရာဂေါ. ယာ စ ဒိဋ္ဌိ ယော စ ရာဂေါ – အယံ ဝုစ္စတိ ဒိဋ္ဌိရာဂေါ. တာယ စ ဒိဋ္ဌိယာ တေန စ ရာဂေန သမန္နာဂတော ပုဂ္ဂလော ဒိဋ္ဌိရာဂရတ္တော. ဒိဋ္ဌိရာဂရတ္တေ ပုဂ္ဂလေ ဒိန္နံ ဒါနံ န မဟပ္ဖလံ ဟောတိ န မဟာနိသံသံ. တံ ကိဿ ဟေတု? ဒိဋ္ဌိ ဟိဿ ပါပိကာ အဿာဒဒိဋ္ဌိ မိစ္ဆာဒိဋ္ဌိ.

မိစ္ဆာဒိဋ္ဌိကဿ ပုရိသပုဂ္ဂလဿ ဒွေဝ ဂတိယော – နိရယော ဝါ တိရစ္ဆာနယောနိ ဝါ. မိစ္ဆာဒိဋ္ဌိကဿ ပုရိသပုဂ္ဂလဿ ယဉ္စေဝ ကာယကမ္မံ ယထာဒိဋ္ဌိ သမတ္တံ သမာဒိန္နံ၊ ယဉ္စ ဝစီကမ္မံ။ပေ။ ယဉ္စ မနောကမ္မံ ယထာဒိဋ္ဌိ သမတ္တံ သမာဒိန္နံ၊ ယာ စ စေတနာ ယာ စ ပတ္ထနာ ယော စ ပဏိဓိ ယေ စ သင်္ခါရာ၊ သဗ္ဗေ တေ ဓမ္မာ အနိဋ္ဌာယ အကန္တာယ အမနာပါယ အဟိတာယ ဒုက္ခာယ သံဝတ္တန္တိ. တံ ကိဿ ဟေတု? ဒိဋ္ဌိ ဟိဿ ပါပိကာ. သေယျထာပိ နိမ္ဗဗီဇံ ဝါ ကောသာတကီဗီဇံ ဝါ တိတ္တကာလာဗုဗီဇံ ဝါ အလ္လာယ ပထဝိယာ နိက္ခိတ္တံ ယံ စေဝ ပထဝိရသံ ဥပါဒိယတိ၊ ယဉ္စ အာပေါရသံ ဥပါဒိယတိ၊ သဗ္ဗံ တံ တိတ္တကတ္တာယ ကဋုကတ္တာယ အသာတတ္တာယ [အသာရတာယ (သျာ.)] သံဝတ္တတိ. တံ ကိဿ ဟေတု? ဗီဇံ ဟိဿ ပါပိကံ. ဧဝမေဝံ မိစ္ဆာဒိဋ္ဌိကဿ ပုရိသပုဂ္ဂလဿ ယဉ္စေဝ ကာယကမ္မံ ယထာဒိဋ္ဌိ သမတ္တံ သမာဒိန္နံ၊ ယဉ္စ ဝစီကမ္မံ။ပေ။ ယဉ္စ မနောကမ္မံ ယထာဒိဋ္ဌိ သမတ္တံ သမာဒိန္နံ၊ ယာ စ စေတနာ ယာ စ ပတ္ထနာ ယော စ ပဏိဓိ ယေ စ သင်္ခါရာ၊ သဗ္ဗေ တေ ဓမ္မာ အနိဋ္ဌာယ အကန္တာယ အမနာပါယ အဟိတာယ ဒုက္ခာယ သံဝတ္တန္တိ. တံ ကိဿ ဟေတု? ဒိဋ္ဌိ ဟိဿ ပါပိကာ အဿာဒဒိဋ္ဌိ မိစ္ဆာဒိဋ္ဌိ.

မိစ္ဆာဒိဋ္ဌိ ဒိဋ္ဌိဂတံ၊ ဒိဋ္ဌိဂဟနံ၊ ဒိဋ္ဌိကန္တာရံ၊ ဒိဋ္ဌိဝိသူကံ၊ ဒိဋ္ဌိဝိပ္ဖန္ဒိတံ၊ ဒိဋ္ဌိသညောဇနံ၊ ဒိဋ္ဌိသလ္လံ၊ ဒိဋ္ဌိသမ္ဗာဓော၊ ဒိဋ္ဌိပလိဗောဓော၊ ဒိဋ္ဌိဗန္ဓနံ၊ ဒိဋ္ဌိပပါတော၊ ဒိဋ္ဌာနုသယော၊ ဒိဋ္ဌိသန္တာပေါ၊ ဒိဋ္ဌိပရိဠာဟော၊ ဒိဋ္ဌိဂန္ထော၊ ဒိဋ္ဌုပါဒါနံ၊ ဒိဋ္ဌာဘိနိဝေသော၊ ဒိဋ္ဌိပရာမာသော – ဣမေဟိ အဋ္ဌာရသဟိ အာကာရေဟိ ပရိယုဋ္ဌိတစိတ္တဿ သညောဂေါ.

၁၂၉. အတ္ထိ သညောဇနာနိ စေဝ ဒိဋ္ဌိယော စ၊ အတ္ထိ သညောဇနာနိ န စ ဒိဋ္ဌိယော. ကတမာနိ သညောဇနာနိ စေဝ ဒိဋ္ဌိယော စ? သက္ကာယဒိဋ္ဌိ၊ သီလဗ္ဗတပရာမာသော – ဣမာနိ သညောဇနာနိ စေဝ ဒိဋ္ဌိယော စ. ကတမာနိ သညောဇနာနိ၊ န စ ဒိဋ္ဌိယော? ကာမရာဂသညောဇနံ၊ ပဋိဃသညောဇနံ၊ မာနသညောဇနံ၊ ဝိစိကိစ္ဆာသညောဇနံ၊ ဘဝရာဂသညောဇနံ၊ ဣဿာသညောဇနံ၊ မစ္ဆရိယသညောဇနံ၊ အနုနယသညောဇနံ၊ အဝိဇ္ဇာသညောဇနံ – ဣမာနိ သညောဇနာနိ၊ န စ ဒိဋ္ဌိယော.

ယံ ဝေဒနံ ပဋိစ္စ။ပေ။ ယံ သညံ ပဋိစ္စ။ပေ။ ယံ သင်္ခါရေ [ယေ သင်္ခါရေ (က.) သံ. နိ. ၃.၂၈ ပဿိတဗ္ဗာ] ပဋိစ္စ။ပေ။ ယံ ဝိညာဏံ ပဋိစ္စ။ ယံ စက္ခုံ ပဋိစ္စ။ ယံ သောတံ ပဋိစ္စ။ ယံ ဃာနံ ပဋိစ္စ။ ယံ ဇိဝှံ ပဋိစ္စ။ ယံ ကာယံ ပဋိစ္စ။ ယံ မနံ ပဋိစ္စ။ ယံ ရူပေ ပဋိစ္စ။ ယံ သဒ္ဒေ ပဋိစ္စ။ ယံ ဂန္ဓေ ပဋိစ္စ ။ ယံ ရသေ ပဋိစ္စ။ ယံ ဖောဋ္ဌဗ္ဗေ ပဋိစ္စ။ ယံ ဓမ္မေ ပဋိစ္စ။ ယံ စက္ခုဝိညာဏံ ပဋိစ္စ။ ယံ သောတဝိညာဏံ ပဋိစ္စ။ ယံ ဃာနဝိညာဏံ ပဋိစ္စ။ ယံ ဇိဝှါဝိညာဏံ ပဋိစ္စ။ ယံ ကာယဝိညာဏံ ပဋိစ္စ။ ယံ မနောဝိညာဏံ ပဋိစ္စ ။ ယံ စက္ခုသမ္ဖဿံ ပဋိစ္စ။ ယံ သောတသမ္ဖဿံ ပဋိစ္စ။ ယံ ဃာနသမ္ဖဿံ ပဋိစ္စ။ ယံ ဇိဝှါသမ္ဖဿံ ပဋိစ္စ။ ယံ ကာယသမ္ဖဿံ ပဋိစ္စ။ ယံ မနောသမ္ဖဿံ ပဋိစ္စ။ ယံ စက္ခုသမ္ဖဿဇံ ဝေဒနံ ပဋိစ္စ။ ယံ သောတသမ္ဖဿဇံ ဝေဒနံ ပဋိစ္စ။ ယံ ဃာနသမ္ဖဿဇံ ဝေဒနံ ပဋိစ္စ။ ယံ ဇိဝှါသမ္ဖဿဇံ ဝေဒနံ ပဋိစ္စ။ ယံ ကာယသမ္ဖဿဇံ ဝေဒနံ ပဋိစ္စ။ ယံ မနောသမ္ဖဿဇံ ဝေဒနံ ပဋိစ္စ ဥပ္ပဇ္ဇတိ သုခံ သောမနဿံ၊ အယံ မနောသမ္ဖဿဇာယ ဝေဒနာယ အဿာဒေါတိ – အဘိနိဝေသပရာမာသော ဒိဋ္ဌိ. ဒိဋ္ဌိ န အဿာဒေါ၊ အဿာဒေါ န ဒိဋ္ဌိ. အညာ ဒိဋ္ဌိ၊ အညော အဿာဒေါ. ယာ စ ဒိဋ္ဌိ ယော စ အဿာဒေါ – အယံ ဝုစ္စတိ အဿာဒဒိဋ္ဌိ.

အဿာဒဒိဋ္ဌိ မိစ္ဆာဒိဋ္ဌိ ဒိဋ္ဌိဝိပတ္တိ. တာယ ဒိဋ္ဌိဝိပတ္တိယာ သမန္နာဂတော ပုဂ္ဂလော ဒိဋ္ဌိဝိပန္နော. ဒိဋ္ဌိဝိပန္နော ပုဂ္ဂလော န သေဝိတဗ္ဗော န ဘဇိတဗ္ဗော န ပယိရုပါသိတဗ္ဗော. တံ ကိဿ ဟေတု? ဒိဋ္ဌိ ဟိဿ ပါပိကာ. ယော ဒိဋ္ဌိယာ ရာဂေါ၊ သော န ဒိဋ္ဌိ. ဒိဋ္ဌိ န ရာဂေါ. အညာ ဒိဋ္ဌိ၊ အညော ရာဂေါ. ယာ စ ဒိဋ္ဌိ ယော စ ရာဂေါ၊ အယံ ဝုစ္စတိ ဒိဋ္ဌိရာဂေါ. တာယ စ ဒိဋ္ဌိယာ တေန စ ရာဂေန သမန္နာဂတော ပုဂ္ဂလော ဒိဋ္ဌိရာဂရတ္တော. ဒိဋ္ဌိရာဂရတ္တေ ပုဂ္ဂလေ ဒိန္နံ ဒါနံ န မဟပ္ဖလံ ဟောတိ န မဟာနိသံသံ. တံ ကိဿ ဟေတု? ဒိဋ္ဌိ ဟိဿ ပါပိကာ အဿာဒဒိဋ္ဌိ မိစ္ဆာဒိဋ္ဌိ.

မိစ္ဆာဒိဋ္ဌိကဿ ပုရိသပုဂ္ဂလဿ ဒွေဝ ဂတိယော – နိရယော ဝါ တိရစ္ဆာနယောနိ ဝါ. မိစ္ဆာဒိဋ္ဌိကဿ ပုရိသပုဂ္ဂလဿ ယဉ္စေဝ ကာယကမ္မံ ယထာဒိဋ္ဌိ သမတ္တံ သမာဒိန္နံ၊ ယဉ္စ ဝစီကမ္မံ။ပေ။ ယဉ္စ မနောကမ္မံ ယထာဒိဋ္ဌိ သမတ္တံ သမာဒိန္နံ၊ ယာ စ စေတနာ ယာ စ ပတ္ထနာ ယော စ ပဏိဓိ ယေ စ သင်္ခါရာ၊ သဗ္ဗေ တေ ဓမ္မာ အနိဋ္ဌာယ အကန္တာယ အမနာပါယ အဟိတာယ ဒုက္ခာယ သံဝတ္တန္တိ. တံ ကိဿ ဟေတု? ဒိဋ္ဌိ ဟိဿ ပါပိကာ. သေယျထာပိ နိမ္ဗဗီဇံ ဝါ ကောသာတကီဗီဇံ ဝါ တိတ္တကာလာဗုဗီဇံ ဝါ အလ္လာယ ပထဝိယာ နိက္ခိတ္တံ ယဉ္စေဝ ပထဝိရသံ ဥပါဒိယတိ ယဉ္စ အာပေါရသံ ဥပါဒိယတိ၊ သဗ္ဗံ တံ တိတ္တကတ္တာယ ကဋုကတ္တာယ အသာတတ္တာယ သံဝတ္တတိ. တံ ကိဿ ဟေတု? ဗီဇံ ဟိဿ ပါပိကံ. ဧဝမေဝံ မိစ္ဆာဒိဋ္ဌိကဿ ပုရိသပုဂ္ဂလဿ ယဉ္စေဝ ကာယကမ္မံ ယထာဒိဋ္ဌိ သမတ္တံ သမာဒိန္နံ ယဉ္စ ဝစီကမ္မံ။ပေ။ ယဉ္စ မနောကမ္မံ ယထာဒိဋ္ဌိ သမတ္တံ သမာဒိန္နံ၊ ယာ စ စေတနာ ယာ စ ပတ္ထနာ ယော စ ပဏိဓိ ယေ စ သင်္ခါရာ၊ သဗ္ဗေ တေ ဓမ္မာ အနိဋ္ဌာယ အကန္တာယ အမနာပါယ အဟိတာယ ဒုက္ခာယ သံဝတ္တန္တိ. တံ ကိဿ ဟေတု? ဒိဋ္ဌိ ဟိဿ ပါပိကာ အဿာဒဒိဋ္ဌိ မိစ္ဆာဒိဋ္ဌိ.

မိစ္ဆာဒိဋ္ဌိ ဒိဋ္ဌိဂတံ ဒိဋ္ဌိဂဟနံ။ပေ။ ဒိဋ္ဌာဘိနိဝေသော ဒိဋ္ဌိပရာမာသော – ဣမေဟိ အဋ္ဌာရသဟိ အာကာရေဟိ ပရိယုဋ္ဌိတစိတ္တဿ သညောဂေါ.

အတ္ထိ သညောဇနာနိ စေဝ ဒိဋ္ဌိယော စ၊ အတ္ထိ သညောဇနာနိ န စ ဒိဋ္ဌိယော. ကတမာနိ သညောဇနာနိ စေဝ ဒိဋ္ဌိယော စ? သက္ကာယဒိဋ္ဌိ၊ သီလဗ္ဗတပရာမာသော – ဣမာနိ သညောဇနာနိ စေဝ ဒိဋ္ဌိယော စ. ကတမာနိ သညောဇနာနိ၊ န စ ဒိဋ္ဌိယော? ကာမရာဂသညောဇနံ၊ ပဋိဃသညောဇနံ၊ မာနသညောဇနံ၊ ဝိစိကိစ္ဆာသညောဇနံ၊ ဘဝရာဂသညောဇနံ၊ ဣဿာသညောဇနံ၊ မစ္ဆရိယသညောဇနံ၊ အနုနယသညောဇနံ၊ အဝိဇ္ဇာသညောဇနံ – ဣမာနိ သညောဇနာနိ၊ န စ ဒိဋ္ဌိယော. အဿာဒဒိဋ္ဌိယာ ဣမေဟိ ပဉ္စတိံသာယ အာကာရေဟိ အဘိနိဝေသော ဟောတိ.

အဿာဒဒိဋ္ဌိနိဒ္ဒေသော ပဌမော.