၆၉. အာသယာနုသယဉာဏနိဒ္ဒေသော

၁၁၃. ကတမံ တထာဂတဿ သတ္တာနံ အာသယာနုသယေ ဉာဏံ? ဣဓ တထာဂတော သတ္တာနံ အာသယံ ဇာနာတိ၊ အနုသယံ ဇာနာတိ၊ စရိတံ ဇာနာတိ၊ အဓိမုတ္တိံ ဇာနာတိ၊ ဘဗ္ဗာဘဗ္ဗေ သတ္တေ ပဇာနာတိ. ကတမော [ကတမော စ (သျာ. က.)] သတ္တာနံ အာသယော? ‘‘သဿတော လောကော’’တိ ဝါ၊ ‘‘အသဿတော လောကော’’တိ ဝါ၊ ‘‘အန္တဝါ လောကော’’တိ ဝါ၊ ‘‘အနန္တဝါ လောကော’’တိ ဝါ၊ ‘‘တံ ဇီဝံ တံ သရီရ’’န္တိ ဝါ၊ ‘‘အညံ ဇီဝံ အညံ သရီရ’’န္တိ ဝါ၊ ‘‘ဟောတိ တထာဂတော ပရံ မရဏာ’’တိ ဝါ၊ ‘‘န ဟောတိ တထာဂတော ပရံ မရဏာ’’တိ ဝါ၊ ‘‘ဟောတိ စ န စ ဟောတိ တထာဂတော ပရံ မရဏာ’’တိ ဝါ၊ ‘‘နေဝ ဟောတိ န န ဟောတိ တထာဂတော ပရံ မရဏာ’’တိ ဝါ. ဣတိ ဘဝဒိဋ္ဌိသန္နိဿိတာ ဝါ သတ္တာ ဟောန္တိ ဝိဘဝဒိဋ္ဌိသန္နိဿိတာ ဝါ.

ဧတေ ဝါ ပန ဥဘော အန္တေ အနုပဂမ္မ ဣဒပ္ပစ္စယတာပဋိစ္စသမုပ္ပန္နေသု ဓမ္မေသု အနုလောမိကာ ခန္တိ ပဋိလဒ္ဓါ ဟောတိ၊ ယထာဘူတံ ဝါ ဉာဏံ. ကာမံ သေဝန္တညေဝ ဇာနာတိ – ‘‘အယံ ပုဂ္ဂလော ကာမဂရုကော ကာမာသယော ကာမာဓိမုတ္တော’’တိ. ကာမံ သေဝန္တညေဝ ဇာနာတိ – ‘‘အယံ ပုဂ္ဂလော နေက္ခမ္မဂရုကော နေက္ခမ္မာသယော နေက္ခမ္မာဓိမုတ္တော’’တိ. နေက္ခမ္မံ သေဝန္တညေဝ ဇာနာတိ – ‘‘အယံ ပုဂ္ဂလော (နေက္ခမ္မဂရုကော နေက္ခမ္မာသယော နေက္ခမ္မာဓိမုတ္တော’’တိ. နေက္ခမ္မံ သေဝန္တညေဝ ဇာနာတိ – ‘‘အယံ ပုဂ္ဂလော ကာမဂရုကော ကာမာသယော ကာမာဓိမုတ္တော’’တိ. ဗျာပါဒံ သေဝန္တညေဝ ဇာနာတိ) [( ) ဧတ္ထန္တရေ ပါဌာ နတ္ထိ သျာမပေါတ္ထကေ၊ ဧဝမုပရိပိ] – ‘‘အယံ ပုဂ္ဂလော ဗျာပါဒဂရုကော ဗျာပါဒါသယော ဗျာပါဒါဓိမုတ္တော’’တိ. ဗျာပါဒံ သေဝန္တညေဝ ဇာနာတိ – ‘‘အယံ ပုဂ္ဂလော (အဗျာပါဒဂရုကော အဗျာပါဒါသယော အဗျာပါဒါဓိမုတ္တော’’တိ. အဗျာပါဒံ သေဝန္တညေဝ ဇာနာတိ – ‘‘အယံ ပုဂ္ဂလော အဗျာပါဒဂရုကော အဗျာပါဒါသယော အဗျာပါဒါဓိမုတ္တော’’တိ. အဗျာပါဒံ သေဝန္တညေဝ ဇာနာတိ – ‘‘အယံ ပုဂ္ဂလော ဗျာပါဒဂရုကော ဗျာပါဒါသယော ဗျာပါဒါဓိမုတ္တော’’တိ. ထိနမိဒ္ဓံ သေဝန္တညေဝ ဇာနာတိ) – ‘‘အယံ ပုဂ္ဂလော ထိနမိဒ္ဓဂရုကော ထိနမိဒ္ဓါသယော ထိနမိဒ္ဓါဓိမုတ္တော’’တိ. ထိနမိဒ္ဓံ သေဝန္တညေဝ ဇာနာတိ – ‘‘အယံ ပုဂ္ဂလော အာလောကသညာဂရုကော အာလောကသညာသယော အာလောကသညာဓိမုတ္တော’’တိ. အာလောကသညံ သေဝန္တညေဝ ဇာနာတိ – ‘‘အယံ ပုဂ္ဂလော (အာလောကသညာဂရုကော အာလောကသညာသယော အာလောကသညာဓိမုတ္တော’’တိ. အာလောကသညံ သေဝန္တညေဝ ဇာနာတိ – ‘‘အယံ ပုဂ္ဂလော ထိနမိဒ္ဓဂရုကော ထိနမိဒ္ဓါသယော ထိနမိဒ္ဓါဓိမုတ္တော’’တိ.) အယံ သတ္တာနံ အာသယော.

၁၁၄. ကတမော စ သတ္တာနံ အနုသယော? သတ္တာနုသယာ – ကာမရာဂါနုသယော၊ ပဋိဃာနုသယော၊ မာနာနုသယော၊ ဒိဋ္ဌာနုသယော၊ ဝိစိကိစ္ဆာနုသယော၊ ဘဝရာဂါနုသယော၊ အဝိဇ္ဇာနုသယော. ယံ လောကေ ပိယရူပံ သာတရူပံ၊ ဧတ္ထ သတ္တာနံ ကာမရာဂါနုသယော အနုသေတိ. ယံ လောကေ အပ္ပိယရူပံ အသာတရူပံ၊ ဧတ္ထ သတ္တာနံ ပဋိဃာနုသယော အနုသေတိ. ဣတိ ဣမေသု ဒွီသု ဓမ္မေသု အဝိဇ္ဇာ အနုပတိတာ၊ တဒေကဋ္ဌော မာနော စ ဒိဋ္ဌိ စ ဝိစိကိစ္ဆာ စ ဒဋ္ဌဗ္ဗာ. အယံ သတ္တာနံ အနုသယော.

ကတမဉ္စ သတ္တာနံ စရိတံ? ပုညာဘိသင်္ခါရော အပုညာဘိသင်္ခါရော အာနေဉ္ဇာဘိသင်္ခါရော ပရိတ္တဘူမကော ဝါ မဟာဘူမကော ဝါ. ဣဒံ သတ္တာနံ စရိတံ.

၁၁၅. ကတမာ စ သတ္တာနံ အဓိမုတ္တိ? သန္တိ သတ္တာ ဟီနာဓိမုတ္တိကာ၊ သန္တိ သတ္တာ ပဏီတာဓိမုတ္တိကာ. ဟီနာဓိမုတ္တိကာ သတ္တာ ဟီနာဓိမုတ္တိကေ သတ္တေ သေဝန္တိ ဘဇန္တိ ပယိရုပါသန္တိ. ပဏီတာဓိမုတ္တိကာ သတ္တာ ပဏီတာဓိမုတ္တိကေ သတ္တေ သေဝန္တိ ဘဇန္တိ ပယိရုပါသန္တိ. အတီတမ္ပိ အဒ္ဓါနံ ဟီနာဓိမုတ္တိကာ သတ္တာ ဟီနာဓိမုတ္တိကေ သတ္တေ သေဝိံသု ဘဇိံသု ပယိရုပါသိံသု၊ ပဏီတာဓိမုတ္တိကာ သတ္တာ ပဏီတာဓိမုတ္တိကေ သတ္တေ သေဝိံသု ဘဇိံသု ပယိရုပါသိံသု. အနာဂတမ္ပိ အဒ္ဓါနံ ဟီနာဓိမုတ္တိကာ သတ္တာ ဟီနာဓိမုတ္တိကေ သတ္တေ သေဝိဿန္တိ ဘဇိဿန္တိ ပယိရုပါသိဿန္တိ၊ ပဏီတာဓိမုတ္တိကာ သတ္တာ ပဏီတာဓိမုတ္တိကေ သတ္တေ သေဝိဿန္တိ ဘဇိဿန္တိ ပယိရုပါသိဿန္တိ. အယံ သတ္တာနံ အဓိမုတ္တိ.

ကတမေ သတ္တာ အဘဗ္ဗာ? ယေ တေ သတ္တာ ကမ္မာဝရဏေန သမန္နာဂတာ၊ ကိလေသာဝရဏေန သမန္နာဂတာ၊ ဝိပါကာဝရဏေန သမန္နာဂတာ၊ အဿဒ္ဓါ အစ္ဆန္ဒိကာ ဒုပ္ပညာ၊ အဘဗ္ဗာ နိယာမံ ဩက္ကမိတုံ ကုသလေသု ဓမ္မေသု သမ္မတ္တံ – ဣမေ တေ သတ္တာ အဘဗ္ဗာ.

ကတမေ သတ္တာ ဘဗ္ဗာ? ယေ တေ သတ္တာ န ကမ္မာဝရဏေန သမန္နာဂတာ၊ န ကိလေသာဝရဏေန သမန္နာဂတာ၊ န ဝိပါကာဝရဏေန သမန္နာဂတာ၊ သဒ္ဓါ ဆန္ဒိကာ ပညဝန္တော၊ ဘဗ္ဗာ နိယာမံ ဩက္ကမိတုံ ကုသလေသု ဓမ္မေသု သမ္မတ္တံ – ဣမေ တေ သတ္တာ ဘဗ္ဗာ. ဣဒံ တထာဂတဿ သတ္တာနံ အာသယာနုသယေ ဉာဏံ.

အာသယာနုသယဉာဏနိဒ္ဒေသော နဝသဋ္ဌိမော.