၅၁. သောတဓာတုဝိသုဒ္ဓိဉာဏနိဒ္ဒေသော

၁၀၃. ကထံ ဝိတက္ကဝိပ္ဖါရဝသေန နာနတ္တေကတ္တသဒ္ဒနိမိတ္တာနံ ပရိယောဂါဟဏေ ပညာ သောတဓာတုဝိသုဒ္ဓိဉာဏံ? ဣဓ ဘိက္ခု ဆန္ဒသမာဓိ။ပေ။ ဝီရိယသမာဓိ။ စိတ္တသမာဓိ။ ဝီမံသာသမာဓိပဓာနသင်္ခါရသမန္နာဂတံ ဣဒ္ဓိပါဒံ ဘာဝေတိ. သော ဣမေသု စတူသု ဣဒ္ဓိပါဒေသု စိတ္တံ ပရိဘာဝေတိ ပရိဒမေတိ၊ မုဒုံ ကရောတိ ကမ္မနိယံ. သော ဣမေသု စတူသု ဣဒ္ဓိပါဒေသု စိတ္တံ ပရိဘာဝေတွာ ပရိဒမေတွာ၊ မုဒုံ ကရိတွာ ကမ္မနိယံ ဒူရေပိ သဒ္ဒါနံ သဒ္ဒနိမိတ္တံ မနသိ ကရောတိ၊ သန္တိကေပိ သဒ္ဒါနံ သဒ္ဒနိမိတ္တံ မနသိ ကရောတိ၊ ဩဠာရိကာနမ္ပိ သဒ္ဒါနံ သဒ္ဒနိမိတ္တံ မနသိ ကရောတိ၊ သုခုမာနမ္ပိ သဒ္ဒါနံ သဒ္ဒနိမိတ္တံ မနသိ ကရောတိ၊ သဏှသဏှာနမ္ပိ သဒ္ဒါနံ သဒ္ဒနိမိတ္တံ မနသိ ကရောတိ၊ ပုရတ္ထိမာယပိ ဒိသာယ သဒ္ဒါနံ သဒ္ဒနိမိတ္တံ မနသိ ကရောတိ၊ ပစ္ဆိမာယပိ ဒိသာယ သဒ္ဒါနံ သဒ္ဒနိမိတ္တံ မနသိ ကရောတိ၊ ဥတ္တရာယပိ ဒိသာယ သဒ္ဒါနံ သဒ္ဒနိမိတ္တံ မနသိ ကရောတိ၊ ဒက္ခိဏာယပိ ဒိသာယ သဒ္ဒါနံ သဒ္ဒနိမိတ္တံ မနသိ ကရောတိ၊ ပုရတ္ထိမာယပိ အနုဒိသာယ သဒ္ဒါနံ သဒ္ဒနိမိတ္တံ မနသိ ကရောတိ၊ ပစ္ဆိမာယပိ အနုဒိသာယ သဒ္ဒါနံ သဒ္ဒနိမိတ္တံ မနသိ ကရောတိ၊ ဥတ္တရာယပိ အနုဒိသာယ သဒ္ဒါနံ သဒ္ဒနိမိတ္တံ မနသိ ကရောတိ၊ ဒက္ခိဏာယပိ အနုဒိသာယ သဒ္ဒါနံ သဒ္ဒနိမိတ္တံ မနသိ ကရောတိ၊ ဟေဋ္ဌိမာယပိ ဒိသာယ သဒ္ဒါနံ သဒ္ဒနိမိတ္တံ မနသိ ကရောတိ၊ ဥပရိမာယပိ ဒိသာယ သဒ္ဒါနံ သဒ္ဒနိမိတ္တံ မနသိ ကရောတိ. သော တထာဘာဝိတေန စိတ္တေန ပရိသုဒ္ဓေန ပရိယောဒါတေန သောတဓာတုဝိသုဒ္ဓိဉာဏာယ စိတ္တံ အဘိနီဟရတိ အဘိနိန္နာမေတိ. သော ဒိဗ္ဗာယ သောတဓာတုယာ ဝိသုဒ္ဓါယ အတိက္ကန္တမာနုသိကာယ ဥဘော သဒ္ဒေ သုဏာတိ – ဒိဗ္ဗေ စ မာနုသေ စ ယေ ဒူရေ သန္တိကေ စ. တံ ဉာတဋ္ဌေန ဉာဏံ၊ ပဇာနနဋ္ဌေန ပညာ. တေန ဝုစ္စတိ – ‘‘ဝိတက္ကဝိပ္ဖါရဝသေန နာနတ္တေကတ္တသဒ္ဒနိမိတ္တာနံ ပရိယောဂါဟဏေ ပညာ သောတဓာတုဝိသုဒ္ဓိဉာဏံ’’.

သောတဓာတုဝိသုဒ္ဓိဉာဏနိဒ္ဒေသော ဧကပညာသမော.