၃၉. အတ္ထသန္ဒဿနဉာဏနိဒ္ဒေသော

၉၀. ကထံ နာနာဓမ္မပ္ပကာသနတာ ပညာ အတ္ထသန္ဒဿနေ ဉာဏံ? နာနာဓမ္မာတိ ပဉ္စက္ခန္ဓာ၊ ဒွါဒသာယတနာနိ၊ အဋ္ဌာရသ ဓာတုယော၊ ကုသလာ ဓမ္မာ၊ အကုသလာ ဓမ္မာ၊ အဗျာကတာ ဓမ္မာ၊ ကာမာဝစရာ ဓမ္မာ၊ ရူပါဝစရာ ဓမ္မာ၊ အရူပါဝစရာ ဓမ္မာ၊ အပရိယာပန္နာ ဓမ္မာ.

ပကာသနတာတိ ရူပံ အနိစ္စတော ပကာသေတိ၊ ရူပံ ဒုက္ခတော ပကာသေတိ၊ ရူပံ အနတ္တတော ပကာသေတိ. ဝေဒနံ။ပေ။ သညံ။ သင်္ခါရေ။ ဝိညာဏံ။ စက္ခုံ။ပေ။ ဇရာမရဏံ အနိစ္စတော ပကာသေတိ၊ ဇရာမရဏံ ဒုက္ခတော ပကာသေတိ၊ ဇရာမရဏံ အနတ္တတော ပကာသေတိ.

အတ္ထသန္ဒဿနေတိ ကာမစ္ဆန္ဒံ ပဇဟန္တော နေက္ခမ္မတ္ထံ သန္ဒဿေတိ. ဗျာပါဒံ ပဇဟန္တော အဗျာပါဒတ္ထံ သန္ဒဿေတိ. ထိနမိဒ္ဓံ ပဇဟန္တော အာလောကသညတ္ထံ သန္ဒဿေတိ. ဥဒ္ဓစ္စံ ပဇဟန္တော အဝိက္ခေပတ္ထံ သန္ဒဿေတိ. ဝိစိကိစ္ဆံ ပဇဟန္တော ဓမ္မဝဝတ္ထာနတ္ထံ သန္ဒဿေတိ. အဝိဇ္ဇံ ပဇဟန္တော ဉာဏတ္ထံ သန္ဒဿေတိ. အရတိံ ပဇဟန္တော ပါမောဇ္ဇတ္ထံ သန္ဒဿေတိ. နီဝရဏေ ပဇဟန္တော ပဌမဈာနတ္ထံ သန္ဒဿေတိ ။ပေ။ သဗ္ဗကိလေသေ ပဇဟန္တော အရဟတ္တမဂ္ဂတ္ထံ သန္ဒဿေတိ. တံ ဉာတဋ္ဌေန ဉာဏံ၊ ပဇာနနဋ္ဌေန ပညာ. တေန ဝုစ္စတိ – ‘‘နာနာဓမ္မပကာသနတာ ပညာ အတ္ထသန္ဒဿနေ ဉာဏံ’’.

အတ္ထသန္ဒဿနဉာဏနိဒ္ဒေသော နဝတိံသတိမော.