၁၄. ပစ္စဝေက္ခဏဉာဏနိဒ္ဒေသော

၆၅. ကထံ တဒါ သမုဒါဂတေ ဓမ္မေ ပဿနေ ပညာ ပစ္စဝေက္ခဏေ ဉာဏံ? သောတာပတ္တိမဂ္ဂက္ခဏေ ဒဿနဋ္ဌေန သမ္မာဒိဋ္ဌိ တဒါ သမုဒါဂတာ. အဘိနိရောပနဋ္ဌေန သမ္မာသင်္ကပ္ပေါ တဒါ သမုဒါဂတော. ပရိဂ္ဂဟဋ္ဌေန သမ္မာဝါစာ တဒါ သမုဒါဂတာ. သမုဋ္ဌာနဋ္ဌေန သမ္မာကမ္မန္တော တဒါ သမုဒါဂတော. ဝေါဒါနဋ္ဌေန သမ္မာအာဇီဝေါ တဒါ သမုဒါဂတော. ပဂ္ဂဟဋ္ဌေန သမ္မာဝါယာမော တဒါ သမုဒါဂတော. ဥပဋ္ဌာနဋ္ဌေန သမ္မာသတိ တဒါ သမုဒါဂတာ. အဝိက္ခေပဋ္ဌေန သမ္မာသမာဓိ တဒါ သမုဒါဂတော.

ဥပဋ္ဌာနဋ္ဌေန သတိသမ္ဗောဇ္ဈင်္ဂေါ တဒါ သမုဒါဂတော. ပဝိစယဋ္ဌေန ဓမ္မဝိစယသမ္ဗောဇ္ဈင်္ဂေါ တဒါ သမုဒါဂတော. ပဂ္ဂဟဋ္ဌေန ဝီရိယသမ္ဗောဇ္ဈင်္ဂေါ တဒါ သမုဒါဂတော. ဖရဏဋ္ဌေန ပီတိသမ္ဗောဇ္ဈင်္ဂေါ တဒါ သမုဒါဂတော. ဥပသမဋ္ဌေန ပဿဒ္ဓိသမ္ဗောဇ္ဈင်္ဂေါ တဒါ သမုဒါဂတော. အဝိက္ခေပဋ္ဌေန သမာဓိသမ္ဗောဇ္ဈင်္ဂေါ တဒါ သမုဒါဂတော. ပဋိသင်္ခါနဋ္ဌေန ဥပေက္ခာသမ္ဗောဇ္ဈင်္ဂေါ တဒါ သမုဒါဂတော.

အဿဒ္ဓိယေ အကမ္ပိယဋ္ဌေန သဒ္ဓါဗလံ တဒါ သမုဒါဂတံ. ကောသဇ္ဇေ အကမ္ပိယဋ္ဌေန ဝီရိယဗလံ တဒါ သမုဒါဂတံ. ပမာဒေ အကမ္ပိယဋ္ဌေန သတိဗလံ တဒါ သမုဒါဂတံ. ဥဒ္ဓစ္စေ အကမ္ပိယဋ္ဌေန သမာဓိဗလံ တဒါ သမုဒါဂတံ. အဝိဇ္ဇာယ အကမ္ပိယဋ္ဌေန ပညာဗလံ တဒါ သမုဒါဂတံ.

အဓိမောက္ခဋ္ဌေန သဒ္ဓိန္ဒြိယံ တဒါ သမုဒါဂတံ. ပဂ္ဂဟဋ္ဌေန ဝီရိယိန္ဒြိယံ တဒါ သမုဒါဂတံ. ဥပဋ္ဌာနဋ္ဌေန သတိန္ဒြိယံ တဒါ သမုဒါဂတံ. အဝိက္ခေပဋ္ဌေန သမာဓိန္ဒြိယံ တဒါ သမုဒါဂတံ. ဒဿနဋ္ဌေန ပညိန္ဒြိယံ တဒါ သမုဒါဂတံ.

အာဓိပတေယျဋ္ဌေန ဣန္ဒြိယာ တဒါ သမုဒါဂတာ. အကမ္ပိယဋ္ဌေန ဗလာ တဒါ သမုဒါဂတာ. နိယျာနဋ္ဌေန သမ္ဗောဇ္ဈင်္ဂါ တဒါ သမုဒါဂတာ. ဟေတုဋ္ဌေန မဂ္ဂေါ တဒါ သမုဒါဂတော. ဥပဋ္ဌာနဋ္ဌေန သတိပဋ္ဌာနာ တဒါ သမုဒါဂတာ. ပဒဟနဋ္ဌေန သမ္မပ္ပဓာနာ တဒါ သမုဒါဂတာ. ဣဇ္ဈနဋ္ဌေန ဣဒ္ဓိပါဒါ တဒါ သမုဒါဂတာ. တထဋ္ဌေန သစ္စာ တဒါ သမုဒါဂတာ. အဝိက္ခေပဋ္ဌေန သမထော တဒါ သမုဒါဂတော. အနုပဿနဋ္ဌေန ဝိပဿနာ တဒါ သမုဒါဂတာ. ဧကရသဋ္ဌေန သမထဝိပဿနာ တဒါ သမုဒါဂတာ. အနတိဝတ္တနဋ္ဌေန ယုဂနဒ္ဓံ တဒါ သမုဒါဂတံ. သံဝရဋ္ဌေန သီလဝိသုဒ္ဓိ တဒါ သမုဒါဂတာ. အဝိက္ခေပဋ္ဌေန စိတ္တဝိသုဒ္ဓိ တဒါ သမုဒါဂတာ. ဒဿနဋ္ဌေန ဒိဋ္ဌိဝိသုဒ္ဓိ တဒါ သမုဒါဂတာ. ဝိမုတ္တဋ္ဌေန ဝိမောက္ခော တဒါ သမုဒါဂတော. ပဋိဝေဓဋ္ဌေန ဝိဇ္ဇာ တဒါ သမုဒါဂတာ. ပရိစ္စာဂဋ္ဌေန ဝိမုတ္တိ တဒါ သမုဒါဂတာ. သမုစ္ဆေဒဋ္ဌေန ခယေ ဉာဏံ တဒါ သမုဒါဂတံ.

ဆန္ဒော မူလဋ္ဌေန တဒါ သမုဒါဂတော. မနသိကာရော သမုဋ္ဌာနဋ္ဌေန တဒါ သမုဒါဂတော. ဖဿော သမောဓာနဋ္ဌေန တဒါ သမုဒါဂတော. ဝေဒနာ သမောသရဏဋ္ဌေန တဒါ သမုဒါဂတာ. သမာဓိ ပမုခဋ္ဌေန တဒါ သမုဒါဂတော. သတိ အာဓိပတေယျဋ္ဌေန တဒါ သမုဒါဂတာ. ပညာ တဒုတ္တရဋ္ဌေန တဒါ သမုဒါဂတာ. ဝိမုတ္တိ သာရဋ္ဌေန တဒါ သမုဒါဂတာ. အမတောဂဓံ နိဗ္ဗာနံ ပရိယောသာနဋ္ဌေန တဒါ သမုဒါဂတံ. ဝုဋ္ဌဟိတွာ ပစ္စဝေက္ခတိ၊ ဣမေ ဓမ္မာ တဒါ သမုဒါဂတာ.

သောတာပတ္တိဖလက္ခဏေ ဒဿနဋ္ဌေန သမ္မာဒိဋ္ဌိ တဒါ သမုဒါဂတာ. အဘိနိရောပနဋ္ဌေန သမ္မာသင်္ကပ္ပေါ တဒါ သမုဒါဂတော။ပေ။ ပဋိပ္ပဿဒ္ဓဋ္ဌေန အနုပ္ပါဒေ ဉာဏံ တဒါ သမုဒါဂတံ. ဆန္ဒော မူလဋ္ဌေန တဒါ သမုဒါဂတော. မနသိကာရော သမုဋ္ဌာနဋ္ဌေန တဒါ သမုဒါဂတော. ဖဿော သမောဓာနဋ္ဌေန တဒါ သမုဒါဂတော. ဝေဒနာ သမောသရဏဋ္ဌေန တဒါ သမုဒါဂတာ. သမာဓိ ပမုခဋ္ဌေန တဒါ သမုဒါဂတော. သတိ အာဓိပတေယျဋ္ဌေန တဒါ သမုဒါဂတာ. ပညာ တဒုတ္တရဋ္ဌေန တဒါ သမုဒါဂတာ. ဝိမုတ္တိ သာရဋ္ဌေန တဒါ သမုဒါဂတာ. အမတောဂဓံ နိဗ္ဗာနံ ပရိယောသာနဋ္ဌေန တဒါ သမုဒါဂတံ. ဝုဋ္ဌဟိတွာ ပစ္စဝေက္ခတိ၊ ဣမေ ဓမ္မာ တဒါ သမုဒါဂတာ.

သကဒါဂါမိမဂ္ဂက္ခဏေ။ပေ။ သကဒါဂါမိဖလက္ခဏေ။ပေ။ အနာဂါမိမဂ္ဂက္ခဏေ။ပေ။ အနာဂါမိဖလက္ခဏေ။ပေ။ အရဟတ္တမဂ္ဂက္ခဏေ ဒဿနဋ္ဌေန သမ္မာဒိဋ္ဌိ တဒါ သမုဒါဂတာ။ပေ။ သမုစ္ဆေဒဋ္ဌေန ခယေ ဉာဏံ တဒါ သမုဒါဂတံ. ဆန္ဒော မူလဋ္ဌေန တဒါ သမုဒါဂတော။ပေ။ အမတောဂဓံ နိဗ္ဗာနံ ပရိယောသာနဋ္ဌေန တဒါ သမုဒါဂတံ. ဝုဋ္ဌဟိတွာ ပစ္စဝေက္ခတိ၊ ဣမေ ဓမ္မာ တဒါ သမုဒါဂတာ.

အရဟတ္တဖလက္ခဏေ ဒဿနဋ္ဌေန သမ္မာဒိဋ္ဌိ တဒါ သမုဒါဂတာ ။ပေ။ ပဋိပ္ပဿဒ္ဓဋ္ဌေန အနုပ္ပါဒေ ဉာဏံ တဒါ သမုဒါဂတံ. ဆန္ဒော မူလဋ္ဌေန တဒါ သမုဒါဂတော ။ပေ။ အမတောဂဓံ နိဗ္ဗာနံ ပရိယောသာနဋ္ဌေန တဒါ သမုဒါဂတံ. ဝုဋ္ဌဟိတွာ ပစ္စဝေက္ခတိ၊ ဣမေ ဓမ္မာ တဒါ သမုဒါဂတာ. တံ ဉာတဋ္ဌေန ဉာဏံ၊ ပဇာနနဋ္ဌေန ပညာ. တေန ဝုစ္စတိ – ‘‘တဒါ သမုဒါဂတေ ဓမ္မေ ပဿနေ ပညာ ပစ္စဝေက္ခဏေ ဉာဏံ’’.

ပစ္စဝေက္ခဏဉာဏနိဒ္ဒေသော စုဒ္ဒသမော.