၁၀. ဂေါတြဘုဉာဏနိဒ္ဒေသော

၅၉. ကထံ ဗဟိဒ္ဓါ ဝုဋ္ဌာနဝိဝဋ္ဋနေ ပညာ ဂေါတြဘုဉာဏံ? ဥပ္ပါဒံ အဘိဘုယျတီတိ – ဂေါတြဘု. ပဝတ္တံ အဘိဘုယျတီတိ – ဂေါတြဘု. နိမိတ္တံ အဘိဘုယျတီတိ – ဂေါတြဘု. အာယူဟနံ အဘိဘုယျတီတိ – ဂေါတြဘု. ပဋိသန္ဓိံ အဘိဘုယျတီတိ – ဂေါတြဘု. ဂတိံ အဘိဘုယျတီတိ – ဂေါတြဘု. နိဗ္ဗတ္တိံ အဘိဘုယျတီတိ – ဂေါတြဘု. ဥပပတ္တိံ အဘိဘုယျတီတိ – ဂေါတြဘု. ဇာတိံ အဘိဘုယျတီတိ – ဂေါတြဘု. ဇရံ အဘိဘုယျတီတိ – ဂေါတြဘု. ဗျာဓိံ အဘိဘုယျတီတိ – ဂေါတြဘု. မရဏံ အဘိဘုယျတီတိ – ဂေါတြဘု. သောကံ အဘိဘုယျတီတိ – ဂေါတြဘု. ပရိဒေဝံ အဘိဘုယျတီတိ – ဂေါတြဘု. ဥပါယာသံ အဘိဘုယျတီတိ – ဂေါတြဘု. ဗဟိဒ္ဓါ သင်္ခါရနိမိတ္တံ အဘိဘုယျတီတိ – ဂေါတြဘု. အနုပ္ပါဒံ ပက္ခန္ဒတီတိ – ဂေါတြဘု. အပ္ပဝတ္တံ ပက္ခန္ဒတီတိ – ဂေါတြဘု။ပေ။ နိရောဓံ နိဗ္ဗာနံ ပက္ခန္ဒတီတိ – ဂေါတြဘု.

ဥပ္ပါဒံ အဘိဘုယျိတွာ အနုပ္ပါဒံ ပက္ခန္ဒတီတိ – ဂေါတြဘု. ပဝတ္တံ အဘိဘုယျိတွာ အပ္ပဝတ္တံ ပက္ခန္ဒတီတိ – ဂေါတြဘု. နိမိတ္တံ အဘိဘုယျိတွာ အနိမိတ္တံ ပက္ခန္ဒတီတိ – ဂေါတြဘု ။ပေ။ ဗဟိဒ္ဓါ သင်္ခါရနိမိတ္တံ အဘိဘုယျိတွာ နိရောဓံ နိဗ္ဗာနံ ပက္ခန္ဒတီတိ – ဂေါတြဘု.

ဥပ္ပါဒါ ဝုဋ္ဌာတီတိ – ဂေါတြဘု. ပဝတ္တာ ဝုဋ္ဌာတီတိ – ဂေါတြဘု. နိမိတ္တာ ဝုဋ္ဌာတီတိ – ဂေါတြဘု. အာယူဟနာ ဝုဋ္ဌာတီတိ – ဂေါတြဘု. ပဋိသန္ဓိယာ ဝုဋ္ဌာတီတိ – ဂေါတြဘု. ဂတိယာ ဝုဋ္ဌာတီတိ – ဂေါတြဘု. နိဗ္ဗတ္တိယာ ဝုဋ္ဌာတီတိ – ဂေါတြဘု. ဥပပတ္တိယာ ဝုဋ္ဌာတီတိ – ဂေါတြဘု. ဇာတိယာ ဝုဋ္ဌာတီတိ – ဂေါတြဘု. ဇရာယ ဝုဋ္ဌာတီတိ – ဂေါတြဘု. ဗျာဓိမှာ ဝုဋ္ဌာတီတိ – ဂေါတြဘု. မရဏာ ဝုဋ္ဌာတီတိ – ဂေါတြဘု. သောကာ ဝုဋ္ဌာတီတိ – ဂေါတြဘု. ပရိဒေဝါ ဝုဋ္ဌာတီတိ – ဂေါတြဘု. ဥပါယာသာ ဝုဋ္ဌာတီတိ – ဂေါတြဘု. ဗဟိဒ္ဓါ သင်္ခါရနိမိတ္တာ ဝုဋ္ဌာတီတိ – ဂေါတြဘု. အနုပ္ပါဒံ ပက္ခန္ဒတီတိ – ဂေါတြဘု. အပ္ပဝတ္တံ ပက္ခန္ဒတီတိ – ဂေါတြဘု။ပေ။ နိရောဓံ နိဗ္ဗာနံ ပက္ခန္ဒတီတိ – ဂေါတြဘု.

ဥပ္ပါဒါ ဝုဋ္ဌဟိတွာ [ဝုဋ္ဌိတွာ (သျာ. က.)] အနုပ္ပါဒံ ပက္ခန္ဒတီတိ – ဂေါတြဘု. ပဝတ္တာ ဝုဋ္ဌဟိတွာ အပ္ပဝတ္တံ ပက္ခန္ဒတီတိ – ဂေါတြဘု. နိမိတ္တာ ဝုဋ္ဌဟိတွာ အနိမိတ္တံ ပက္ခန္ဒတီတိ – ဂေါတြဘု. အာယူဟနာ ဝုဋ္ဌဟိတွာ အနာယူဟနံ ပက္ခန္ဒတီတိ – ဂေါတြဘု. ပဋိသန္ဓိယာ ဝုဋ္ဌဟိတွာ အပ္ပဋိသန္ဓိံ ပက္ခန္ဒတီတိ – ဂေါတြဘု. ဂတိယာ ဝုဋ္ဌဟိတွာ အဂတိံ ပက္ခန္ဒတီတိ – ဂေါတြဘု. နိဗ္ဗတ္တိယာ ဝုဋ္ဌဟိတွာ အနိဗ္ဗတ္တိံ ပက္ခန္ဒတီတိ – ဂေါတြဘု. ဥပပတ္တိယာ ဝုဋ္ဌဟိတွာ အနုပပတ္တိံ ပက္ခန္ဒတီတိ – ဂေါတြဘု. ဇာတိယာ ဝုဋ္ဌဟိတွာ အဇာတိံ ပက္ခန္ဒတီတိ – ဂေါတြဘု. ဇရာယ ဝုဋ္ဌဟိတွာ အဇရံ ပက္ခန္ဒတီတိ – ဂေါတြဘု. ဗျာဓိမှာ ဝုဋ္ဌဟိတွာ အဗျာဓိံ ပက္ခန္ဒတီတိ – ဂေါတြဘု. မရဏာ ဝုဋ္ဌဟိတွာ အမတံ ပက္ခန္ဒတီတိ – ဂေါတြဘု. သောကာ ဝုဋ္ဌဟိတွာ အသောကံ ပက္ခန္ဒတီတိ – ဂေါတြဘု. ပရိဒေဝါ ဝုဋ္ဌဟိတွာ အပရိဒေဝံ ပက္ခန္ဒတီတိ – ဂေါတြဘု. ဥပါယာသာ ဝုဋ္ဌဟိတွာ အနုပါယာသံ ပက္ခန္ဒတီတိ – ဂေါတြဘု. ဗဟိဒ္ဓါ သင်္ခါရနိမိတ္တာ ဝုဋ္ဌဟိတွာ နိရောဓံ နိဗ္ဗာနံ ပက္ခန္ဒတီတိ – ဂေါတြဘု.

ဥပ္ပါဒါ ဝိဝဋ္ဋတီတိ – ဂေါတြဘု. ပဝတ္တာ ဝိဝဋ္ဋတီတိ – ဂေါတြဘု။ပေ။ ဗဟိဒ္ဓါ သင်္ခါရနိမိတ္တာ ဝိဝဋ္ဋတီတိ – ဂေါတြဘု. အနုပ္ပါဒံ ပက္ခန္ဒတီတိ – ဂေါတြဘု. အပ္ပဝတ္တံ ပက္ခန္ဒတီတိ – ဂေါတြဘု။ပေ။ နိရောဓံ နိဗ္ဗာနံ ပက္ခန္ဒတီတိ – ဂေါတြဘု.

ဥပ္ပါဒါ ဝိဝဋ္ဋိတွာ အနုပ္ပါဒံ ပက္ခန္ဒတီတိ – ဂေါတြဘု. ပဝတ္တာ ဝိဝဋ္ဋိတွာ အပ္ပဝတ္တံ ပက္ခန္ဒတီတိ – ဂေါတြဘု။ပေ။ ဗဟိဒ္ဓါ သင်္ခါရနိမိတ္တာ ဝိဝဋ္ဋိတွာ နိရောဓံ နိဗ္ဗာနံ ပက္ခန္ဒတီတိ – ဂေါတြဘု.

၆၀. ကတိ ဂေါတြဘူ ဓမ္မာ သမထဝသေန ဥပ္ပဇ္ဇန္တိ? ကတိ ဂေါတြဘူ ဓမ္မာ ဝိပဿနာဝသေန ဥပ္ပဇ္ဇန္တိ? အဋ္ဌ ဂေါတြဘူ ဓမ္မာ သမထဝသေန ဥပ္ပဇ္ဇန္တိ. ဒသ ဂေါတြဘူ ဓမ္မာ ဝိပဿနာဝသေန ဥပ္ပဇ္ဇန္တိ.

ကတမေ အဋ္ဌ ဂေါတြဘူ ဓမ္မာ သမထဝသေန ဥပ္ပဇ္ဇန္တိ? ပဌမံ ဈာနံ ပဋိလာဘတ္ထာယ နီဝရဏေ အဘိဘုယျတီတိ – ဂေါတြဘု. ဒုတိယံ ဈာနံ ပဋိလာဘတ္ထာယ ဝိတက္ကဝိစာရေ အဘိဘုယျတီတိ – ဂေါတြဘု. တတိယံ ဈာနံ ပဋိလာဘတ္ထာယ ပီတိံ အဘိဘုယျတီတိ – ဂေါတြဘု. စတုတ္ထံ ဈာနံ ပဋိလာဘတ္ထာယ သုခဒုက္ခေ အဘိဘုယျတီတိ – ဂေါတြဘု. အာကာသာနဉ္စာယတနသမာပတ္တိံ ပဋိလာဘတ္ထာယ ရူပသညံ ပဋိဃသညံ နာနတ္တသညံ အဘိဘုယျတီတိ – ဂေါတြဘု. ဝိညာဏဉ္စာယတနသမာပတ္တိံ ပဋိလာဘတ္ထာယ အာကာသာနဉ္စာယတနသညံ အဘိဘုယျတီတိ – ဂေါတြဘု. အာကိဉ္စညာယတနသမာပတ္တိံ ပဋိလာဘတ္ထာယ ဝိညာဏဉ္စာယတနသညံ အဘိဘုယျတီတိ – ဂေါတြဘု. နေဝသညာနာသညာယတနသမာပတ္တိံ ပဋိလာဘတ္ထာယ အာကိဉ္စညာယတနသညံ အဘိဘုယျတီတိ – ဂေါတြဘု. ဣမေ အဋ္ဌ ဂေါတြဘူ ဓမ္မာ သမထဝသေန ဥပ္ပဇ္ဇန္တိ.

ကတမေ ဒသ ဂေါတြဘူ ဓမ္မာ ဝိပဿနာဝသေန ဥပ္ပဇ္ဇန္တိ? သောတာပတ္တိမဂ္ဂံ ပဋိလာဘတ္ထာယ ဥပ္ပါဒံ ပဝတ္တံ နိမိတ္တံ အာယူဟနံ ပဋိသန္ဓိံ ဂတိံ နိဗ္ဗတ္တိံ ဥပပတ္တိံ ဇာတိံ ဇရံ ဗျာဓိံ မရဏံ သောကံ ပရိဒေဝံ ဥပါယာသံ ဗဟိဒ္ဓါ သင်္ခါရနိမိတ္တံ အဘိဘုယျတီတိ – ဂေါတြဘု. သောတာပတ္တိဖလသမာပတ္တတ္ထာယ ဥပ္ပါဒံ ပဝတ္တံ နိမိတ္တံ အာယူဟနံ ပဋိသန္ဓိံ။ပေ။ အဘိဘုယျတီတိ – ဂေါတြဘု. သကဒါဂါမိမဂ္ဂံ ပဋိလာဘတ္ထာယ။ပေ။ သကဒါဂါမိဖလသမာပတ္တတ္ထာယ။ အနာဂါမိမဂ္ဂံ ပဋိလာဘတ္ထာယ။ အနာဂါမိဖလသမာပတ္တတ္ထာယ။ အရဟတ္တမဂ္ဂံ ပဋိလာဘတ္ထာယ ဥပ္ပါဒံ ပဝတ္တံ နိမိတ္တံ အာယူဟနံ ပဋိသန္ဓိံ ဂတိံ နိဗ္ဗတ္တိံ ဥပပတ္တိံ ဇာတိံ ဇရံ ဗျာဓိံ မရဏံ သောကံ ပရိဒေဝံ ဥပါယာသံ ဗဟိဒ္ဓါ သင်္ခါရနိမိတ္တံ အဘိဘုယျတီတိ – ဂေါတြဘု. အရဟတ္တဖလသမာပတ္တတ္ထာယ။ သုညတဝိဟာရသမာပတ္တတ္ထာယ။ အနိမိတ္တဝိဟာရသမာပတ္တတ္ထာယ ဥပ္ပါဒံ ပဝတ္တံ နိမိတ္တံ အာယူဟနံ ပဋိသန္ဓိံ။ပေ။ အဘိဘုယျတီတိ – ဂေါတြဘု. ဣမေ ဒသ ဂေါတြဘူ ဓမ္မာ ဝိပဿနာဝသေန ဥပ္ပဇ္ဇန္တိ.

ကတိ ဂေါတြဘူ ဓမ္မာ ကုသလာ၊ ကတိ အကုသလာ၊ ကတိ အဗျာကတာ? ပန္နရသ ဂေါတြဘူ ဓမ္မာ ကုသလာ၊ တယော ဂေါတြဘူ ဓမ္မာ အဗျာကတာ. နတ္ထိ ဂေါတြဘူ ဓမ္မာ အကုသလာတိ.

သာမိသဉ္စ နိရာမိသံ၊ ပဏိဟိတဉ္စ အပ္ပဏိဟိတံ၊

သညုတ္တဉ္စ ဝိသညုတ္တံ၊ ဝုဋ္ဌိတဉ္စ အဝုဋ္ဌိတံ.

အဋ္ဌ သမာဓိဿ ပစ္စယာ၊ ဒသ ဉာဏဿ ဂေါစရာ၊

အဋ္ဌာရသ ဂေါတြဘူ ဓမ္မာ၊ တိဏ္ဏံ ဝိမောက္ခာန ပစ္စယာ.

ဣမေ အဋ္ဌာရသာကာရာ၊ ပညာ ယဿ ပရိစ္စိတာ၊

ကုသလော ဝိဝဋ္ဋေ ဝုဋ္ဌာနေ၊ နာနာဒိဋ္ဌီသု န ကမ္ပတီတိ.

တံ ဉာတဋ္ဌေန ဉာဏံ၊ ပဇာနနဋ္ဌေန ပညာ. တေန ဝုစ္စတိ – ‘‘ဗဟိဒ္ဓါ ဝုဋ္ဌာနဝိဝဋ္ဋနေ ပညာ ဂေါတြဘုဉာဏံ’’.

ဂေါတြဘုဉာဏနိဒ္ဒေသော ဒသမော.