တတ္ထိမာ ဥဒ္ဒါနဂါထာ

အဝိဇ္ဇာယ နိဝုတော လောကော၊ စိတ္တံ သံယောဇနမ္ပိ၊

သာ ပစ္ဆိန္နဘဝတဏှာ၊ ဒွေမာ စေဝ ဝိမုတ္တိယော.

ကုမ္ဘူပမံ ကာယမိမံ၊ ယံ န တုမှာကံ တံ ပဇဟ [ဇဟာ (ပီ. က.)]၊

ယေ ကေစိ သောကပရိဒေဝါ၊ တိမ္ဗရုကော စ သယံကတံ.

ဒုက္ခံ ဒိဋ္ဌိ စ ဥပ္ပန္နံ၊ ယဉ္စ ဂေါပါလကောပမံ၊

သတိ ကာယဂတာ မာဟု၊ သမထော စ ဝိပဿနာ.

အာသာ ပိဟာ စ အဘိနန္ဒနာ စ၊ စတုန္နမနနုဗောဓနာ၊

ယာနိ သောတာနိ လောကသ္မိံ၊ ဒဠှံ နေမိယာနာကာရော.

ယံ နိဿိတဿ စလိတံ၊ အနုပဋ္ဌိတကာယဂတာသတိ၊

သယံ ကတေန သစ္စေန၊ ဝိမုတ္တာယတနေဟိ စ.

ပေဋကောပဒေသေ မဟာကစ္စာယနေန ဘာသိတေ ပဌမဘူမိ အရိယသစ္စပ္ပကာသနာ နာတံ ဇီဝတာ ဘဂဝတာ မာဒိသေန သမုဒ္ဒနေန တထာဂတေနာတိ.