၄. ပဝနင်္ဂပဉှော

၄. ‘‘ဘန္တေ နာဂသေန၊ ‘ပဝနဿ ပဉ္စ အင်္ဂါနိ ဂဟေတဗ္ဗာနီ’တိ ယံ ဝဒေသိ၊ ကတမာနိ တာနိ ပဉ္စ အင်္ဂါနိ ဂဟေတဗ္ဗာနီ’’တိ? ‘‘ယထာ၊ မဟာရာဇ၊ ပဝနံ နာမ အသုစိဇနံ ပဋိစ္ဆာဒေတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ပရေသံ အပရဒ္ဓံ ခလိတံ ပဋိစ္ဆာဒေတဗ္ဗံ န ဝိဝရိတဗ္ဗံ. ဣဒံ၊ မဟာရာဇ၊ ပဝနဿ ပဌမံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ ပဝနံ သုညံ ပစုရဇနေဟိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ရာဂဒေါသမောဟမာနဒိဋ္ဌိဇာလေဟိ သဗ္ဗေဟိ စ ကိလေသေဟိ သုညေန ဘဝိတဗ္ဗံ. ဣဒံ၊ မဟာရာဇ၊ ပဝနဿ ဒုတိယံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ ပဝနံ ဝိဝိတ္တံ ဇနသမ္ဗာဓရဟိတံ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ပါပကေဟိ အကုသလေဟိ ဓမ္မေဟိ အနရိယေဟိ ပဝိဝိတ္တေန ဘဝိတဗ္ဗံ. ဣဒံ၊ မဟာရာဇ၊ ပဝနဿ တတိယံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ ပဝနံ သန္တံ ပရိသုဒ္ဓံ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန သန္တေန ပရိသုဒ္ဓေန ဘဝိတဗ္ဗံ၊ နိဗ္ဗုတေန ပဟီနမာနေန ပဟီနမက္ခေန ဘဝိတဗ္ဗံ. ဣဒံ၊ မဟာရာဇ၊ ပဝနဿ စတုတ္ထံ အင်္ဂံ ဂဟေတဗ္ဗံ.

‘‘ပုန စပရံ၊ မဟာရာဇ၊ ပဝနံ အရိယဇနသံသေဝိတံ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန အရိယဇနသံသေဝိတေန ဘဝိတဗ္ဗံ. ဣဒံ၊ မဟာရာဇ၊ ပဝနဿ ပဉ္စမံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ဘဂဝတာ ဒေဝါတိဒေဝေန သံယုတ္တနိကာယဝရေ –

‘‘‘ပဝိဝိတ္တေဟိ အရိယေဟိ၊ ပဟိတတ္တေဟိ ဈာယိဘိ၊

နိစ္စံ အာရဒ္ဓဝီရိယေဟိ၊ ပဏ္ဍိတေဟိ သဟာဝသေ’’’တိ.

ပဝနင်္ဂပဉှော စတုတ္ထော.