၁. ပန္ထမက္ကဋကင်္ဂပဉှော

၁. ‘‘ဘန္တေ နာဂသေန၊ ‘ပန္ထမက္ကဋကဿ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ၊ ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ၊ မဟာရာဇ၊ ပန္ထမက္ကဋကော ပန္ထေ မက္ကဋဇာလဝိတာနံ ကတွာ ယဒိ တတ္ထ ဇာလကေ လဂ္ဂတိ ကိမိ ဝါ မက္ခိကာ ဝါ ပဋင်္ဂေါ ဝါ၊ တံ ဂဟေတွာ ဘက္ခယတိ၊ ဧဝမေဝ ခေါ၊ မဟာရာဇ၊ ယောဂိနာ ယောဂါဝစရေန ဆသု ဒွါရေသု သတိပဋ္ဌာနဇာလဝိတာနံ ကတွာ ယဒိ တတ္ထ ကိလေသမက္ခိကာ ဗဇ္ဈန္တိ၊ တတ္ထေဝ ဃာတေတဗ္ဗာ. ဣဒံ၊ မဟာရာဇ၊ ပန္ထမက္ကဋကဿ ဧကံ အင်္ဂံ ဂဟေတဗ္ဗံ. ဘာသိတမ္ပေတံ၊ မဟာရာဇ၊ ထေရေန အနုရုဒ္ဓေန –

‘‘‘စိတ္တံ နိယမေ ဆသု ဒွါရေသု၊ သတိပဋ္ဌာနဝရုတ္တမေ၊

ကိလေသာ တတ္ထ လဂ္ဂါ စေ၊ ဟန္တဗ္ဗာ တေ ဝိပဿိနာ’’’တိ.

ပန္ထမက္ကဋကင်္ဂပဉှော ပဌမော.