၈. နိဓိကဏ္ဍသုတ္တံ

၁. နိဓိံ နိဓေတိ ပုရိသော၊ ဂမ္ဘီရေ ဩဒကန္တိကေ၊

အတ္ထေ ကိစ္စေ သမုပ္ပန္နေ၊ အတ္ထာယ မေ ဘဝိဿတိ.

၂. ရာဇတော ဝါ ဒုရုတ္တဿ၊ စောရတော ပီဠိတဿ ဝါ၊

ဣဏဿ ဝါ ပမောက္ခာယ၊ ဒုဗ္ဘိက္ခေ အာပဒါသု ဝါ၊

ဧတဒတ္ထာယ လောကသ္မိံ၊ နိဓိ နာမ နိဓီယတိ.

၃. တာဝဿုနိဟိတော [တာဝ သုနိဟိတော (သီ.)] သန္တော၊ ဂမ္ဘီရေ ဩဒကန္တိကေ၊

န သဗ္ဗော သဗ္ဗဒါ ဧဝ၊ တဿ တံ ဥပကပ္ပတိ.

၄. နိဓိ ဝါ ဌာနာ စဝတိ၊ သညာ ဝါဿ ဝိမုယှတိ၊

နာဂါ ဝါ အပနာမေန္တိ၊ ယက္ခာ ဝါပိ ဟရန္တိ နံ.

၅. အပ္ပိယာ ဝါပိ ဒါယာဒါ၊ ဥဒ္ဓရန္တိ အပဿတော၊

ယဒါ ပုညက္ခယော ဟောတိ၊ သဗ္ဗမေတံ ဝိနဿတိ.

၆. ယဿ ဒါနေန သီလေန၊ သံယမေန ဒမေန စ၊

နိဓီ သုနိဟိတော ဟောတိ၊ ဣတ္ထိယာ ပုရိသဿ ဝါ.

၇. စေတိယမှိ စ သံဃေ ဝါ၊ ပုဂ္ဂလေ အတိထီသု ဝါ၊

မာတရိ ပိတရိ စာပိ [ဝါပိ (သျာ. ကံ.)]၊ အထော ဇေဋ္ဌမှိ ဘာတရိ.

၈. ဧသော နိဓိ သုနိဟိတော၊ အဇေယျော အနုဂါမိကော၊

ပဟာယ ဂမနီယေသု၊ ဧတံ အာဒါယ ဂစ္ဆတိ.

၉. အသာဓာရဏမညေသံ၊ အစောရာဟရဏော နိဓိ၊

ကယိရာထ ဓီရော ပုညာနိ၊ ယော နိဓိ အနုဂါမိကော.

၁၀. ဧသ ဒေဝမနုဿာနံ၊ သဗ္ဗကာမဒဒေါ နိဓိ၊

ယံ ယဒေဝါဘိပတ္ထေန္တိ၊ သဗ္ဗမေတေန လဗ္ဘတိ.

၁၁. သုဝဏ္ဏတာ သုသရတာ၊ သုသဏ္ဌာနာ သုရူပတာ [သုသဏ္ဌာနသုရူပတာ (သီ.)၊ သုသဏ္ဌာနံ သုရူပတာ (သျာ. ကံ.)]၊

အာဓိပစ္စပရိဝါရော၊ သဗ္ဗမေတေန လဗ္ဘတိ.

၁၂. ပဒေသရဇ္ဇံ ဣဿရိယံ၊ စက္ကဝတ္တိသုခံ ပိယံ၊

ဒေဝရဇ္ဇမ္ပိ ဒိဗ္ဗေသု၊ သဗ္ဗမေတေန လဗ္ဘတိ.

၁၃. မာနုဿိကာ စ သမ္ပတ္တိ၊ ဒေဝလောကေ စ ယာ ရတိ၊

ယာ စ နိဗ္ဗာနသမ္ပတ္တိ၊ သဗ္ဗမေတေန လဗ္ဘတိ.

၁၄. မိတ္တသမ္ပဒမာဂမ္မ၊ ယောနိသောဝ [ယောနိသော ဝေ (သီ.)၊ ယောနိသော စေ (သျာ.)၊ ယောနိသော စ (?)] ပယုဉ္ဇတော၊

ဝိဇ္ဇာ ဝိမုတ္တိ ဝသီဘာဝေါ၊ သဗ္ဗမေတေန လဗ္ဘတိ.

၁၅. ပဋိသမ္ဘိဒါ ဝိမောက္ခာ စ၊ ယာ စ သာဝကပါရမီ၊

ပစ္စေကဗောဓိ ဗုဒ္ဓဘူမိ၊ သဗ္ဗမေတေန လဗ္ဘတိ.

၁၆. ဧဝံ မဟတ္ထိကာ ဧသာ၊ ယဒိဒံ ပုညသမ္ပဒါ၊

တသ္မာ ဓီရာ ပသံသန္တိ၊ ပဏ္ဍိတာ ကတပုညတန္တိ.

နိဓိကဏ္ဍသုတ္တံ နိဋ္ဌိတံ.