၆. တေမိယစရိယာ

၄၈. ‘‘ပုနာပရံ ယဒါ ဟောမိ၊ ကာသိရာဇဿ အတြဇော၊

မူဂပက္ခောတိ နာမေန၊ တေမိယောတိ ဝဒန္တိ မံ.

၄၉. ‘‘သောဠသိတ္ထိသဟဿာနံ၊ န ဝိဇ္ဇတိ ပုမော တဒါ [သဒါ (သီ.)]၊

အဟောရတ္တာနံ အစ္စယေန၊ နိဗ္ဗတ္တော အဟမေကကော.

၅၀. ‘‘ကိစ္ဆာ လဒ္ဓံ ပိယံ ပုတ္တံ၊ အဘိဇာတံ ဇုတိန္ဓရံ၊

သေတစ္ဆတ္တံ ဓာရယိတွာန၊ သယနေ ပေါသေတိ မံ ပိတာ.

၅၁. ‘‘နိဒ္ဒါယမာနော သယနဝရေ၊ ပဗုဇ္ဈိတွာနဟံ တဒါ၊

အဒ္ဒသံ ပဏ္ဍရံ ဆတ္တံ၊ ယေနာဟံ နိရယံ ဂတော.

၅၂. ‘‘သဟ ဒိဋ္ဌဿ မေ ဆတ္တံ၊ တာသော ဥပ္ပဇ္ဇိ ဘေရဝေါ၊

ဝိနိစ္ဆယံ သမာပန္နော၊ ‘ကထာဟံ ဣမံ မုဉ္စိဿံ’.

၅၃. ‘‘ပုဗ္ဗသာလောဟိတာ မယှံ၊ ဒေဝတာ အတ္ထကာမိနီ၊

သာ မံ ဒိသွာန ဒုက္ခိတံ၊ တီသု ဌာနေသု ယောဇယိ.

၅၄. ‘‘‘မာ ပဏ္ဍိစ္စယံ ဝိဘာဝယ၊ ဗာလမတော ဘဝ သဗ္ဗပါဏိနံ၊

သဗ္ဗော တံ ဇနော ဩစိနာယတု၊ ဧဝံ တဝ အတ္ထော ဘဝိဿတိ’.

၅၅. ‘‘ဧဝံ ဝုတ္တာယဟံ တဿာ၊ ဣဒံ ဝစနမဗြဝိံ၊

‘ကရောမိ တေ တံ ဝစနံ၊ ယံ တွံ ဘဏသိ ဒေဝတေ၊

အတ္ထကာမာသိ မေ အမ္မ၊ ဟိတကာမာသိ ဒေဝတေ’.

၅၆. ‘‘တဿာဟံ ဝစနံ သုတွာ၊ သာဂရေဝ ထလံ လဘိံ၊

ဟဋ္ဌော သံဝိဂ္ဂမာနသော၊ တယော အင်္ဂေ အဓိဋ္ဌဟိံ.

၅၇. ‘‘မူဂေါ အဟောသိံ ဗဓိရော၊ ပက္ခော ဂတိဝိဝဇ္ဇိတော၊

ဧတေ အင်္ဂေ အဓိဋ္ဌာယ၊ ဝဿာနိ သောဠသံ ဝသိံ.

၅၈. ‘‘တတော မေ ဟတ္ထပါဒေ စ၊ ဇိဝှံ သောတဉ္စ မဒ္ဒိယ၊

အနူနတံ မေ ပဿိတွာ၊ ‘ကာဠကဏ္ဏီ’တိ နိန္ဒိသုံ.

၅၉. ‘‘တတော ဇာနပဒါ သဗ္ဗေ၊ သေနာပတိပုရောဟိတာ၊

သဗ္ဗေ ဧကမနာ ဟုတွာ၊ ဆဍ္ဍနံ အနုမောဒိသုံ.

၆၀. ‘‘သောဟံ တေသံ မတိံ သုတွာ၊ ဟဋ္ဌော သံဝိဂ္ဂမာနသော၊

ယဿတ္ထာယ တပေါစိဏ္ဏော၊ သော မေ အတ္ထော သမိဇ္ဈထ.

၆၁. ‘‘နှာပေတွာ အနုလိမ္ပိတွာ၊ ဝေဌေတွာ ရာဇဝေဌနံ၊

ဆတ္တေန အဘိသိဉ္စိတွာ၊ ကာရေသုံ ပုရံ ပဒက္ခိဏံ.

၆၂. ‘‘သတ္တာဟံ ဓာရယိတွာန၊ ဥဂ္ဂတေ ရဝိမဏ္ဍလေ၊

ရထေန မံ နီဟရိတွာ၊ သာရထီ ဝနမုပါဂမိ.

၆၃. ‘‘ဧကောကာသေ ရထံ ကတွာ၊ သဇ္ဇဿံ ဟတ္ထမုစ္စိတော [ဟတ္ထမုဉ္စိတော (သီ. သျာ.)]၊

သာရထီ ခဏတီ ကာသုံ၊ နိခါတုံ ပထဝိယာ မမံ.

၆၄. ‘‘အဓိဋ္ဌိတမဓိဋ္ဌာနံ၊ တဇ္ဇေန္တော ဝိဝိဓကာရဏာ၊

န ဘိန္ဒိံ တမဓိဋ္ဌာနံ၊ ဗောဓိယာယေဝ ကာရဏာ.

၆၅. ‘‘မာတာပိတာ န မေ ဒေဿာ၊ အတ္တာ မေ န စ ဒေဿိယော၊

သဗ္ဗညုတံ ပိယံ မယှံ၊ တသ္မာ ဝတမဓိဋ္ဌဟိံ.

၆၆. ‘‘ဧတေ အင်္ဂေ အဓိဋ္ဌာယ၊ ဝဿာနိ သောဠသံ ဝသိံ၊

အဓိဋ္ဌာနေန မေ သမော နတ္ထိ၊ ဧသာ မေ အဓိဋ္ဌာနပါရမီ’’တိ.

တေမိယစရိယံ ဆဋ္ဌံ.