၁. ယုဓဉ္ဇယစရိယာ

၁. ‘‘ယဒါဟံ အမိတယသော၊ ရာဇပုတ္တော ယုဓဉ္ဇယော၊

ဥဿာဝဗိန္ဒုံ သူရိယာတပေ၊ ပတိတံ ဒိသွာန သံဝိဇိံ.

၂. ‘‘တညေဝါဓိပတိံ ကတွာ၊ သံဝေဂမနုဗြူဟယိံ၊

မာတာပိတူ စ ဝန္ဒိတွာ၊ ပဗ္ဗဇ္ဇမနုယာစဟံ.

၃. ‘‘ယာစန္တိ မံ ပဉ္ဇလိကာ၊ သနေဂမာ သရဋ္ဌကာ၊

‘အဇ္ဇေဝ ပုတ္တ ပဋိပဇ္ဇ၊ ဣဒ္ဓံ ဖီတံ မဟာမဟိံ’.

၄. ‘‘သရာဇကေ သဟောရောဓေ၊ သနေဂမေ သရဋ္ဌကေ၊

ကရုဏံ ပရိဒေဝန္တေ၊ အနပေက္ခောဝ ပရိစ္စဇိံ.

၅. ‘‘ကေဝလံ ပထဝိံ ရဇ္ဇံ၊ ဉာတိပရိဇနံ ယသံ၊

စဇမာနော န စိန္တေသိံ၊ ဗောဓိယာယေဝ ကာရဏာ.

၆. ‘‘မာတာပိတာ န မေ ဒေဿာ၊ နပိ မေ ဒေဿံ မဟာယသံ၊

သဗ္ဗညုတံ ပိယံ မယှံ၊ တသ္မာ ရဇ္ဇံ ပရိစ္စဇိ’’န္တိ.

ယုဓဉ္ဇယစရိယံ ပဌမံ.