၃. ကုရုရာဇစရိယာ

၂၀. ‘‘ပုနာပရံ ယဒါ ဟောမိ၊ ဣန္ဒပတ္ထေ [ဣန္ဒပတ္တေ (သီ. က.)] ပုရုတ္တမေ၊

ရာဇာ ဓနဉ္စယော နာမ၊ ကုသလေ ဒသဟုပါဂတော.

၂၁. ‘‘ကလိင်္ဂရဋ္ဌဝိသယာ၊ ဗြာဟ္မဏာ ဥပဂဉ္ဆု မံ၊

အာယာစုံ မံ ဟတ္ထိနာဂံ၊ ဓညံ မင်္ဂလသမ္မတံ.

၂၂. ‘‘‘အဝုဋ္ဌိကော ဇနပဒေါ၊ ဒုဗ္ဘိက္ခော ဆာတကော မဟာ၊

ဒဒါဟိ ပဝရံ နာဂံ၊ နီလံ အဉ္ဇနသဝှယံ.

၂၃. ‘‘‘န မေ ယာစကမနုပ္ပတ္တေ၊ ပဋိက္ခေပေါ အနုစ္ဆဝေါ၊

မာ မေ ဘိဇ္ဇိ သမာဒါနံ၊ ဒဿာမိ ဝိပုလံ ဂဇံ’.

၂၄. ‘‘နာဂံ ဂဟေတွာ သောဏ္ဍာယ၊ ဘိင်္ဂါရေ [ဘိင်္ကာရေ (သီ.)] ရတနာမယေ၊

ဇလံ ဟတ္ထေ အာကိရိတွာ၊ ဗြာဟ္မဏာနံ အဒံ ဂဇံ.

၂၅. ‘‘တဿ နာဂေ ပဒိန္နမှိ၊ အမစ္စာ ဧတဒဗြဝုံ၊

‘ကိံ နု တုယှံ ဝရံ နာဂံ၊ ယာစကာနံ ပဒဿသိ.

၂၆. ‘‘‘ဓညံ မင်္ဂလသမ္ပန္နံ၊ သင်္ဂါမဝိဇယုတ္တမံ၊

တသ္မိံ နာဂေ ပဒိန္နမှိ၊ ကိံ တေ ရဇ္ဇံ ကရိဿတိ.

၂၇. ‘‘‘ရဇ္ဇမ္ပိ မေ ဒဒေ သဗ္ဗံ၊ သရီရံ ဒဇ္ဇမတ္တနော၊

သဗ္ဗညုတံ ပိယံ မယှံ၊ တသ္မာ နာဂံ အဒါသဟ’’’န္တိ.

ကုရုရာဇစရိယံ တတိယံ.