၂. ဂတသညကတ္ထေရအပဒါနံ

၁၀. ‘‘ဇာတိယာ သတ္တဝဿောဟံ၊ ပဗ္ဗဇိံ အနဂါရိယံ၊

အဝန္ဒိံ သတ္ထုနော ပါဒေ၊ ဝိပ္ပသန္နေန စေတသာ.

၁၁. ‘‘သတ္တနင်္ဂလကီပုပ္ဖေ၊ အာကာသေ ဥက္ခိပိံ အဟံ၊

တိဿံ ဗုဒ္ဓံ သမုဒ္ဒိဿ၊ အနန္တဂုဏသာဂရံ.

၁၂. ‘‘သုဂတာနုဂတံ မဂ္ဂံ၊ ပူဇေတွာ ဟဋ္ဌမာနသော၊

အဉ္ဇလိဉ္စ [အဉ္ဇလိဿ (က.)] တဒါကာသိံ၊ ပသန္နော သေဟိ ပါဏိဘိ.

၁၃. ‘‘ဒွေနဝုတေ ဣတော ကပ္ပေ၊ ယံ ကမ္မမကရိံ တဒါ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

၁၄. ‘‘ဣတော အဋ္ဌမကေ ကပ္ပေ၊ တယော အဂ္ဂိသိခါ အဟု၊

သတ္တရတနသမ္ပန္နာ၊ စက္ကဝတ္တီ မဟဗ္ဗလာ.

၁၅. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဂတသညကော ထေရော ဣမာ ဂါထာယော အဘာသိတ္ထာတိ.

ဂတသညကတ္ထေရဿာပဒါနံ ဒုတိယံ.