၈. အမ္ဗဒါယကတ္ထေရအပဒါနံ

၅၃. ‘‘အနောမဒဿီ ဘဂဝါ၊ နိသိန္နော ပဗ္ဗတန္တရေ၊

မေတ္တာယ အဖရိ လောကေ၊ အပ္ပမာဏေ နိရူပဓိ.

၅၄. ‘‘ကပိ အဟံ တဒါ အာသိံ၊ ဟိမဝန္တေ နဂုတ္တမေ၊

ဒိသွာ အနောမဒဿိံ တံ [အနောမံ အမိတံ (သီ.)၊ အနောမမဓိတံ (သျာ.)]၊ ဗုဒ္ဓေ စိတ္တံ ပသာဒယိံ.

၅၅. ‘‘အဝိဒူရေ ဟိမဝန္တဿ၊ အမ္ဗာသုံ ဖလိနော တဒါ၊

တတော ပက္ကံ ဂဟေတွာန၊ အမ္ဗံ သမဓုကံ အဒံ.

၅၆. ‘‘တံ မေ ဗုဒ္ဓေါ ဝိယာကာသိ၊ အနောမဒဿီ မဟာမုနိ၊

ဣမိနာ မဓုဒါနေန၊ အမ္ဗဒါနေန စူဘယံ.

၅၇. ‘‘သတ္တပညာသကပ္ပမှိ၊ ဒေဝလောကေ ရမိဿတိ၊

အဝသေသေသု ကပ္ပေသု၊ ဝေါကိဏ္ဏံ သံသရိဿတိ.

၅၈. ‘‘ခေပေတွာ ပါပကံ ကမ္မံ၊ ပရိပက္ကာယ ဗုဒ္ဓိယာ၊

ဝိနိပါတမဂန္တွာန၊ ကိလေသေ ဈာပယိဿတိ.

၅၉. ‘‘ဒမေန ဥတ္တမေနာဟံ၊ ဒမိတောမှိ မဟေသိနာ၊

ပတ္တောမှိ အစလံ ဌာနံ၊ ဟိတွာ ဇယပရာဇယံ.

၆၀. ‘‘သတ္တသတ္တတိကပ္ပသတေ၊ အမ္ဗဋ္ဌဇသနာမကာ၊

စတုဒ္ဒသ တေ ရာဇာနော၊ စက္ကဝတ္တီ မဟဗ္ဗလာ.

၆၁. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ အမ္ဗဒါယကော ထေရော ဣမာ ဂါထာယော အဘာသိတ္ထာတိ.

အမ္ဗဒါယကတ္ထေရဿာပဒါနံ အဋ္ဌမံ.