၃. ပစ္စာဂမနိယတ္ထေရအပဒါနံ

၁၃. ‘‘သိန္ဓုယာ နဒိယာ တီရေ၊ စက္ကဝါကော အဟံ တဒါ၊

သုဒ္ဓသေဝါလဘက္ခောဟံ၊ ပါပေသု စ သုသညတော.

၁၄. ‘‘အဒ္ဒသံ ဝိရဇံ ဗုဒ္ဓံ၊ ဂစ္ဆန္တံ အနိလဉ္ဇသေ၊

တုဏ္ဍေန သာလံ ပဂ္ဂယှ၊ ဝိပဿိဿာဘိရောပယိံ.

၁၅. ‘‘ယဿ သဒ္ဓါ တထာဂတေ၊ အစလာ သုပတိဋ္ဌိတာ၊

တေန စိတ္တပ္ပသာဒေန၊ ဒုဂ္ဂတိံ သော န ဂစ္ဆတိ.

၁၆. ‘‘သွာဂတံ ဝတ မေ အာသိ၊ ဗုဒ္ဓသေဋ္ဌဿ သန္တိကေ၊

ဝိဟင်္ဂမေန သန္တေန၊ သုဗီဇံ ရောပိတံ မယာ.

၁၇. ‘‘ဧကနဝုတိတော ကပ္ပေ၊ ယံ ပုပ္ဖမဘိရောပယိံ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ [ပုပ္ဖပူဇာယိဒံ (သီ.)] ဖလံ.

၁၈. ‘‘သုစာရုဒဿနာ နာမ၊ အဋ္ဌေတေ ဧကနာမကာ၊

ကပ္ပေ သတ္တရသေ အာသုံ၊ စက္ကဝတ္တီ မဟဗ္ဗလာ.

၁၉. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ပစ္စာဂမနိယော ထေရော ဣမာ ဂါထာယော အဘာသိတ္ထာတိ.

ပစ္စာဂမနိယတ္ထေရဿာပဒါနံ တတိယံ.