၃. မဟာကပ္ပိနတ္ထေရအပဒါနံ

၆၆. ‘‘ပဒုမုတ္တရော နာမ ဇိနော၊ သဗ္ဗဓမ္မာန ပါရဂူ၊

ဥဒိတော အဇဋာကာသေ [ဇဂဒါကာသေ (သီ.)၊ ဇလဒါကာသေ (ပီ.)]၊ ရဝီဝ သရဒမ္ဗရေ.

၆၇. ‘‘ဝစနာဘာယ ဗောဓေတိ၊ ဝေနေယျပဒုမာနိ သော၊

ကိလေသပင်္ကံ သောသေတိ၊ မတိရံသီဟိ နာယကော.

၆၈. ‘‘တိတ္ထိယာနံ ယသေ [ယသော (သီ. ပီ.)] ဟန္တိ၊ ခဇ္ဇောတာဘာ ယထာ ရဝိ၊

သစ္စတ္ထာဘံ ပကာသေတိ၊ ရတနံဝ ဒိဝါကရော.

၆၉. ‘‘ဂုဏာနံ အာယတိဘူတော၊ ရတနာနံဝ သာဂရော၊

ပဇ္ဇုန္နောရိဝ ဘူတာနိ၊ ဓမ္မမေဃေန ဝဿတိ.

၇၀. ‘‘အက္ခဒဿော တဒါ အာသိံ၊ နဂရေ ဟံသသဝှယေ၊

ဥပေစ္စ ဓမ္မမဿောသိံ၊ ဇလဇုတ္တမနာမိနော.

၇၁. ‘‘ဩဝါဒကဿ ဘိက္ခူနံ၊ သာဝကဿ ကတာဝိနော၊

ဂုဏံ ပကာသယန္တဿ၊ တပ္ပယန္တဿ [တောသယန္တဿ (သီ.)၊ ဟာသယန္တဿ (သျာ.)၊ ဝါသယန္တဿ (ပီ.)] မေ မနံ.

၇၂. ‘‘သုတွာ ပတီတော သုမနော၊ နိမန္တေတွာ တထာဂတံ၊

သသိဿံ ဘောဇယိတွာန၊ တံ ဌာနမဘိပတ္ထယိံ.

၇၃. ‘‘တဒါ ဟံသသမဘာဂေါ၊ ဟံသဒုန္ဒုဘိနိဿနော [ဟံသဒုန္ဒုဘိသုဿရော (သီ.)]၊

ပဿထေတံ မဟာမတ္တံ၊ ဝိနိစ္ဆယဝိသာရဒံ.

၇၄. ‘‘ပတိတံ ပါဒမူလေ မေ၊ သမုဂ္ဂတတနူရုဟံ၊

ဇီမူတဝဏ္ဏံ ပီဏံသံ၊ ပသန္နနယနာနနံ.

၇၅. ‘‘ပရိဝါရေန မဟတာ၊ ရာဇယုတ္တံ မဟာယသံ၊

ဧသော ကတာဝိနော ဌာနံ၊ ပတ္ထေတိ မုဒိတာသယော.

၇၆. ‘‘‘ဣမိနာ ပဏိပါတေန၊ စာဂေန ပဏိဓီဟိ စ [ပိဏ္ဍပါတေန၊ စေတနာ ပဏိဓီဟိ စ (သီ.)]၊

ကပ္ပသတသဟဿာနိ၊ နုပပဇ္ဇတိ ဒုဂ္ဂတိံ.

၇၇. ‘‘‘ဒေဝေသု ဒေဝသောဘဂ္ဂံ၊ မနုဿေသု မဟန္တတံ၊

အနုဘောတွာန သေသေန [အဘုတွာဝ သေသေန (သီ.)၊ အနုဘောတွာဝ သေသေန (သျာ.)]၊ နိဗ္ဗာနံ ပါပုဏိဿတိ.

၇၈. ‘‘‘သတသဟဿိတော ကပ္ပေ၊ ဩက္ကာကကုလသမ္ဘဝေါ၊

ဂေါတမော နာမ ဂေါတ္တေန၊ သတ္ထာ လောကေ ဘဝိဿတိ.

၇၉. ‘‘‘တဿ ဓမ္မေသု ဒါယာဒေါ၊ ဩရသော ဓမ္မနိမ္မိတော၊

ကပ္ပိနော နာမ နာမေန၊ ဟေဿတိ သတ္ထု သာဝကော’.

၈၀. ‘‘တတောဟံ သုကတံ ကာရံ၊ ကတွာန ဇိနသာသနေ၊

ဇဟိတွာ မာနုသံ ဒေဟံ၊ တုသိတံ အဂမာသဟံ.

၈၁. ‘‘ဒေဝမာနုသရဇ္ဇာနိ၊ သတသော အနုသာသိယ၊

ဗာရာဏသိယမာသန္နေ၊ ဇာတော ကေနိယဇာတိယံ.

၈၂. ‘‘သဟဿပရိဝါရေန [သတသဟဿပရိဝါရော (သျာ.)]၊ သပဇာပတိကော အဟံ၊

ပဉ္စ ပစ္စေကဗုဒ္ဓါနံ၊ သတာနိ သမုပဋ္ဌဟိံ.

၈၃. ‘‘တေမာသံ ဘောဇယိတွာန၊ ပစ္ဆာဒမှ တိစီဝရံ၊

တတော စုတာ မယံ သဗ္ဗေ၊ အဟုမှ တိဒသူပဂါ.

၈၄. ‘‘ပုနော သဗ္ဗေ မနုဿတ္တံ၊ အဂမိမှ တတော စုတာ၊

ကုက္ကုဋမှိ ပုရေ ဇာတာ၊ ဟိမဝန္တဿ ပဿတော.

၈၅. ‘‘ကပ္ပိနော နာမဟံ အာသိံ၊ ရာဇပုတ္တော မဟာယသော၊

သေသာမစ္စကုလေ ဇာတာ၊ မမေဝ ပရိဝါရယုံ.

၈၆. ‘‘မဟာရဇ္ဇသုခံ ပတ္တော၊ သဗ္ဗကာမသမိဒ္ဓိမာ၊

ဝါဏိဇေဟိ သမက္ခာတံ၊ ဗုဒ္ဓုပ္ပါဒမဟံ သုဏိံ.

၈၇. ‘‘‘ဗုဒ္ဓေါ လောကေ သမုပ္ပန္နော၊ အသမော ဧကပုဂ္ဂလော၊

သော ပကာသေတိ သဒ္ဓမ္မံ၊ အမတံ သုခမုတ္တမံ.

၈၈. ‘‘‘သုယုတ္တာ တဿ သိဿာ စ၊ သုမုတ္တာ စ အနာသဝါ’၊

‘‘သုတွာ နေသံ သုဝစနံ၊ သက္ကရိတွာန ဝါဏိဇေ.

၈၉. ‘‘ပဟာယ ရဇ္ဇံ သာမစ္စော၊ နိက္ခမိံ ဗုဒ္ဓမာမကော၊

နဒိံ ဒိသွာ မဟာစန္ဒံ၊ ပူရိတံ သမတိတ္တိကံ.

၉၀. ‘‘အပ္ပတိဋ္ဌံ အနာလမ္ဗံ၊ ဒုတ္တရံ သီဃဝါဟိနိံ၊

ဂုဏံ သရိတွာ ဗုဒ္ဓဿ၊ သောတ္ထိနာ သမတိက္ကမိံ.

၉၁. ‘‘‘ဘဝသောတံ သစေ ဗုဒ္ဓေါ၊ တိဏ္ဏော လောကန္တဂူ ဝိဒူ [ဝိဘူ (က.)]၊

ဧတေန သစ္စဝဇ္ဇေန၊ ဂမနံ မေ သမိဇ္ဈတု.

၉၂. ‘‘‘ယဒိ သန္တိဂမော မဂ္ဂေါ၊ မောက္ခော စစ္စန္တိကံ [မောက္ခဒံ သန္တိကံ (သျာ.)] သုခံ၊

ဧတေန သစ္စဝဇ္ဇေန၊ ဂမနံ မေ သမိဇ္ဈတု.

၉၃. ‘‘‘သံဃော စေ တိဏ္ဏကန္တာရော၊ ပုညက္ခေတ္တော အနုတ္တရော၊

ဧတေန သစ္စဝဇ္ဇေန၊ ဂမနံ မေ သမိဇ္ဈတု’.

၉၄. ‘‘သဟ ကတေ သစ္စဝရေ၊ မဂ္ဂါ အပဂတံ ဇလံ၊

တတော သုခေန ဥတ္တိဏ္ဏော၊ နဒီတီရေ မနောရမေ.

၉၅. ‘‘နိသိန္နံ အဒ္ဒသံ ဗုဒ္ဓံ၊ ဥဒေန္တံဝ ပဘင်္ကရံ၊

ဇလန္တံ ဟေမသေလံဝ၊ ဒီပရုက္ခံဝ ဇောတိတံ.

၉၆. ‘‘သသိံဝ တာရာသဟိတံ၊ သာဝကေဟိ ပုရက္ခတံ၊

ဝါသဝံ ဝိယ ဝဿန္တံ၊ ဒေသနာဇလဒန္တရံ [ဒေဝေန ဇလနန္ဒနံ (သျာ. ပီ.)].

၉၇. ‘‘ဝန္ဒိတွာန သဟာမစ္စော၊ ဧကမန္တမုပါဝိသိံ၊

တတော နော အာသယံ [တတော အဇ္ဈာသယံ (သျာ.)] ဉတွာ၊ ဗုဒ္ဓေါ ဓမ္မမဒေသယိ.

၉၈. ‘‘သုတွာန ဓမ္မံ ဝိမလံ၊ အဝေါစုမှ မယံ ဇိနံ၊

‘ပဗ္ဗာဇေဟိ မဟာဝီရ၊ နိဗ္ဗိန္ဒာမှ [နိဗ္ဗိန္နာမှ (သီ. ပီ.)၊ ဩတိဏ္ဏမှ (သျာ.)] မယံ ဘဝေ’.

၉၉. ‘‘‘သွက္ခာတော ဘိက္ခဝေ ဓမ္မော၊ ဒုက္ခန္တကရဏာယ ဝေါ၊

စရထ ဗြဟ္မစရိယံ’၊ ဣစ္စာဟ မုနိသတ္တမော.

၁၀၀. ‘‘သဟ ဝါစာယ သဗ္ဗေပိ၊ ဘိက္ခုဝေသဓရာ မယံ၊

အဟုမှ ဥပသမ္ပန္နာ၊ သောတာပန္နာ စ သာသနေ.

၁၀၁. ‘‘တတော ဇေတဝနံ ဂန္တွာ၊ အနုသာသိ ဝိနာယကော၊

အနုသိဋ္ဌော ဇိနေနာဟံ၊ အရဟတ္တမပါပုဏိံ.

၁၀၂. ‘‘တတော ဘိက္ခုသဟဿာနိ [ဘိက္ခုသဟဿံ တံ (သီ. ပီ.)]၊ အနုသာသိမဟံ တဒါ၊

မမာနုသာသနကရာ၊ တေပိ အာသုံ အနာသဝါ.

၁၀၃. ‘‘ဇိနော တသ္မိံ ဂုဏေ တုဋ္ဌော၊ ဧတဒဂ္ဂေ ဌပေသိ မံ၊

ဘိက္ခုဩဝါဒကာနဂ္ဂေါ၊ ကပ္ပိနောတိ မဟာဇနေ.

၁၀၄. ‘‘သတသဟဿေ ကတံ ကမ္မံ၊ ဖလံ ဒဿေသိ မေ ဣဓ၊

ပမုတ္တော သရဝေဂေါဝ၊ ကိလေသေ ဈာပယိံ [ဈာပယီ (သီ.)] မမ.

၁၀၅. ‘‘ကိလေသာ ဈာပိတာ မယှံ။ပေ။ ဝိဟရာမိ အနာသဝေါ.

၁၀၆. ‘‘သွာဂတံ ဝတ မေ အာသိ။ပေ။ ကတံ ဗုဒ္ဓဿ သာသနံ.

၁၀၇. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ မဟာကပ္ပိနော ထေရော ဣမာ ဂါထာယော

အဘာသိတ္ထာတိ.

မဟာကပ္ပိနတ္ထေရဿာပဒါနံ တတိယံ.