၉. အာမဏ္ဍဖလဒါယကတ္ထေရအပဒါနံ

၇၄. ‘‘ပဒုမုတ္တရော နာမ ဇိနော၊ သဗ္ဗဓမ္မာန ပါရဂူ၊

ဝုဋ္ဌဟိတွာ သမာဓိမှာ၊ စင်္ကမီ လောကနာယကော.

၇၅. ‘‘ခါရိဘာရံ ဂဟေတွာန၊ အာဟရန္တော ဖလံ တဒါ၊

အဒ္ဒသံ ဝိရဇံ ဗုဒ္ဓံ၊ စင်္ကမန္တံ မဟာမုနိံ.

၇၆. ‘‘ပသန္နစိတ္တော သုမနော၊ သိရေ ကတွာန အဉ္ဇလိံ၊

သမ္ဗုဒ္ဓံ အဘိဝါဒေတွာ၊ အာမဏ္ဍမဒဒိံ ဖလံ.

၇၇. ‘‘သတသဟဿိတော ကပ္ပေ၊ ယံ ဖလံ အဒဒိံ တဒါ၊

ဒုဂ္ဂတိံ နာဘိဇာနာမိ၊ အာမဏ္ဍဿ ဣဒံ ဖလံ.

၇၈. ‘‘ကိလေသာ ဈာပိတာ မယှံ။ပေ။ ဝိဟရာမိ အနာသဝေါ.

၇၉. ‘‘သွာဂတံ ဝတ မေ အာသိ။ပေ။ ကတံ ဗုဒ္ဓဿ သာသနံ.

၈၀. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ အာမဏ္ဍဖလဒါယကော ထေရော ဣမာ

ဂါထာယော အဘာသိတ္ထာတိ.

အာမဏ္ဍဖလဒါယကတ္ထေရဿာပဒါနံ နဝမံ.