၄. ဉာဏထဝိကတ္ထေရအပဒါနံ

၄၆. ‘‘ဒက္ခိဏေ ဟိမဝန္တဿ၊ သုကတော အဿမော မမ၊

ဥတ္တမတ္ထံ ဂဝေသန္တော၊ ဝသာမိ ဝိပိနေ တဒါ.

၄၇. ‘‘လာဘာလာဘေန သန္တုဋ္ဌော၊ မူလေန စ ဖလေန စ၊

အနွေသန္တော အာစရိယံ၊ ဝသာမိ ဧကကော အဟံ.

၄၈. ‘‘သုမေဓော နာမ သမ္ဗုဒ္ဓေါ၊ လောကေ ဥပ္ပဇ္ဇိ တာဝဒေ၊

စတုသစ္စံ ပကာသေတိ၊ ဥဒ္ဓရန္တော မဟာဇနံ.

၄၉. ‘‘နာဟံ သုဏောမိ သမ္ဗုဒ္ဓံ၊ နပိ မေ ကောစိ သံသတိ [ဘာသတိ (သီ.)၊ သာသတိ (သျာ. ပီ.)]၊

အဋ္ဌဝဿေ အတိက္ကန္တေ၊ အဿောသိံ လောကနာယကံ.

၅၀. ‘‘အဂ္ဂိဒါရုံ နီဟရိတွာ၊ သမ္မဇ္ဇိတွာန အဿမံ၊

ခါရိဘာရံ ဂဟေတွာန၊ နိက္ခမိံ ဝိပိနာ အဟံ.

၅၁. ‘‘ဧကရတ္တိံ ဝသန္တောဟံ၊ ဂါမေသု နိဂမေသု စ၊

အနုပုဗ္ဗေန စန္ဒဝတိံ၊ တဒါဟံ ဥပသင်္ကမိံ.

၅၂. ‘‘ဘဂဝါ တမှိ သမယေ၊ သုမေဓော လောကနာယကော၊

ဥဒ္ဓရန္တော ဗဟူ သတ္တေ၊ ဒေသေတိ အမတံ ပဒံ.

၅၃. ‘‘ဇနကာယမတိက္ကမ္မ၊ ဝန္ဒိတွာ ဇိနသာဂရံ၊

ဧကံသံ အဇိနံ ကတွာ၊ သန္ထဝိံ လောကနာယကံ.

၅၄. ‘‘‘တုဝံ သတ္ထာ စ ကေတု စ၊ ဓဇော ယူပေါ စ ပါဏိနံ၊

ပရာယနော [ပရာယဏော (သီ. ပီ.)] ပတိဋ္ဌာ စ၊ ဒီပေါ စ ဒွိပဒုတ္တမော.

ဧကဝီသတိမံ ဘာဏဝါရံ.

၅၅. ‘‘‘နေပုညော ဒဿနေ ဝီရော၊ တာရေသိ ဇနတံ တုဝံ၊

နတ္ထညော တာရကော လောကေ၊ တဝုတ္တရိတရော မုနေ.

၅၆. ‘‘‘သက္ကာ ထေဝေ [ဟဝေ (သီ. ပီ.) ဘဝေ (သျာ. က.)] ကုသဂ္ဂေန၊ ပမေတုံ သာဂရုတ္တမေ [သာဂရုတ္တမော (သီ. သျာ. ပီ.)]၊

နတွေဝ တဝ သဗ္ဗညု၊ ဉာဏံ သက္ကာ ပမေတဝေ.

၅၇. ‘‘‘တုလဒဏ္ဍေ [တုလမဏ္ဍလေ (သီ. ပီ.)] ဌပေတွာန၊ မဟိံ [မဟီ (သျာ. ပီ.)] သက္ကာ ဓရေတဝေ၊

နတွေဝ တဝ ပညာယ၊ ပမာဏမတ္ထိ စက္ခုမ.

၅၈. ‘‘‘အာကာသော မိနိတုံ သက္ကာ၊ ရဇ္ဇုယာ အင်္ဂုလေန ဝါ၊

နတွေဝ တဝ သဗ္ဗညု၊ သီလံ သက္ကာ ပမေတဝေ.

၅၉. ‘‘‘မဟာသမုဒ္ဒေ ဥဒကံ၊ အာကာသော စ ဝသုန္ဓရာ၊

ပရိမေယျာနိ ဧတာနိ၊ အပ္ပမေယျောသိ စက္ခုမ’.

၆၀. ‘‘ဆဟိ ဂါထာဟိ သဗ္ဗညုံ၊ ကိတ္တယိတွာ မဟာယသံ၊

အဉ္ဇလိံ ပဂ္ဂဟေတွာန၊ တုဏှီ အဋ္ဌာသဟံ တဒါ.

၆၁. ‘‘ယံ ဝဒန္တိ သုမေဓောတိ၊ ဘူရိပညံ သုမေဓသံ၊

ဘိက္ခုသံဃေ နိသီဒိတွာ၊ ဣမာ ဂါထာ အဘာသထ.

၆၂. ‘‘‘ယော မေ ဉာဏံ ပကိတ္တေသိ၊ ဝိပ္ပသန္နေန စေတသာ၊

တမဟံ ကိတ္တယိဿာမိ၊ သုဏာထ မမ ဘာသတော.

၆၃. ‘‘‘သတ္တသတ္တတိ ကပ္ပါနိ၊ ဒေဝလောကေ ရမိဿတိ၊

သဟဿက္ခတ္တုံ ဒေဝိန္ဒော၊ ဒေဝရဇ္ဇံ ကရိဿတိ.

၆၄. ‘‘‘အနေကသတက္ခတ္တုဉ္စ၊ စက္ကဝတ္တီ ဘဝိဿတိ၊

ပဒေသရဇ္ဇံ ဝိပုလံ၊ ဂဏနာတော အသင်္ခိယံ.

၆၅. ‘‘‘ဒေဝဘူတော မနုဿော ဝါ၊ ပုညကမ္မသမာဟိတော၊

အနူနမနသင်္ကပ္ပေါ၊ တိက္ခပညော ဘဝိဿတိ’.

၆၆. ‘‘တိံသကပ္ပသဟဿမှိ၊ ဩက္ကာကကုလသမ္ဘဝေါ၊

ဂေါတမော နာမ ဂေါတ္တေန၊ သတ္ထာ လောကေ ဘဝိဿတိ.

၆၇. ‘‘အဂါရာ အဘိနိက္ခမ္မ၊ ပဗ္ဗဇိဿတိ ကိဉ္စနော၊

ဇာတိယာ သတ္တဝဿေန၊ အရဟတ္တံ ဖုသိဿတိ.

၆၈. ‘‘ယတော သရာမိ အတ္တာနံ၊ ယတော ပတ္တောသ္မိ သာသနံ၊

ဧတ္ထန္တရေ န ဇာနာမိ၊ စေတနံ အမနောရမံ.

၆၉. ‘‘သံသရိတွာ ဘဝေ သဗ္ဗေ၊ သမ္ပတ္တာနုဘဝိံ အဟံ၊

ဘောဂေ မေ ဦနတာ နတ္ထိ၊ ဖလံ ဉာဏဿ ထောမနေ.

၇၀. ‘‘တိယဂ္ဂီ နိဗ္ဗုတာ မယှံ၊ ဘဝါ သဗ္ဗေ သမူဟတာ၊

သဗ္ဗာသဝါ ပရိက္ခီဏာ၊ နတ္ထိ ဒါနိ ပုနဗ္ဘဝေါ.

၇၁. ‘‘တိံသကပ္ပသဟဿမှိ၊ ယံ ဉာဏမထဝိံ အဟံ [မဘိထောမယိံ (သီ. ပီ.)၊ မဘိထောမဟံ (သျာ.)]၊

ဒုဂ္ဂတိံ နာဘိဇာနာမိ၊ ဖလံ ဉာဏဿ ထောမနေ.

၇၂. ‘‘ကိလေသာ ဈာပိတာ မယှံ။ပေ။ ဝိဟရာမိ အနာသဝေါ.

၇၃. ‘‘သွာဂတံ ဝတ မေ အာသိ။ပေ။ ကတံ ဗုဒ္ဓဿ သာသနံ.

၇၄. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဉာဏထဝိကော ထေရော ဣမာ ဂါထာယော

အဘာသိတ္ထာတိ.

ဉာဏထဝိကတ္ထေရဿာပဒါနံ စတုတ္ထံ.