၁. သာလကုသုမိယတ္ထေရအပဒါနံ

၁. ‘‘ပရိနိဗ္ဗုတေ ဘဂဝတိ၊ ဇလဇုတ္တမနာမကေ၊

အာရောပိတမှိ စိတကေ၊ သာလပုပ္ဖမပူဇယိံ.

၂. ‘‘သတသဟဿိတော ကပ္ပေ၊ ယံ ပုပ္ဖမဘိရောပယိံ [ပုပ္ဖမဘိပုဇယိံ (သျာ.)]၊

ဒုဂ္ဂတိံ နာဘိဇာနာမိ၊ စိတပူဇာယိဒံ [ဗုဒ္ဓပူဇာယိဒံ (သျာ.)] ဖလံ.

၃. ‘‘ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ၊

နာဂေါဝ ဗန္ဓနံ ဆေတွာ၊ ဝိဟရာမိ အနာသဝေါ.

၄. ‘‘သွာဂတံ ဝတ မေ အာသိ၊ မမ ဗုဒ္ဓဿ သန္တိကေ၊

တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသနံ.

၅. ‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ သာလကုသုမိယော ထေရော ဣမာ ဂါထာယော

အဘာသိတ္ထာတိ.

သာလကုသုမိယတ္ထေရဿာပဒါနံ ပဌမံ.