၈. ဇာတိပုပ္ဖိယတ္ထေရအပဒါနံ

၄၉. ‘‘ပရိနိဗ္ဗုတေ ဘဂဝတိ၊ ပဒုမုတ္တရေ မဟာယသေ၊

ပုပ္ဖဝဋံသကေ ကတွာ [ပုပ္ဖစင်္ကောဋကေ ဂဟေတွာ (သျာ.)]၊ သရီရမဘိရောပယိံ.

၅၀. ‘‘တတ္ထ စိတ္တံ ပသာဒေတွာ၊ နိမ္မာနံ အဂမာသဟံ၊

ဒေဝလောကဂတော သန္တော၊ ပုညကမ္မံ သရာမဟံ.

၅၁. ‘‘အမ္ဗရာ ပုပ္ဖဝဿော မေ၊ သဗ္ဗကာလံ ပဝဿတိ၊

သံသရာမိ မနုဿေ စေ [ဝေ (သျာ.)]၊ ရာဇာ ဟောမိ မဟာယသော.

၅၂. ‘‘တဟိံ ကုသုမဝဿော မေ၊ အဘိဝဿတိ သဗ္ဗဒါ၊

တဿေဝ [ကာယေသု (သျာ.)၊ ကာယေဝ (ပီ.)] ပုပ္ဖပူဇာယ၊ ဝါဟသာ သဗ္ဗဒဿိနော.

၅၃. ‘‘အယံ ပစ္ဆိမကော မယှံ၊ စရိမော ဝတ္တတေ ဘဝေါ၊

အဇ္ဇာပိ ပုပ္ဖဝဿော မေ၊ အဘိဝဿတိ သဗ္ဗဒါ.

၅၄. ‘‘သတသဟဿိတော ကပ္ပေ၊ ယံ ပုပ္ဖမဘိရောပယိံ၊

ဒုဂ္ဂတိံ နာဘိဇာနာမိ၊ ဒေဟပူဇာယိဒံ ဖလံ.

၅၅. ‘‘ကိလေသာ ဈာပိတာ မယှံ။ပေ။ ဝိဟရာမိ အနာသဝေါ.

၅၆. ‘‘သွာဂတံ ဝတ မေ အာသိ။ပေ။ ကတံ ဗုဒ္ဓဿ သာသနံ.

၅၇. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဇာတိပုပ္ဖိယော ထေရော ဣမာ ဂါထာယော

အဘာသိတ္ထာတိ.

ဇာတိပုပ္ဖိယတ္ထေရဿာပဒါနံ အဋ္ဌမံ.