၁. ဇဂတိဒါယကတ္ထေရအပဒါနံ

၁. ‘‘ဓမ္မဒဿိဿ မုနိနော၊ ဗောဓိယာ ပါဒပုတ္တမေ၊

ပသန္နစိတ္တော သုမနော၊ ဇဂတိံ ကာရယိံ အဟံ.

၂. ‘‘ဒရိတော ပဗ္ဗတတော ဝါ၊ ရုက္ခတော ပတိတော အဟံ၊

စုတော ပတိဋ္ဌံ ဝိန္ဒာမိ၊ ဇဂတိယာ ဣဒံ ဖလံ.

၃. ‘‘န မေ စောရာ ဝိဟေသန္တိ၊ နာတိမညန္တိ ခတ္တိယာ [ပသဟန္တိ၊ နာတိမညတိ ခတ္တိယော (သီ. ပီ.)]၊

သဗ္ဗာမိတ္တေတိက္ကမာမိ၊ ဇဂတိယာ ဣဒံ ဖလံ.

၄. ‘‘ယံ ယံ ယောနုပပဇ္ဇာမိ၊ ဒေဝတ္တံ အထ မာနုသံ၊

သဗ္ဗတ္ထ ပူဇိတော ဟောမိ၊ ဇဂတိယာ ဣဒံ ဖလံ.

၅. ‘‘အဋ္ဌာရသေ ကပ္ပသတေ၊ ဇဂတိံ ကာရယိံ အဟံ၊

ဒုဂ္ဂတိံ နာဘိဇာနာမိ၊ ဇဂတိဒါနဿိဒံ ဖလံ.

၆. ‘‘ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ၊

နာဂေါဝ ဗန္ဓနံ ဆေတွာ၊ ဝိဟရာမိ အနာသဝေါ.

၇. ‘‘သွာဂတံ ဝတ မေ အာသိ၊ မမ ဗုဒ္ဓဿ သန္တိကေ၊

တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသနံ.

၈. ‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဇဂတိဒါယကော ထေရော ဣမာ ဂါထာယော

အဘာသိတ္ထာတိ.

ဇဂတိဒါယကတ္ထေရဿာပဒါနံ ပဌမံ.