၁. ဘဒ္ဒါလိတ္ထေရအပဒါနံ

၁. ‘‘သုမေဓော နာမ သမ္ဗုဒ္ဓေါ၊ အဂ္ဂေါ ကာရုဏိကော မုနိ၊

ဝိဝေကကာမော လောကဂ္ဂေါ၊ ဟိမဝန္တမုပါဂမိ.

၂. ‘‘အဇ္ဈောဂါဟေတွာ ဟိမဝံ၊ သုမေဓော လောကနာယကော၊

ပလ္လင်္ကံ အာဘုဇိတွာန၊ နိသီဒိ ပုရိသုတ္တမော.

၃. ‘‘သမာဓိံ သော သမာပန္နော၊ သုမေဓော လောကနာယကော၊

သတ္တရတ္တိန္ဒိဝံ ဗုဒ္ဓေါ၊ နိသီဒိ ပုရိသုတ္တမော.

၄. ‘‘ခါရိဘာရံ [ခါရိကာဇံ (သီ.)] ဂဟေတွာန၊ ဝနမဇ္ဈောဂဟိံ အဟံ၊

တတ္ထဒ္ဒသာသိံ သမ္ဗုဒ္ဓံ၊ ဩဃတိဏ္ဏမနာသဝံ.

၅. ‘‘သမ္မဇ္ဇနိံ ဂဟေတွာန၊ သမ္မဇ္ဇိတွာန အဿမံ၊

စတုဒဏ္ဍေ ဌပေတွာန၊ အကာသိံ မဏ္ဍပံ တဒါ.

၆. ‘‘သာလပုပ္ဖံ အာဟရိတွာ၊ မဏ္ဍပံ ဆာဒယိံ အဟံ၊

ပသန္နစိတ္တော သုမနော၊ အဘိဝန္ဒိံ တထာဂတံ.

၇. ‘‘ယံ ဝဒန္တိ သုမေဓောတိ၊ ဘူရိပညံ သုမေဓသံ၊

ဘိက္ခုသံဃေ နိသီဒိတွာ၊ ဣမာ ဂါထာ အဘာသထ.

၈. ‘‘‘ဗုဒ္ဓဿ ဂိရမညာယ၊ သဗ္ဗေ ဒေဝါ သမာဂမုံ၊

အသံသယံ ဗုဒ္ဓသေဋ္ဌော၊ ဓမ္မံ ဒေသေတိ စက္ခုမာ.

၉. ‘‘‘သုမေဓော နာမ သမ္ဗုဒ္ဓေါ၊ အာဟုတီနံ ပဋိဂ္ဂဟော၊

ဒေဝသံဃေ နိသီဒိတွာ၊ ဣမာ ဂါထာ အဘာသထ.

၁၀. ‘‘‘ယော မေ သတ္တာဟံ မဏ္ဍပံ၊ ဓာရယီ သာလဆာဒိတံ၊

တမဟံ ကိတ္တယိဿာမိ၊ သုဏာထ မမ ဘာသတော.

၁၁. ‘‘‘ဒေဝဘူတော မနုဿော ဝါ၊ ဟေမဝဏ္ဏော ဘဝိဿတိ၊

ပဟူတဘောဂေါ ဟုတွာန၊ ကာမဘောဂီ ဘဝိဿတိ.

၁၂. ‘‘‘သဋ္ဌိ နာဂသဟဿာနိ၊ သဗ္ဗာလင်္ကာရဘူသိတာ၊

သုဝဏ္ဏကစ္ဆာ မာတင်္ဂါ၊ ဟေမကပ္ပနဝါသသာ.

၁၃. ‘‘‘အာရူဠှာ ဂါမဏီယေဟိ၊ တောမရင်္ကုသပါဏိဘိ၊

သာယံ ပါတော [သာယပါတော (ပီ.)] ဥပဋ္ဌာနံ၊ အာဂမိဿန္တိမံ နရံ၊

တေဟိ နာဂေဟိ ပရိဝုတော၊ ရမိဿတိ အယံ နရော.

၁၄. ‘‘‘သဋ္ဌိ အဿသဟဿာနိ၊ သဗ္ဗာလင်္ကာရဘူသိတာ၊

အာဇာနီယာဝ ဇာတိယာ၊ သိန္ဓဝါ သီဃဝါဟိနော.

၁၅. ‘‘‘အာရူဠှာ ဂါမဏီယေဟိ၊ ဣလ္လိယာစာပဓာရိဘိ၊

ပရိဝါရေဿန္တိမံ နိစ္စံ၊ ဗုဒ္ဓပူဇာယိဒံ ဖလံ.

၁၆. ‘‘‘သဋ္ဌိ ရထသဟဿာနိ၊ သဗ္ဗာလင်္ကာရဘူသိတာ၊

ဒီပါ အထောပိ ဝေယဂ္ဃါ၊ သန္နဒ္ဓါ ဥဿိတဒ္ဓဇာ.

၁၇. ‘‘‘အာရူဠှာ ဂါမဏီယေဟိ၊ စာပဟတ္ထေဟိ ဝမ္မိဘိ၊

ပရိဝါရေဿန္တိမံ နိစ္စံ၊ ဗုဒ္ဓပူဇာယိဒံ ဖလံ.

၁၈. ‘‘‘သဋ္ဌိ ဂါမသဟဿာနိ၊ ပရိပုဏ္ဏာနိ သဗ္ဗသော၊

ပဟူတဓနဓညာနိ၊ သုသမိဒ္ဓါနိ သဗ္ဗသော၊

သဒါ ပါတုဘဝိဿန္တိ၊ ဗုဒ္ဓပူဇာယိဒံ ဖလံ.

၁၉. ‘‘‘ဟတ္ထီ အဿာ ရထာ ပတ္တီ၊ သေနာ စ စတုရင်္ဂိနီ၊

ပရိဝါရေဿန္တိမံ နိစ္စံ၊ ဗုဒ္ဓပူဇာယိဒံ ဖလံ.

၂၀. ‘‘‘အဋ္ဌာရသေ ကပ္ပသတေ၊ ဒေဝလောကေ ရမိဿတိ၊

သဟဿက္ခတ္တုံ ရာဇာ စ၊ စက္ကဝတ္တီ ဘဝိဿတိ.

၂၁. ‘‘‘သတာနံ တီဏိက္ခတ္တုဉ္စ၊ ဒေဝရဇ္ဇံ ကရိဿတိ၊

ပဒေသရဇ္ဇံ ဝိပုလံ၊ ဂဏနာတော အသင်္ခိယံ.

၂၂. ‘‘‘တိံသကပ္ပသဟဿမှိ၊ ဩက္ကာကကုလသမ္ဘဝေါ၊

ဂေါတမော နာမ ဂေါတ္တေန၊ သတ္ထာ လောကေ ဘဝိဿတိ.

၂၃. ‘‘‘တဿ ဓမ္မေသု ဒါယာဒေါ၊ ဩရသော ဓမ္မနိမ္မိတော၊

သဗ္ဗာသဝေ ပရိညာယ၊ ဝိဟရိဿတိနာသဝေါ’.

၂၄. ‘‘တိံသကပ္ပသဟဿမှိ၊ အဒ္ဒသံ လောကနာယကံ၊

ဧတ္ထန္တရမုပါဒါယ၊ ဂဝေသိံ အမတံ ပဒံ.

၂၅. ‘‘လာဘာ မယှံ သုလဒ္ဓံ မေ၊ ယမဟညာသိ သာသနံ၊

တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသနံ.

၂၆. ‘‘နမော တေ ပုရိသာဇည၊ နမော တေ ပုရိသုတ္တမ၊

တဝ ဉာဏံ ပကိတ္တေတွာ၊ ပတ္တောမှိ အစလံ ပဒံ.

၂၇. ‘‘ယံ ယံ ယောနုပပဇ္ဇာမိ၊ ဒေဝတ္တံ အထ မာနုသံ၊

သဗ္ဗတ္ထ သုခိတော ဟောမိ၊ ဖလံ မေ ဉာဏကိတ္တနေ.

၂၈. ‘‘ဣဒံ ပစ္ဆိမကံ မယှံ၊ စရိမော ဝတ္တတေ ဘဝေါ၊

နာဂေါဝ ဗန္ဓနံ ဆေတွာ၊ ဝိဟရာမိ အနာသဝေါ.

၂၉. ‘‘ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ၊

နာဂေါဝ ဗန္ဓနံ ဆေတွာ၊ ဝိဟရာမိ အနာသဝေါ.

၃၀. ‘‘သွာဂတံ ဝတ မေ အာသိ၊ မမ ဗုဒ္ဓဿ သန္တိကေ၊

တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသနံ.

၃၁. ‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဘဒ္ဒါလိတ္ထေရော ဣမာ ဂါထာယော အဘာသိတ္ထာတိ.

ဘဒ္ဒါလိတ္ထေရဿာပဒါနံ ပဌမံ.