၇. ဟေမကတ္ထေရအပဒါနံ

၁၈၃. ‘‘ပဗ္ဘာရကူဋံ နိဿာယ၊ အနောမော နာမ တာပသော၊

အဿမံ သုကတံ ကတွာ၊ ပဏ္ဏသာလေ ဝသီ တဒါ.

၁၈၄. ‘‘သိဒ္ဓံ တဿ တပေါ ကမ္မံ၊ သိဒ္ဓိပတ္တော သကေ ဗလေ၊

သကသာမညဝိက္ကန္တော၊ အာတာပီ နိပကော မုနိ.

၁၈၅. ‘‘ဝိသာရဒေါ သသမယေ၊ ပရဝါဒေ စ ကောဝိဒေါ၊

ပဋ္ဌော ဘူမန္တလိက္ခမှိ၊ ဥပ္ပါတမှိ စ ကောဝိဒေါ.

၁၈၆. ‘‘ဝီတသောကော နိရာရမ္ဘော၊ အပ္ပါဟာရော အလောလုပေါ၊

လာဘာလာဘေန သန္တုဋ္ဌော၊ ဈာယီ ဈာနရတော မုနိ.

၁၈၇. ‘‘ပိယဒဿီ နာမ သမ္ဗုဒ္ဓေါ၊ အဂ္ဂေါ ကာရုဏိကော မုနိ၊

သတ္တေ တာရေတုကာမော သော၊ ကရုဏာယ ဖရီ တဒါ.

၁၈၈. ‘‘ဗောဓနေယျံ ဇနံ ဒိသွာ၊ ပိယဒဿီ မဟာမုနိ၊

စက္ကဝါဠသဟဿမ္ပိ၊ ဂန္တွာ ဩဝဒတေ မုနိ.

၁၈၉. ‘‘မမုဒ္ဓရိတုကာမော သော၊ မမဿမမုပါဂမိ၊

န ဒိဋ္ဌော မေ ဇိနော ပုဗ္ဗေ၊ န သုတောပိ စ ကဿစိ.

၁၉၀. ‘‘ဥပ္ပါတာ သုပိနာ မယှံ၊ လက္ခဏာ သုပ္ပကာသိတာ၊

ပဋ္ဌော ဘူမန္တလိက္ခမှိ၊ နက္ခတ္တပဒကောဝိဒေါ.

၁၉၁. ‘‘သောဟံ ဗုဒ္ဓဿ သုတွာန၊ တတ္ထ စိတ္တံ ပသာဒယိံ၊

တိဋ္ဌန္တော [ဘုဉ္ဇန္တော (သီ. ပီ. က.)] ဝါ နိသိန္နော ဝါ၊ သရာမိ နိစ္စကာလိကံ.

၁၉၂. ‘‘မယိ ဧဝံ သရန္တမှိ၊ ဘဂဝါပိ အနုဿရိ၊

ဗုဒ္ဓံ အနုဿရန္တဿ၊ ပီတိ မေ ဟောတိ တာဝဒေ.

၁၉၃. ‘‘ကာလဉ္စ ပုနရာဂမ္မ၊ ဥပေသိ မံ မဟာမုနိ၊

သမ္ပတ္တေပိ န ဇာနာမိ၊ အယံ ဗုဒ္ဓေါ မဟာမုနိ.

၁၉၄. ‘‘အနုကမ္ပကော ကာရုဏိကော၊ ပိယဒဿီ မဟာမုနိ၊

သဉ္ဇာနာပေသိ အတ္တာနံ၊ ‘အဟံ ဗုဒ္ဓေါ သဒေဝကေ’.

၁၉၅. ‘‘သဉ္ဇာနိတွာန သမ္ဗုဒ္ဓံ၊ ပိယဒဿိံ မဟာမုနိံ၊

သကံ စိတ္တံ ပသာဒေတွာ၊ ဣဒံ ဝစနမဗြဝိံ.

၁၉၆. ‘‘‘အညေ [သဗ္ဗေ (သျာ.)] ပီဌေ စ ပလ္လင်္ကေ၊ အာသန္ဒီသု နိသီဒရေ၊

တုဝမ္ပိ သဗ္ဗဒဿာဝီ၊ နိသီဒ ရတနာသနေ’.

၁၉၇. ‘‘သဗ္ဗရတနမယံ ပီဌံ၊ နိမ္မိနိတွာန တာဝဒေ၊

ပိယဒဿိဿ မုနိနော၊ အဒါသိံ ဣဒ္ဓိနိမ္မိတံ.

၁၉၈. ‘‘ရတနေ စ နိသိန္နဿ၊ ပီဌကေ ဣဒ္ဓိနိမ္မိတေ၊

ကုမ္ဘမတ္တံ ဇမ္ဗုဖလံ၊ အဒါသိံ တာဝဒေ အဟံ.

၁၉၉. ‘‘မမ ဟာသံ ဇနေတွာန၊ ပရိဘုဉ္ဇိ မဟာမုနိ၊

တဒါ စိတ္တံ ပသာဒေတွာ၊ သတ္ထာရံ အဘိဝါဒယိံ.

၂၀၀. ‘‘ပိယဒဿီ တု ဘဂဝါ၊ လောကဇေဋ္ဌော နရာသဘော၊

ရတနာသနမာသီနော၊ ဣမာ ဂါထာ အဘာသထ.

၂၀၁. ‘‘‘ယော မေ ရတနမယံ ပီဌံ၊ အမတဉ္စ ဖလံ အဒါ၊

တမဟံ ကိတ္တယိဿာမိ၊ သုဏာထ မမ ဘာသတော.

၂၀၂. ‘‘‘သတ္တသတ္တတိ ကပ္ပါနိ၊ ဒေဝလောကေ ရမိဿတိ၊

ပဉ္စသတ္တတိက္ခတ္တုဉ္စ၊ စက္ကဝတ္တီ ဘဝိဿတိ.

၂၀၃. ‘‘‘ဒွတ္တိံသက္ခတ္တုံ ဒေဝိန္ဒော၊ ဒေဝရဇ္ဇံ ကရိဿတိ၊

ပဒေသရဇ္ဇံ ဝိပုလံ၊ ဂဏနာတော အသင်္ခိယံ.

၂၀၄. ‘‘‘သောဏ္ဏမယံ ရူပိမယံ၊ ပလ္လင်္ကံ သုကတံ ဗဟုံ၊

လောဟိတင်္ဂမယဉ္စေဝ၊ လစ္ဆတိ ရတနာမယံ.

၂၀၅. ‘‘‘စင်္ကမန္တမ္ပိ မနုဇံ၊ ပုညကမ္မသမင်္ဂိနံ၊

ပလ္လင်္ကာနိ အနေကာနိ၊ ပရိဝါရေဿရေ တဒါ.

၂၀၆. ‘‘‘ကူဋာဂါရာ စ ပါသာဒါ၊ သယနဉ္စ မဟာရဟံ၊

ဣမဿ စိတ္တမညာယ၊ နိဗ္ဗတ္တိဿန္တိ တာဝဒေ.

၂၀၇. ‘‘‘သဋ္ဌိ နာဂသဟဿာနိ၊ သဗ္ဗာလင်္ကာရဘူသိတာ၊

သုဝဏ္ဏကစ္ဆာ မာတင်္ဂါ၊ ဟေမကပ္ပနဝါသသာ [ဟေမကပ္ပနိဝါသနာ (သီ. သျာ.)၊ ဟေမကပ္ပနိဝါသသာ (က.)].

၂၀၈. ‘‘‘အာရူဠှာ ဂါမဏီယေဟိ၊ တောမရင်္ကုသပါဏိဘိ၊

ဣမံ ပရိစရိဿန္တိ၊ ရတ္နပီဌဿိဒံ ဖလံ.

၂၀၉. ‘‘‘သဋ္ဌိ အဿသဟဿာနိ၊ သဗ္ဗာလင်္ကာရဘူသိတာ၊

အာဇာနီယာဝ ဇာတိယာ၊ သိန္ဓဝါ သီဃဝါဟိနော.

၂၁၀. ‘‘‘အာရူဠှာ ဂါမဏီယေဟိ၊ ဣလ္လိယာစာပဓာရိဘိ၊

တေပိမံ ပရိစရိဿန္တိ၊ ရတ္နပီဌဿိဒံ ဖလံ.

၂၁၁. ‘‘‘သဋ္ဌိ ရထသဟဿာနိ၊ သဗ္ဗာလင်္ကာရဘူသိတာ၊

ဒီပါ အထောပိ ဝေယဂ္ဃါ၊ သန္နဒ္ဓါ ဥဿိတဒ္ဓဇာ.

၂၁၂. ‘‘‘အာရူဠှာ ဂါမဏီယေဟိ၊ စာပဟတ္ထေဟိ ဝမ္မိဘိ၊

ပရိဝါရေဿန္တိမံ နိစ္စံ၊ ရတ္နပီဌဿိဒံ ဖလံ.

၂၁၃. ‘‘‘သဋ္ဌိ ဓေနုသဟဿာနိ၊ ဒေါဟညာ ပုင်္ဂဝူသဘေ၊

ဝစ္ဆကေ ဇနယိဿန္တိ၊ ရတ္နပီဌဿိဒံ ဖလံ.

၂၁၄. ‘‘‘သောဠသိတ္ထိသဟဿာနိ၊ သဗ္ဗာလင်္ကာရဘူသိတာ၊

ဝိစိတ္တဝတ္ထာဘရဏာ၊ အာမုက္ကမဏိကုဏ္ဍလာ.

၂၁၅. ‘‘‘အဠာရပမှာ ဟသုလာ၊ သုသညာ တနုမဇ္ဈိမာ၊

ပရိဝါရေဿန္တိမံ နိစ္စံ၊ ရတ္နပီဌဿိဒံ ဖလံ.

၂၁၆. ‘‘‘အဋ္ဌာရသေ ကပ္ပသတေ၊ ဂေါတမော နာမ စက္ခုမာ၊

တမန္ဓကာရံ ဝိဓမိတွာ၊ ဗုဒ္ဓေါ လောကေ ဘဝိဿတိ.

၂၁၇. ‘‘‘တဿ ဒဿနမာဂမ္မ၊ ပဗ္ဗဇိဿတိကိဉ္စနော၊

တောသယိတွာန သတ္ထာရံ၊ သာသနေဘိရမိဿတိ.

၂၁၈. ‘‘‘တဿ ဓမ္မံ သုဏိတွာန၊ ကိလေသေ ဃာတယိဿတိ၊

သဗ္ဗာသဝေ ပရိညာယ၊ နိဗ္ဗာယိဿတိနာသဝေါ’.

၂၁၉. ‘‘ဝီရိယံ မေ ဓုရဓောရယှံ၊ ယောဂက္ခေမာဓိဝါဟနံ၊

ဥတ္တမတ္ထံ ပတ္ထယန္တော၊ သာသနေ ဝိဟရာမဟံ.

၂၂၀. ‘‘ဣဒံ ပစ္ဆိမကံ မယှံ၊ စရိမော ဝတ္တတေ ဘဝေါ၊

သဗ္ဗာသဝါ ပရိက္ခီဏာ၊ နတ္ထိ ဒါနိ ပုနဗ္ဘဝေါ.

၂၂၁. ‘‘ကိလေသာ ဈာပိတာ မယှံ။ပေ။ ဝိဟရာမိ အနာသဝေါ.

၂၂၂. ‘‘သွာဂတံ ဝတ မေ အာသိ။ပေ။ ကတံ ဗုဒ္ဓဿ သာသနံ.

၂၂၃. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဟေမကော ထေရော ဣမာ ဂါထာယော အဘာသိတ္ထာတိ၊

ဟေမကတ္ထေရဿာပဒါနံ သတ္တမံ.

သတ္တရသမံ ဘာဏဝါရံ.